នៅសាលាខេត្តសៀមរាប ថ្ងៃទី៦ ខែមីនា ឆ្នាំ២០២៣ ឯកឧត្តម ទៀ សីហា អភិបាលខេត្តសៀមរាប គ្រោងនឹងបង្កើតទីកន្លែងសម្រាប់ថែទាំកុមារជាកូនៗ របស់មន្ត្រី បុគ្គលិក កម្មករនៅសាលាខេត្តសៀមរាប ព្រមទាំងកន្លែងទទួលទានអាហារ ជាពិសេសមន្ត្រី បុគ្គលិក កម្មករ ដែលមានទីលំនៅឆ្ងាយ។
ការថ្លែងបែបនេះ ធ្វើឡើងនាឱកាសអបអរសាទរខួបលើកទី១១២ ទិវាអន្តរជាតិនារី ៨ មីនា ២០២៣ ក្រោមមូលបទ “រួមគ្នារក្សាសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល” និងជួបសំណេះសំណាលជាមួយមន្ត្រីជាស្ត្រី នៃសាលាខេត្តសៀមរាបប្រមាណ ១០០នាក់ ក្រោមអធិបតីឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោកជំទាវ ឯកឧត្តម ទៀ សីហា អភិបាលខេត្តសៀមរាប និងលោកជំទាវ។
ក្នុងឱកាសនោះដែរ ឯកឧត្តម អភិបាលខេត្ត បានគូសបញ្ជាក់ថា ការប្រារព្ធទិវាសិទ្ធិនារីអន្តរជាតិ ០៨មីនា នៅឆ្នាំនេះ មានគោលបំណងបញ្ជាក់ពីតម្លៃ នៃសមភាពយេនឌ័រ សម្រាប់ការអភិវឌ្ឍលើគ្រប់វិស័យ និងជំរុញគ្រប់ដៃគូរពាក់ព័ន្ធ បន្តអនុវត្តវិធានការ គោលនយោបាយ កម្មវិធី និងសកម្មភាពលើកកម្ពស់សមភាពយេនឌ័រ និង បង្កើនភាពអង់អាចដល់ស្ត្រី ក្នុងការចូលរួមស្តារសេដ្ឋកិច្ច សង្គម ក្រោយវិបត្តិកូវីដ-១៩ និង ការរស់នៅតាមគន្លងប្រក្រតីភាពថ្មី ក៏ដូចជាការកសាងភាពរឹងមាំ និងការអភិវឌ្ឍប្រកបដោយចីរភាព។ ឯកឧត្តម បន្ថែមថា ស្រ្តីជាឆ្អឹងខ្នង នៃការអភិវឌ្ឍន៍សេដ្ឋកិច្ចសង្គម ការងារបញ្ច្រាបយេនឌ័រ ជាកិច្ចការអន្តរវិស័យ ក្នុងការធានាចីរភាព នៃសន្តិភាព និងអភិវឌ្ឍដូចមានកំណត់នៅក្នុងយុទ្ធសាស្ត្រចតុកោណដំណាក់កាលទី៤ ដើម្បីកំណើនការងារសមធម៌ និងប្រសិទ្ធភាពក្នុងការកសាងមូលដ្ឋានឆ្ពោះទៅសម្រេចចក្ខុវិស័យកម្ពុជា ឆ្នាំ២០៣០ ជាប្រទេសដែលមានចំណូលមធ្យមកម្រិតខ្ពស់ និងនៅឆ្នាំ២០៥០ ជាប្រទេសមានចំណូលខ្ពស់ ។
ទន្ទឹមនោះ ឯកឧត្តម អភិបាលខេត្ត ក៏បានថ្លែងការកោតសរសើរ និង វាយតម្លៃខ្ពស់ចំពោះស្ត្រី នៃសាលាខេត្ត ដែលបានចូលរួមគ្រប់សកម្មភាព និងធ្វើឱ្យម្រេចបាននូវសមិទ្ធផលធំៗជាច្រើនក្នុងខេត្ត។
ក្នុងឱកាសអបអរសាទរខួបលើកទី១១២ ទិវាអន្តរជាតិនារី ៨ មីនា ២០២៣ ឯកឧត្តម ទៀ សីហា និង ឯកឧត្តមប្រធាន ក្រុមប្រឹក្សាខេត្ត បានឧបត្ថម្ភដល់អនុសាខាសមាគមនារីកម្ពុជា ដើមី្បសន្តិភាព និងអភិវឌ្ឍន៍សាលាខេត្ត នូវថវិកា ចំនួន២ពាន់ ដុល្លារសហរដ្ឋអាមេរិក ព្រមទាំងផ្តល់នូវវត្ថុអនុស្សាវរីយ៍ ដល់បងប្អូននារី ម្នាក់ៗទទួលបាន ក្រណាត់ហួល ២សំពត់ និង ក្រណាត់ប៉ាក់ ១អាវ ផងដែរ៕
អត្ថបទនិងរូបភាព ៖ សាលាខេត្តសៀមរាប
កែសម្រួលដោយ ៖ លោក សេង ផល្លី
