នៅរសៀលថ្ងៃទី៦ ខែមីនា ឆ្នាំ២០២៣ និស្សិតសាកលវិទ្យាល័យឥន្ទ្រវិជ្ជាសាខាខេត្តសៀមរាបជាង ២រយនាក់ បានទទួលការអប់រំសីលធម៌ និងសមាធិ តាមលំអានព្រះពុទ្ឋសាសនា នៅវត្តអង្គរខាងជើង ក្នុងសង្កាត់នគរធំ ក្រុងសៀមរាប ក្នុងគោលបំណងបណ្តុះនូវសុជីវធម៌ គុណធម៌ ចរិយាធម៌ដល់ពួកគាត់ ដើម្បីទទួលបាននូវសីលធម៌ល្អ ចរិយាសម្បត្តិថ្លៃថ្នូរ សមជាកុលបុត្រខ្មែរ និងដែលពួកគាត់ជាយុវជនជំនាន់ក្រោយ ជាទំពាំងស្នងឬស្សី និងជាសសរទ្រូងរបស់ប្រទេសជាតិនាពេលអនាគត។
ព្រះតេជគុណ តាត មហាទី នាយកសាខាសាកលវិទ្យាល័យឥន្ទ្រវិជ្ជាខេត្តសៀមរាប មានសង្ឃដីកាថា នេះគឺជាលើក១ហើយ ដែលនិស្សិតនៃសាកលវិទ្យាល័យនេះបានចូលខ្លួនជាក្រុមមកទទួលការអប់រំបន្ថែម តាមរយៈការសមាទាននិច្ចសីល សូត្រធម៌ និងហាត់សមាធិរយៈពេលខ្លី ស្របទៅតាមគោលការណ៍របស់សាកលវិទ្យាល័យ គឺបណ្តុះទឹកចិត្តពួកគាត់ឱ្យស្រឡាញ់ និងប្រព្រឹត្តិតែអំពើល្អ រស់នៅក្នុងគុណធម៌ រស់នៅដោយមានសុជីវធម៌ជាមួយនឹងឥរិយាបទស្រគត់ស្រគំ និងរស់នៅដោយមានសីលធម៌សមរម្យដើម្បីជាកញ្ចក់ដ៍ល្អឆ្លុះទៅដល់សង្គមគ្រួសារនិងសង្គមជាតិរបស់យើង។ បន្ថែមពីនេះក៏ជាចំណែកមួយជួយផ្តល់ចំណេះដឹង បណ្តុះនូវសង្គហធម៌ ស្គាល់ពីបុណ្យបាប គុណទោស ចេះគោរពប្រតិបត្តិថ្នាក់ដឹកនាំ ម្តាយឪពុក ចាស់ព្រឹទ្ឋាចារ្យ លោកគ្រូអ្នកគ្រូ ផងទាំងពួងទៀតផង។
ឯកឧត្តម បណ្ឌិត ឡាច សំរោង សកលវិទ្យាធិការនៃសាកលវិទ្យាល័យឥន្ទ្រវិជ្ជា មានប្រសាសន៍ថា បុព្វបុរស និងប្រជាពលរដ្ឋខ្មែរគ្រប់ៗជំនាន់ គឺតែងតែប្រកាន់យកនូវជំហរកត្តញ្ញូ កត្តវេទីតាធម៌ តែងតែធ្វើការតបគុណ ដឹងគុណទៅដល់អ្នកដែលធ្លាប់បានធ្វើគុណមកលើខ្លួន។ ហេតុនេះក្នុងនាមយើងជានិស្សិត ជាធនធានមនុស្សដ៏មានសក្តានុពល ដើម្បីជួយជ្រោមជ្រែងប្រទេសជាតិឱ្យកាន់តែរីកចម្រើនលូតលាស់ទៅមុខថែមទៀត កុំភ្លេចថាខ្លួនយើងជាខ្មែរ ទោះទៅទីណាក៏ដោយត្រូវរក្សាឱ្យបានអត្តសញ្ញាណ ប្រពៃណីវប្បធម៌ ទំនៀមទំលាប់ជាតិខ្មែរត្រូវយកគំរូតាមលំអានបុព្វបុរសយើង