នាព្រឹកថ្ងៃទី៧ ខែមីនា ឆ្នាំ២០២៣នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលខេត្តសៀមរាប បានដឹកនាំបើកកិច្ចប្រជុំសាមញ្ញាលើកទី៤៦ ឆ្នាំ២០២៣ ក្រុមប្រឹក្សាខេត្តសៀមរាប អាណត្តិទី៣ ដើម្បីធ្វើការពិនិត្យ ពិភាក្សា និងអនុម័តលើចំនុចសំខាន់ៗមួយចំនួន ដោយមានការចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត តំណាងអាជ្ញាធរអប្សារា លោកលោកស្រីថ្នាក់ដឹកនាំមន្ទីរ-អង្គភាពជុំវិញខេត្ត លោកនាយក-នាយករងរដ្ឋបាល ទីចាត់ការ និងអាជ្ញាធរក្រុងស្រុកជាច្រើនរូបទៀត។
សូមជម្រាបថា ក្នុងកិច្ចប្រជុំនាឱកាសនេះ មានរបៀបវារៈចំនួន៥ ក្នុងនោះ៖១.ពិនិត្យ ពិភាក្សា និងអនុម័តលើសំណើសុំអនុញ្ញាតច្បាប់ឈប់សម្រាកនៅក្នុងកិច្ចប្រជុំសាមញ្ញលើកទី៤៦ ,២.ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៤៥ របស់ក្រុមប្រឹក្សាខេត្ត, ៣.ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែកុម្ភះ ឆ្នាំ២០២៣ ស្តីពីការអនុវត្តការងាររបស់រដ្ឋបាលខេត្ត, ៤.ពិនិត្យ ពិភាក្សា និងអនុម័តលើសសេចក្តីព្រាង សេចក្តីសម្រេចចំនួន៣ និង៥.ពិនិត្យ ពិភាក្សា និងអនុម័តលើការស្នើសុំបង្កើតទីចាត់ការថ្មី ក្នុងរចនាសម្ព័ន្ធរបស់រដ្ឋបាលខេត្ត។ ក្រៅពីនោះសមាជិកសមាជិកាក្រុមប្រឹក្សាខេត្ត ក៏បានលើកឡើងនូវបញ្ហាមួយចំនួន និងស្នើសុំធ្វើការកែតម្រូវអក្ខរាវិរុទ្ធនៅក្នុងរបាយការណ៍ផងដែរ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានជម្រុញដល់គ្រប់បណ្តាមន្ទីរអង្គភាពពាក់ព័ន្ធ និងរដ្ឋបាលក្រុងស្រុកទាំងអស់ ត្រូវយកចិត្តទុកដាក់ខ្ពស់ទៅលើការងារសន្តិសុខ សណ្តាប់ធ្នាប់សាធារណៈ។ សំខាន់ពេលការយាងមកដល់របស់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី គង់ប្រថាបនៅខេត្តសៀមរាប យាងប្រទានគុបភ្លើងកីឡាស៊ីហ្គេមលើកទី៣២ ឆ្នាំ២០២៣ នៅប្រាសាទអង្គរវត្ត។ ជាមួួយគ្នានោះរដ្ឋបាលក្រុងស្រុក ត្រូវធ្វើការពង្រឹងលើការងារផ្តល់សេវាច្រកចេញចូលតែមួយ និងបន្តការដោះស្រាយរាល់វិវាទនៅក្រៅប្រព័ន្ធតុលាការ នៅតាមមូលដ្ឋាន ព្រមទាំងជម្រុញការផ្សព្វផ្សាយដល់ប្រជាពលរដ្ឋ ដែលមានអត្តសញ្ញាណប័ណ្ណ ហួសសុពលភាព និងបាត់ឲ្យបងប្អូនទៅធ្វើនៅតាមប៉ុស្តិ៍នគរបាលរដ្ឋបាលឃុំសង្កាត់ និងជម្រុញដល់ក្រុមយុវជនចូលរួធ្វើការផ្សព្វផ្សាយទៅតាមខ្នងផ្ទះ។ ក្នុងនោះអ្នកពាក់ព័ន្ធត្រូវធ្វើការតាមដានជាប្រចាំ អំពីបញ្ហាសេវាទេសចរណ៍នៅតាមសណ្ឋាគារ ផ្ទះសំណាក់ និងភោជនីយដ្ឋានអំពីតម្លៃ នៅក្នុងឱកាសដែលភ្ញៀវជាតិ អន្តរជាតិមកចូលរួមអបអរសាទរនៃព្រឹត្តិការណ៍អង្គរសង្ក្រានឆ្នាំ២០២៣ ខាងមុខ ជាពិសេសមន្ទីរសុខាភិបាលខេត្ត ត្រូវធ្វើការផ្សព្វផ្សាយឲ្យបានញឹកញាប់អំពីបញ្ហាជំងឺឆ្លង សំខាន់ជំងឺកូវីដ-១៩ និងផ្តាស្សាយបកី្ស។
មានមតិបិទអង្គប្រជុំ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានមានប្រសាសន៍ថា តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិកសមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និងអ្នកពាក់ព័ន្ធទាំងអស់បានញ៉ាំងឲ្យដំណើរការនៃកិច្ចប្រជុំសាមញ្ញលើកទី៤៦ ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក។ ជាមួយគ្នានេះឯកឧត្តម ក៏បានធ្វើការកោតសរសើរ ដល់ថ្នាក់ដឹកនាំខេត្តសៀមរាប ដែលបានខិតខំអភិវឌ្ឍន៍ខេត្តឲ្យមានសន្តិសុខសណ្តាប់ធ្នាប់ល្អ មុននៃព្រឹត្តិការណ៍អង្គរសង្ក្រាន្តចូលមកដល់នៅលើទឹកដីខេត្តសៀមរាប និងការងារសន្តិសុខសណ្តាប់ធ្នាប់ក្នុងការយាងមកប្រទាននូវគុបភ្លើងកីឡាស៊ីហ្គេម លើកទី៣២ ឆ្នាំ២០២៣ នៅប្រាសាទអង្គរវត្ត របស់ព្រះមហាក្សត្រ។ ជាពិសេសត្រូវមានសាមគ្គីភាពផ្ទៃក្នុង និងមានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
