ក្រោមព្រះរាជាធិបតីរបស់ករុណាព្រះបាទសម្តេចព្រះបរមនាថ នរោត្តម សីហមុនីព្រះមហាក្សត្រ នៃព្រះរាជាណាចក្រកម្ពុជា ព្រះរាជពិធីសុំភ្លើង «ព្រះអគ្គីកីឡា» នៅប្រាសាទអង្គរវត្ត នាថ្ងៃទី២១ ខែមីនាខាងមុខ នឹងយកពីពន្លឺចំណាំងផ្លាតព្រះអាទិត្យ រះចំកណ្ដាលកំពូលប្រាសាទអង្គរវត្ត ដើម្បីបញ្ឆេះគប់ភ្លើង មុនពិធីរត់កាន់ភ្លើងគប់កាត់បណ្ដាប្រទេសអាស៊ីអាគ្នេយ៍។
បើយោងតាមកិច្ចប្រជុំពិភាក្សា ក្នុងការរៀបចំតម្រាយផ្លូវ និងផែនការសកម្មភាព ការដង្ហែព្រះអគ្គីកីឡា អាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ នៅសាលាខេត្តសៀមរាប នារសៀលថ្ងៃទី៧ ខែមីនា ឆ្នាំ២០២៣ ដឹកនាំដោយលោកស្រី ម៉ននី រង្សី អភិបាលរងខេត្តសៀមរាប បង្ហាញថា នេះជាលើកទី១ សម្រាប់កម្ពុជាក្នុងការទទួលរៀចំធ្វើជាម្ចាស់ផ្ទះ ក្នុងព្រឹត្តិការណ៍កីឡាក្នុងតំបន់អាស៊ាននេះ បន្ទាប់ពីត្រូវអាក់ខានអស់រយៈពេលជាង៦០ឆ្នាំដោយសារសង្គ្រាមស៊ីវិលរ៉ាំរ៉ៃ។ ដោយសារការដឹកនាំប្រកបដោយភាពប៉ិនប្រសព្វ និងតាមរយៈគោលនយោបាយឈ្នះ ឈ្នះ របស់សម្តេចតេជោ ហ៊ុន សែន កម្ពុជាបានទទួលនូវសុខសន្តិភាពពេញលេញ ជាមួយនិងការរីកចម្រើនលើគ្រប់វិស័យ ដើម្បីធ្វើជាម្ចាស់ផ្ទះក្នុងការរៀបចំព្រឹត្តិការណ៍នេះឡើង ទៅតាមកម្មវិធី និងពេលវេលាដែលបានកំណត់។
បើតាមកិច្ចប្រជុំនេះដែរ «ព្រះអគ្គីកីឡា» នឹងដង្ហែចេញពីប្រាសាទអង្គរវត្ត កាត់តាមវង់តូច និងចូលមកក្រុងសៀមរាបដោយរក្សាទុកក្នុងវត្តរាជបូណ៌។ បន្ទាប់មក នឹងដង្ហែចេញទៅកាន់បណ្តាប្រទេសក្នុងតំបន់អាស៊ាន និងត្រឡប់មកកម្ពុជាវិញ ដោយឆ្លងកាត់ខេត្តមួយចំនួន ដោយការជិះកង់ ទៅកាន់ពហុកីឡដ្ឋានជាតិមរតកតេជោ រាជធានីភ្នំពេញ ដែលជាកន្លែងប្រារព្ឋពិធីបើក ត្រូវនឹងល្ងាចថ្ងៃទី៥ ខែឧសភា ឆ្នាំ២០២៣។
ព័ត៌មានជាតិ ថ្មីៗ
គួរជម្រាបថា ការប្រកួតកីឡាស៊ីហ្គេម លើកទី៣២ នឹងចាប់ផ្តើមពីថ្ងៃទី០៥-១៧ ខែឧសភា ឆ្នាំ២០២៣ និង ការប្រកួតកីឡាអាស៊ានប៉ារ៉ាហ្គេមលើកទី១២ នឹងចាប់ផ្តើមពីថ្ងៃទី០៣-០៩ ខែមិថុនា ឆ្នាំ២០២៣។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
