សមាគមសហគ្រិនស្ត្រីកម្ពុជា កាលពីរសៀលថ្ងៃទី០៥ ខែមីនា ឆ្នាំ២០២៣ បានប្រារព្ភវេទិកាស្ត្រីដើម្បីអ្នកទាំងអស់គ្នា ក្រោមប្រធានបទ “ស្ត្រី និងបុរសក្នុងភាពជាអ្នកដឹកនាំដ៏អស្ចារ្យ” ដើម្បីអបអរសាទរទិវានារី ៨មីនា និងការពិភាក្សាដោះស្រាយបញ្ហាស្ត្រី និងបុរសក្នុងភាពជាអ្នកដឹកនាំដ៏ល្អ។ ពិធីនេះប្រព្រឹត្តិទៅក្រោមអធិបតីភាពលោកជំទាវ ទាង អេង ទៀ សីហា ប្រធានកិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៏ខេត្តសៀមរាប រួមនឹងវត្តមានប្រធានសមាគមសហគ្រិនស្រ្តីកម្ពុជា, អគ្គនាយកសមភាពយេនឌ័រណិងអភិវឌ្ឍន៏សេដ្ឋកិច្ចក្រសួងកិច្ចការនារី រួមនឹងតំណាងស្ថាប័នអង្គភាពពាក់ព័ន្ធជាច្រើននាក់។
លោកជំទាវ ទាង អេង ទៀ សីហា មានប្រសាសន៍ថា វេទិកាស្ត្រីដើម្បីអ្នកទាំងអស់គ្នាក្រោមប្រធានបទ ស្ត្រី និងបុរសក្នុងភាពជាអ្នកដឹកនាំដ៏ល្អ ៨មីនា ដើម្បីអបអរសាទរទិវានារី នាពេលនេះ គឺជាការបង្ហាញពីសេចក្តីស្រឡាញ់ទៅកាន់អ្នកទាំងអស់គ្នា ក៏ដូចជាការផ្តល់តម្លៃឲ្យស្ត្រី និងបុរសក្នុងភាពជាអ្នកដឹកនាំដ៏ល្អសម្រាប់សង្គមជាតិទាំងមូល និងការកើនឡើងនៃតួនាទីរបស់សមាគមសហគ្រិនស្ត្រីកម្ពុជា ក្នុងការអភិវឌ្ឍសេដ្ឋកិច្ចនៅខេត្តសៀមរាប។ វេទិកាស្ត្រីដើម្បីអ្នកទាំងអស់គ្នានេះ នឹងធ្វើការពិភាក្សាដោយផ្តោតសំខាន់ៗ ទៅលើកត្តា ៣សំខាន់រួមមាន៖ ទី១.ការលើកម្ពស់ការយល់ដឹងឲ្យកាន់តែទូលំទូលាយស្តីពីសារៈសំខាន់នៃការចូលរួមរបស់សហគ្រាសខ្នាតតូច និងមធ្យមក្នុងការអភិវឌ្ឍសេដ្ឋកិច្ចប្រចាំថ្ងៃ, ទី២.ជំរុញតួនាទីនៃសមាគមសហគ្រិនស្ត្រីកម្ពុជាឲ្យកាន់តែសកម្មក្នុងវិស័យនេះ និងទី៣.បង្កើតជាបណ្តាញទំនាក់ទំនង ការផ្សារភ្ជាប់ផ្នែកធុរកិច្ចរួមគ្នា ដែលរួមចំណែកដល់ការកសាងសមាគមសហគ្រិនស្ត្រីកម្ពុជាឲ្យកាន់តែល្អប្រសើរថែមទៀត។
លោកជំទាវមានប្រសាសន៍ទៀតថា ដើម្បីចែករំលែកចំណេះដឹង និងបទពិសោធន៍ល្អៗក្នុងការលើកកម្ពស់ស្ថានភាព ឋានៈតួនាទី និងថែរក្សាគ្រួសារឱ្យមានសុភមង្គលនោះ គឺយើងត្រូវចេះជួយគ្នា ចេះផ្តល់តម្លៃឲ្យគ្នា មានការអធ្យាស្រ័យគ្នា មិនមានការរអើងរវាងគ្នានិងគ្នាឡើយ។ ក្នុងនោះស្រ្តីមេផ្ទះ ស្រ្តីដៃ១០០ ឬដៃ១០០០ មានន័យថា ស្ត្រីមានការទទួលខុសត្រូវខ្ពស់ក្នុងសុភមង្គលក្រុមគ្រួសារ មើលកូនផង មើលប្តីផង និងជួយមើលការងារឲ្យប្តីបន្ថែមទៀត មិនស្រួលដូចពាក្យគេថា ស្រ្តីវិលចង្ក្រានមិនជុំឡើយ។
មានប្រសាសន៍ក្នុងឱកាសនោះដែរ លោកជំទាវឧកញ៉ា កែវ មុំ ប្រធានសមាគមសហគ្រិនស្រ្តីកម្ពុជា បានបញ្ជាក់ថា នៅក្នុងប្រទេសកម្ពុជាយើងភាគច្រើនសុទ្ធសឹងជាស្រ្តី ដែលជាម្ចាស់អាជីវកម្ម សហគ្រាស ឬក៏ក្រុមហ៊ុនប្រមាណជាង ៦០%។ ហើយស្រ្តីក៏ជាមាតាពិភពលោកផងដែរ ព្រោះស្រ្តីអាចបង្កើតអ្វីៗ បានទាំងអស់ តែបើអត់បុរសក៏មិនអាចធ្វើអ្វីបានដែរ ស្ត្រីនិងបុរសជាគូរនិដគ្នា ស្ត្រី គឺជាអ្នកចេះកែច្នៃជីវិតឲ្យស្រស់បំព្រងបាន។ ដើម្បីចីរភាពនាពេលអនាគត ក្នុងគោលបំណងដើម្បីបញ្ជក់អំពីតម្លៃនៃការទទួលបាននូវភាពស្មើរគ្នារវាងស្ត្រី និងបុរសនោះ នៅក្នុងការអភិវឌ្ឍគ្រប់វិស័យ និងកៀរគដល់ដៃគូរពាក់ព័ន្ធ ក្នុងការបន្តចូលរួមអនុវត្តនូវវិធានការផ្នែកទៅតាមគោលនយោបាយ និងសកម្មភាពនៅក្នុងការលើកម្ពស់សិទ្ធិស្មើភាពគ្នា និងតួនាទីរបស់ស្ត្រីនៅក្នុងការអភិវឌ្ឍសេដ្ឋកិច្ច និងសង្គមជាតិប្រកបដោយចីរភាពជាដើម។
លោកជំទាវ បញ្ជាក់ទៀតថា ការដឹកនាំនិងគ្រប់គ្រងរបស់ស្ត្រី ក៏មានភាពខុសប្លែកគ្នាពីបុរសខ្លះៗដែរ គឺបុរសមានភាពរឹងមាំជាងស្ត្រីក្នុងការដឹកនាំស្ថាប័ន ឬក្រុមហ៊ុនជាដើម ប៉ុន្តែបើបុរសយើងរឹង ស្ត្រីត្រូវតែទន់ ទើបអាចប្រព្រឹត្តិទៅបាន តែបើស្រ្តីរឹង បុរសត្រូវទន់វិញទើបប្រសើរ បើមិនដូច្នោះទេ គឺមិនអាចរកភាពជោគជ័យបានឡើយ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
