នៅសាលាខេត្តសៀមរាប នាព្រឹកថ្ងៃទី ០៤ ខែ មេសា ឆ្នាំ២០១៩នេះ បានរៀបចំកិច្ចប្រជុំពិភាក្សា ស្តីពីគម្រោងសាងសង់ អាកាសយានដ្ឋានអន្តរជាតិ សៀមរាបអង្គរ ដែលមានទីតាំងនៅជាប់ព្រំប្រទល់ស្រុកបី គឺស្រុកសូទ្រនិគម ស្រុកជីក្រែង និង ស្រុកស្វាយលើ របស់ខេត្តសៀមរាប លើផ្ទៃដីទំហំ ៧០០ហិកតា ។
កិច្ចប្រជុំនេះបានប្រព្រឹត្តទៅក្រោមកិច្ចដឹកនាំរបស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និង វត្តមានចូលរួមរបស់ឯកឧត្តម តឹករ៉េត សំរេច ប្រធានគណៈកម្មការ តម្រង់ទិសការសាងសង់ និង ជារដ្ឋមន្ត្រីប្រតិភូអមនាយករដ្ឋមន្ត្រី និង ជារដ្ឋលេខាធិការទីស្តីការគណៈរដ្ឋមន្ត្រី និង ភាគីក្រុមហ៊ុនវិនិយោគគម្រោងសាងសង់ចិន ដឹកនាំដោយលោក Lu Yanwen ប្រធានក្រុមហ៊ុនយូណានគ្រុបខូអិលធីឌី និង ឯកឧត្តម លោកជំទាវ អស់លោក លោកស្រីនៃបណ្តាក្រសួង មន្ទីរ អង្គភាព ស្ថាប័នមានការពាក់ព័ន្ធចូលរួមផងដែរ ។
ក្នុងកិច្ចស្វាគមន៍បើកកិច្ចប្រជុំនោះ ឯកឧត្តម ទៀ សីហា ក្នុងនាមអាជ្ញាធរ និងប្រជាពលរដ្ឋខេត្តសៀមរាប ឯកឧត្តមបានសម្តែងនូវសេចក្តីរំភើប ចំពោះសមទ្ធិផលថ្មីដ៏ធំមួយ ដែលនឹងចាប់បដិសន្ធិនៅលើទឹកដីប្រវត្តិសាស្ត្រខេត្តសៀមរាប គឺអាកាសយានដ្ឋានអន្តរជាតិសៀមរាប អង្គរ ដែលជាព្រលានយន្តហោះដ៏ធំមួយនៅក្នុងតំបន់អាស៊ីយើងនេះ ។
មានប្រសាសន៍ និង ធ្វើការបង្ហាញនោះដែរ លោក Lu Yanwen បានគូសបញ្ជាក់ថា អាកាសយានដ្ឋានអន្តរជាតិ សៀមរាប អង្គរ ជាគម្រោងដ៏សំខាន់ ដែលបានគាំទ្រដោយរដ្ឋាភិបាលទាំងពីរ កម្ពុជា ចិន ក្នុងគោលនយោបាយ(ខ្សែក្រវ៉ាត់មួយ និង ផ្លូវមួយ ) ហើយនៅថ្ងៃទី ១៣ តុលា ឆ្នាំ២០១៦ យុនទូ គ្រុប (Yuntou Groupនិងទីស្តីការគណៈរដ្ឋមន្ត្រីនៃព្រះរាជាណាចក្រកម្ពុជា បាន ធ្វើការចុះហត្ថលេខា ព្រមព្រៀង BOT ស្តីពីគម្រោងអាកាសយានដ្ឋានអន្តរជាតិសៀមរាប អង្គរ ក្រោមអធិបតីភាពសម្តេចតេ ជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង លោកប្រធានាធិបតី ស៊ីជីង ពីង នៃសាធារណរដ្ឋប្រជាមានិតចិន ។
លោកបានបញ្ជាក់ថា គម្រោងសាងសង់ព្រលានយន្តហោះនេះ មានចម្ងាយពីក្រុងសៀមរាប ៥១គីឡូម៉ែត្រ នៅលើផ្ទៃដី សរុប ៧០០ហិកតា ហើយសាងសង់តាមស្តង់ដាររចនាបថអាកាសយានដ្ឋាន លំដាប់ថ្នាក់ទី 4E ដែលអាចប្រតិបត្តិការយន្តហោះខ្នាតធំមានលេខកូដE ។ ម្យ៉ាងទៀតតាមកំណើននៃចរាចរណ៍ផ្លូវអាកាសនាពេលអនាគត និង ត្រូវធ្វើការពង្រីកទៅជា អាកាសយានដ្ឋានប្រភេទ4F ហើយគម្រោងនេះ ប្រតិបត្តិការតាមកម្មវិធី BOT ដែលមានការវិនិយោគដោយ យុនទូ គ្រុប វិនិយោគទុនបរទេសយូណាន និង ព្រលានយន្តហោះ យូណានគ្រុប ដែលបានបណ្តាក់ទុនវិនិយោគ ក្នុងទឹកប្រាក់ ២២០លានដុល្លារសហរដ្ឋអាមេរិច ដើម្បីបង្កើត ក្រុមហ៊ុនអាកាសចរណ៍អន្តរជាតិអង្គរ អ៊ិនវេសមេន (ខេមបូឌា) ខូអិលធីឌី ហៅកាត់ក្រុមហ៊ុនអង្គរ ដែលទទួលខុសត្រូវ ចំពោះការវិនិយោគលើគម្រោងសាងសង់ និង គ្រប់គ្រងប្រតិបត្តិការ ។
លោក Lu Yanwen រំពឹងថាការសាងសង់ អាចនឹងប្រើរយៈពេលពី ៣ឆ្នាំទៅ៥ឆ្នាំ ហើយអាកាសយានដ្ឋាននេះ ក្នុងមួយឆ្នាំ អាចបម្រើសេវាកម្មភ្ញៀវទេសចរណ៍ពី ៧លានទៅ១០លាននាក់ផងដែរ ។
អត្ថបទ និង រូបថត ៖ លោក ម៉ី សុខារិទ្ធ និងលោក គឿន វេត
កែសម្រួលអត្ថបទ ៖ លោក លីវ សាន្ត