និងរក្សាជំហរតាមពាក្យស្លោកថា ផឹកទឹកត្រូវនឹកដល់ប្រភព ជ្រកម្លប់ត្រូវនឹកដល់អ្នកដាំ ជារួម គឺត្រូវចេះដឹងគុណ គោរពតបគុណ និងចេះស្គាល់បុណ្យស្គាល់បាប ស្គាល់ល្អស្គាល់អាក្រក់នោះទើបសមជាកូនខ្មែរដែលធ្លាប់មានវប្បធម៌ និងអរិយធម៌រុងរឿងជាអ្នកកសាងអង្គរដ៏ល្បីល្បាញ។ ឯកឧត្តម ឡាច សំរោង បាបញ្ជាក់ថា នាពេលខាងមុខសាកលវិទ្យាល័យឥន្ទ្រវិជ្ជា នឹងចងសម្ព័ន្ឋមេត្រីភាពជាមួយខេមបូឌាថោន នៅរដ្ឋម៉ាស្សាឈូហ្សេត សហរដ្ឋអាមេរិក ដើម្បីចែករំលែកចំណេះដឹង អប់រំផ្នែកសាសនា និងវប្បធម៌ ហើយនឹងផ្តល់អាទិភាពដល់និស្សិតដែលមាននិទ្ទេសសិក្សាខ្ពស់ ដើម្បីទៅទស្សនកិច្ចសិក្សាជាមួយកូនខ្មែរនៅទីនោះ។
ព័ត៌មានជាតិ ថ្មីៗ
ក្នុងឱកាសនោះដែរ អនិជនខ្មែរទៅរស់នៅអាមេរិកជាង ៣០ឆ្នាំ លោកស្រី ផល្លីពង្សលក្ខិណា សាធុកា ប្រធានក្រុងខ្មែរឡូវេស(ខេមបូឌាថោន) រដ្ឋម៉ាស្សាឈូហ្សែត សហរដ្ឋអាមេរិក បានចែករំលែកបទពិសោធ និងការលំបាកជាច្រើនទម្រាំជោគជ័យ និងក្លាយខ្លួនជាស្ត្រីដឹកនាំកូនខ្មែរដែលរស់នៅទីនោះ។ លោកស្រី បានទៅរស់នៅអាមេរិកតាំងពីអាយុ៧ឆ្នាំ ប៉ុន្តែការនិយាយគឺនៅរក្សាសូរសៀងខ្មែរច្បាស់ និងនៅតែរក្សាអត្តសញ្ញាជាតិខ្មែរ ទាំងភាសា អក្សរ សម្លៀកបំពាក់ វប្បធម៌ប្រពៃណីទំនៀមទំលាប់ ជារួមអ្វីដែលជារបស់ខ្មែរគឺនៅដក់ជាប់ក្នុងចិត្តគ្រប់វេលាព្រោះដោយសារមានដើមកំណើតជាខ្មែរ។ លោកស្រីថា បុព្វបុរសខ្មែរមានឬសគល់ មានព្រលឹង និងអត្តសញ្ញាណច្បាស់លាស់ណាស់ តាមរយៈសាសនាសិល្បៈ វប្បធម៌ ប្រពៃណីទំនៀមទំលាប់ សុទ្ឋតែជាដួងព្រលឹងដ៏ពិសិដ្ឋរបស់ខ្មែរ ជាពិសេសភាសា និងអក្សរសាស្ត្រខ្មែរជាអត្តសញ្ញាណជាតិមួយដ៏សំខាន់ ដែលបុព្វបុរសដូនតាខ្មែរបានខិតខំបង្កើតឡើងទុកឱ្យកូនខ្មែរគ្រប់ៗជំនាន់។ កត្តាដែលនាំឱ្យយើងទទួលបានជោគជ័យ និងសម្រេចបានកិច្ចការធំៗ គឺការតាំងចិត្ត អំណត់ តស៊ូព្យាយាម និងមិនបោះបង់គោលដៅ ដោយឈរលើព្រហ្មវិហារធម៌ទាំង៤ មេត្តា ករុណា មុទិតា និងឧបេក្ខា៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
