នៅថ្ងៃទី៨ ខែមីនា ដែលត្រូវនឹង ទិវានារីអន្ដរជាតិ ក្រុមយុវជនក្នុងខេត្តសៀមរាប បានចូលរួមជិះកង់អបអរសាទរ ដែលជាការបង្ហាញពីសកម្មរបស់ស្ត្រីក្នុងសង្គម ក៏ដូចជាការប្រើប្រាស់សិទ្ធិស្មើៗគ្នា ក្នុងការចូលរួមអភិវឌ្ឍន៍ និងមានតួនាទី ភារកិច្ចដូចបុរសផងដែរ។
យុទ្ធនាការជិះកង់ អបអរសាទរទិវានារីអន្ដរជាតិ ៨មីនា លើកទី១១២ ក្នុងក្រុងសៀមរាបនេះ ធ្វើឡើងក្រោមប្រធាបទ ស្ដ្រីរួមគ្នាក្នុងសុខសន្ដិភាព និងដើម្បីកិច្ចអភិវឌ្ឍន៍ក្នុងយុគសម័យឌីជីថល។ លោក ឃឹម ផុន តំណាងក្រុមយុវជន បង្ហាញថា បច្ចុប្បន្ន ស្ដ្រី មានសមត្ថភាព និងការទទួលស្គាល់ពីសង្គមបានទូលំទូលាយ ជាក់ស្ដែងនៅអង្គភាពរបស់លោក មានថ្នាក់ដឹកនាំជាស្ត្រី ច្រើនជាងបុរស ព្រោះស្ដ្រីមានភាពទន់ភ្លន់ ធ្វើការងារម៉ត់ចត់។ លោកបន្ថែមថា យុទ្ធនាការនាពេលនេះដែរ បានរំលេចពីតម្លៃនៃការចូលរួមរក្សាសន្តិភាព និងការអភិវឌ្ឍន៍ប្រទេសជាតិ ដែលរាជរដ្ឋាភិបាល បាននឹងកំពុងគំាទ្រជំរុញ ឱ្យមានការចូលរួមពីគ្រប់ស្ថាប័ន ទំាងបុរស ទំាងស្រ្តី ដើម្បីវឌ្ឍនភាពសង្គមឆ្ពោះទៅលើកកម្ពស់សិទ្ធិ ស្ថានភាព ជីវភាព ឋានៈនិងតួនាទីរបស់ស្ត្រី ក្នុងយុគសម័យឌីជីថលនេះ ក៏ដូចជាសុខុមាលភាព សង្គម ដោយធ្វើការទប់ស្កាត់ និងកាត់បន្ថយអំពើ ហិង្សាដោយសន្តិវិធី។
សូមបញ្ជាក់ថា យុទ្ធនាការជិះកង់របស់ក្រុមយុវជន អបអរទិវានារីអន្ដរជាតិ លើកទី១១២នេះ មានគោលបំណងផ្សព្វផ្សាយពីការប្រើប្រាស់សិទ្ធិរវាងបុរស និងស្ត្រី និងបញ្រ្ជាបដល់ការយល់ដឹងដល់មជ្ឈដ្ឋានទូទៅ ជាពិសេសបុរស ក្នុងការផ្តល់ឱកាសដល់ស្រ្តី ដោយបុរសគ្រប់រូបគួរយោគយល់ អធ្យាស្រ័យ ជួយរំលែកការងារផ្ទះ ដែលមិនមានកម្រៃ ដើម្បីសម្រាលបន្ទុកការងារផ្ទះរបស់ស្រ្តី ជាពិសេសនៅក្នុងតួនាទី ធ្វើសេចក្តីសម្រេចចិត្ត ដែលជាចំណែកមួយសំខាន់អាចជួយសម្រាលបន្ទុកគ្រួសារ សង្គម និងរួមចំណែក ពន្លឿនកិច្ចអភិវឌ្ឍន៍ប្រទេស ទាំងកម្លាំងកាយ និងប្រាជ្ញា៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
