ឯកឧត្តម ឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប កាលពីថ្ងៃចុងសប្ដាហ៍កន្លងទៅនេះ បានអញ្ជើញកាត់ខ្សែបូរបញ្ចុះខ័ណ្ឌសីមាព្រះវិហារថ្មី និងសមិទ្ឋផលនានា នៅវត្តកោសិយសិរីសេដ្ឋោ ហៅវត្តពញាព្រហ្មស្ថិត ក្នុងភូមិថ្នល់ឃុំស្ពានត្នោត ស្រុកជីក្រែង ខេត្តសៀមរាប ដោយមានការចូលរួមពីក្រុមការងារចុះជួយស្រុកជីក្រែង គណៈកម្មការអាចារ្យវត្ត លោកយាយលោកតា មន្រ្តីរាជការ អាជ្ញាធរមូលដ្ឋាន យាយជីតាជី ប្រជាពុទ្ធបរិស័ទ លោកគ្រូអ្នកគ្រូ និងសិស្សានុសិស្សជាច្រើនកុះករ។
បើតាមព្រះភិក្ខុពុទ្ធថេរោ ស៊ាម សុច័ន្ទ ព្រះចៅអធិការវត្តពញាព្រហ្ម មានសង្ឃដីការបញ្ជាក់ថា ព្រះវិហារដែលបញ្ចុះខ័ណ្ឌសីមា មានបណ្តោយ ២៦ម៉ែត្រ ទទឹង ១៤ម៉ែត្រ និងកម្ពស់ ២១ម៉ែត្រ បានចាប់ផ្តើមកសាងនៅឆ្នាំ២០១៩ មកដល់ពេលនេះមានរយៈពេល៤ឆ្នាំ ចំណាយថវិកាសាងសង់អស់ជាង ៤៥ម៉ឺនដុល្លារ ដែលថវិកាទាំងនេះកើតពីកម្លាំងសាមគ្គីរបស់ប្រជាពលរដ្ឋពុទ្ធបរិស័ទចំណុះជើងវត្តទាំង ១៣ភូមិ និងពុទ្ធបរិស័ទជិតឆ្ងាយបានរួមសហការគ្នា។ ហើយគណៈកម្មការសាងសង់ក៏នៅខ្វះថ្លៃសម្ភារៈសំណង់ និងថ្លៃចាក់ដីបំពេញខឿនព្រះវិហារ ចំនួនជា ១ម៉ឺន ២ពាន់ដុល្លាទៀត។
មានប្រសាសន៍ក្នុងឱកាសនោះ ឯកឧត្តម ឧកញ៉ា សៀង ណាំ បានសំដែងនូវភាពសោមនស្សចំពោះសមិទ្ធិផលថ្មី ដែលបានកើតមានឡើងនៅក្នុងទីអារាមនេះ និងបានកោតសរសើរ ចំពោះព្រះចៅអធិការ អាចារ្យ គណៈកម្មការវត្ត និងពុទ្ធបរិស័ទទាំងអស់ ដែលបានប្រឹងប្រែងយកព្រះទ័យ និងយកចិត្តទុកដាក់ក្នុងការកសាងសមិទ្ធិផលនេះឡើងទុកជាប្រយោជន៏នៅក្នុងព្រះពុទ្ធសាសនា សំរាប់ជាទីគោរពបដិបត្តិព្រះធម៌ និងប្រារព្ឋពិធីបុណ្យផ្សេងៗ ដែលចាត់ទុកជាបច្ច័យរួមចំណែកបន្ថែមទៀតញ៉ាំងឱយវិស័យពុទ្ធចក្រកាន់តែរីកចំរើនគង់វង្សស្ថិតស្ថេរថែមទៀត។
ឯកឧត្តម មានប្រសាសន៍ទៀតថា កម្ពុជា ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោហ៊ុនសែន ជាប្រមុខដឹកនាំ បានធ្វើអោយប្រទេសជាតិមាន សុខសន្តិភាព និងការអភិវឌ្ឍន៏រីកចំរើនលើគ្រប់វិស័យ ទាំងអាណាចក្រ និងពុទ្ធចក្រ។ ក្នុងសម័យកាលដែលប្រទេសកម្ពុជា ធ្លាក់ចូលទៅក្នុងរបប្រល័យពូជជសាសន៏ ៣ឆ្នាំ ៨ខែ ២០ថ្ងៃ បណ្តាឱ្យហេដ្ឋារចនាសម្ព័ន្ធសង្គមជាតិ វត្តអារាមសាលារៀន ទ្រព្យសម្បត្តិសាធារណៈរបស់រដ្ឋ ត្រូវទទួលរងនូវការបំផ្លិចបំផ្លាញស្ទើរតែសូន្យ សូម្បីតែព្រះសង្ឃ វត្តអារាម និងសាសនាផ្សេងៗទៀត ក៏ត្រូវទទួលរងនូវការកាប់សំលាប់ និងបំផ្លិចបំផ្លាញស្ទើរតែផុតពូជដែរ។ អាស្រ័យដោយមានជ័យជំនៈ ៧ មករា ឆ្នាំ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៏ និងទទួលបានសិទ្ធិសេរីភាព រួមគ្នាកសាងសង្គមជាតិឡើងវិញ រហូតមានការរីកចំរើនជាលំដាប់ទាំងពុទ្ចចក្រ និងអណាចក្រដូចឃើញជាក់ស្តែងក្នុងបច្ចុប្បន្ន។
សូមជម្រាបថា ក្នុងឱកាសនោះដែរ ឯកឧត្តម ឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប ក៏បានប្រគេននូវថវិកាចំនួន ២០លានរៀល ជូនព្រះចៅអធិការវត្ត ដើម្បីយកទៅប្រើប្រាស់ក្នុងការសាងសងសមិទ្ធិផលផ្សេងៗបន្ថែម និងបានជូនដល់តាជីយាយជី ចំនួន ២២០នាក់ ក្នុងម្នាក់ៗក្រណាត់ស១ដុំ ថវិកា៥ពាន់រៀល, ប្រជាពលរដ្ឋ ៧០០នាក់ ក្នុងម្នាក់ទទួលបានសារុង១ ,លោកគ្រូអ្នកគ្រូ ១០នាក់ ម្នាក់ៗថវិកា ៥ម៉ឺនរៀល និងសិស្សានុសិស្ស ១០០នាក់ ម្នាក់ៗទទួលបានសៀវភៅសរសេរ ២ក្បាល និងថវិកា៥ពាន់រៀលផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
