មានប្រសាសន៍ក្នុងកិច្ចប្រជុំត្រៀមរៀបចំតុបតែងលម្អស្តង់ពិព័រណ៍បង្ហាញពីគម្រោងអភិវឌ្ឍន៍ទេសចរណ៍ក្នុងខេត្តសៀមរាប ព្រមទាំងមហោស្រពអាហារខ្មែរ និងអន្តរជាតិ ក្នុងពិធីបុណ្យទន្លេរលើកទី៧ នាព្រឹកថ្ងៃទី០៣ ខែមីនា ឆ្នាំ២០២៣នេះ លោក យុន លីណេ អភិបាលរងខេត្តសៀមរាប បានជំរុញឱ្យមន្ទីរ-អង្គភាពពាក់ព័ន្ធក្នុងខេត្ត ត្រៀមរៀបចំផលិតផលកសិកម្ម សិប្បកម្ម ផលិតផលកែច្នៃ និងម្ហូបអាហារ ដែលមានភាពទាក់ទាញ ដើម្បីដាក់តាំងបង្ហាញក្នុងពិធីបុណ្យទន្លេរលើកទី៧ ឆ្នាំ២០២៣ លើទឹកដីខេត្តកំពង់ធំ នាពេលឆាប់ៗខាងមុខនេះ។
ក្នុងឱកាសនោះ លោក យុន លីណេ បានបញ្ជាក់ថា ជារៀងរាល់ឆ្នាំពិធីបុណ្យទន្លេត្រូវបានប្រារព្ធឡើងនៅខែមីនា និងរៀបចំឡើងនៅបណ្តាខេត្តនានាតាមដងទន្លេមេគង្គទន្លេសាប និងបឹងទន្លេសាប។ ពិធីបុណ្យនេះត្រូវបានគេចាត់ទុកថា ជាឧបករណ៍មួយក្នុងការជំរុញវិស័យទេសចរណ៍ និងការប្រើប្រាស់ផលិតផលដែលត្រូវបានផលិតក្នុងស្រុក។ ជាមួយគ្នានេះ រដ្ឋបាលខេត្ត ក៏បានត្រៀមផលិតផលមួយចំនួនដូចជា ទឹកបរិសុទ្ធ នំខ្មែរ សាច់ក្រក់ គ្រឿងសំអាង និងស្រាជាដើម ដែលជាផលិតផលក្នុងចលនាភូមិមួយផលិតផលមួយ ព្រមទាំងផលិតផលរបស់បងប្អូនសហគមន៍ចង្រ្កាន្តរយៈ និងផលិតផលកសិកម្ម សិប្បកម្ម ឧស្សាហកម្មជាមុខច្រើនទៀត ដើម្បីដាក់តាំងបង្ហាញឱ្យសាធារណៈជនបានឃើញ និងយល់កាន់តែច្បាស់ពីខេត្តសៀមរាប តាមរយៈការតាំងពិព័រណ៍ផលិតផលខ្មែរនេះ។
សូមជម្រាបថា រាជរដ្ឋាភិបាលបានសម្រេចរៀបចំពិធីបុណ្យទន្លេឡើងវិញ បន្ទាប់ពីផ្អាករយៈពេល២ឆ្នាំដោយសារវិបត្តិជំងឺកូវីដ១៩ ដោយបានជ្រើសរើសយកទីតាំងជាប់ដងស្ទឹងសែន ក្នុងទីរួមខេត្តកំពង់ធំ ដែលនឹងត្រូវប្រព្រឹត្តទៅនៅថ្ងៃទី០៨-១០ ខែមីនា ឆ្នាំ២០២៣ខាងមុខ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ។ គួររំលឹកថា ពិធីបុណ្យទន្លេត្រូវបានរៀបចំចំនួន៦លើកមកហើយ ក្នុងនោះនៅឆ្នាំ២០១៥ ធ្វើនៅខេត្តក្រចេះ, ឆ្នាំ២០១៦ ធ្វើនៅខេត្តស្ទឹងត្រែង, ឆ្នាំ២០១៧ ធ្វើនៅខេត្តកំពង់ចាមនិងខេត្តត្បូងឃ្មុំ, ឆ្នាំ២០១៨ ធ្វើនៅខេត្តកណ្ដាល, ឆ្នាំ២០១៩ ធ្វើនៅខេត្តកំពង់ឆ្នាំង និងឆ្នាំ២០២០ និងលើកទី៧ នេះ ធ្វើឡើងនៅខេត្តកំពង់ធំ ៕
អត្ថបទ៖លោក បុង ឆវ័ន
រូបភាព ៖ លោក ហ៊ុន ឆៃលាង
