អាជ្ញាធរខេត្ដសៀមរាប បានបង្ហាញពីមោទភាពរបស់ខ្លួន ដែលបានធ្វើជាម្ចាស់ផ្ទះការប្រគួតកីឡាស៊ីហ្គេមឆ្នាំ២០២៣ ការអុចភ្លើងគប់នៅប្រាសាទអង្គរ នៃព្រឹត្ដិការណ៍នេះ ខណៈពេលដែលអាជ្ញាធរបានរៀបចំត្រៀមលក្ខណៈទទួលភ្ញៀវទេសចរជាបណ្ដើរៗហើយ។
បើតាមលោកស្រី ម៉ននី រង្សី អភិបាលរងខេត្ដ មានប្រសាសន៍ថា ប្រទេសកម្ពុជាបានធ្វើជាម្ចាស់ផ្ទះស៊ីហ្គេមលើកទី៣២ ឆ្នាំ២០២៣នេះ ហើយក្នុងនោះខេត្ដសៀមរាប ជាម្ចាស់ផ្ទះមួយចំណែកដែរ ដោយទទួលការប្រគួតកីឡាស៊ីហ្គេម ២ប្រភេទ រួមមានវិញ្ញាសារកីឡាជិះកង់ និងកីឡាអត្ដពលឹក ជាពិសេសមានកម្មវិធីទទួលគប់ភ្លើងនៅប្រាសាទអង្គរ។ ជាមួយគ្នានោះ ខេត្ដក៍ត្រូវបានរៀបចំព្រឹត្ដិការណ៍អង្គរសង្ក្រាន្ដ ខួបលើកទី១០ ដែលព្រឹត្ដិការណ៍នេះមានគណៈប្រតិភូកំពូលៗ ឥស្សរជនជាន់ខ្ពស់សំខាន់ៗ ភ្ញៀវទេសចររាប់លាននាក់ មកលេងខេត្ដសៀមរាបផងដែរ។
លោកស្រីបន្ដថា នៅក្នុងព្រឹត្ដិការណ៍ដ៍អស្ចារ្យនេះ អាជ្ញាធរបានចាប់ផ្ដើមរៀបចំសំអាតបរិស្ថាន សន្ដិសុខសណ្ដាប់ធ្នាប់សាធារណៈ ប្រព័ន្ធភ្លើងតាមដងផ្លូវសាធារណៈជាបណ្ដើរៗហើយ។ ជាពិសេសទៀត ក្រុមប្រតិបត្ដិករទេសចរណ៍ មានការរៀបចំសេវាកម្មស្នាក់នៅ សេវាកម្មអាហារដ្ឋានជាដើម ដើម្បីរងចាំទទួលភ្ញៀវទេសចរជាតិនិងអន្ដរជាតិទៅលេងខេត្ដសៀមរាប។អាជ្ញាធរ បានអំពាវដល់អ្នកទេសចរជាតិនិងអន្ដរជាតិ ទៅកំសាន្ដ ហើយរំពឹងថា ខេត្ដទេសចរណ៍មួយនេះនឹងទាក់ទាញអ្នកទេសចរកាន់ច្រើនថែមទៀត។
ព្រឹត្ដិការណ៍កីឡាស៊ីហ្គេមលើកទី៣២ឆ្នាំ២០២៣ដែលធ្វើឡើងនៅខេត្ដសៀមរាប មានពីរប្រភេទគឺប្រភេទកីឡាប្រណាំងកង់ និងអត្ដពលឹក រត់ម៉ារ៉ាតុង។កីឡាប្រណាំងកង់មានវិញ្ញាសារកីឡាប្រណាំងកង់គួក និងកីឡាប្រណាំងឡើងភ្នំ ក្នុងនោះត្រូវបែងចែកជាកង់ភ្នំបុរស នារី ដែលធ្វើការប្រគួតនៅជើងភ្នំគូលេនស្រុកបន្ទាយស្រី។ដោយឡែកការប្រណំាងកង់គួកបុរសនារី និង ដើរចំង៉ាយ រត់ម៉ារ៉ាតុង ធ្វើឡើងនៅខាងមុខប្រាសាទអង្គរវត្ដ ខេត្ដសៀមរាប៕
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ សាវី
