នៅថ្ងៃទី៨ ខែមីនា ឆ្នាំ២០២៣ នាបរិវេណអនុវិទ្យាល័យអង្គរធំ ស្រុកអង្គរធំ ខេត្ដសៀមរាប មានរៀបចំពិធីអបអរទិវានារីអន្ដរជាតិ ៨មីនា ក្រោមប្រធានបទ ស្ដ្រីរួមគ្នារក្សាសុខសន្ដិភាព ដើម្បីកិច្ចអភិវឌ្ឍន៍ក្នុងយុគសម័យឌីជីថល ដែលមានសិស្សានុសិស្សលោកគ្រូអ្នកគ្រូ និងប្រជាពលរដ្ឋប្រមាណ ១០០នាក់។
លោក ពៅ ប៊ុន ធឿន អភិបាលស្រុកអង្គរធំ ក៏បានលើកឡើងផងដែរថា សុខសន្តិភាពពិតជាមានសារៈសំខាន់ណាស់ សម្រាប់ការអភិវឌ្ឍន៍លើគ្រប់វិស័យ ផ្ទុយទៅវិញ ជម្លោះ និងអំពើហិង្សា គឺជាឧបសគ្គនៃវឌ្ឍនភាព សេដ្ឋកិច្ចសង្គមរបស់ប្រទេសជាតិ ជាពិសេស អំពើហិង្សាលើស្រ្តី គឺជាការរំលោភសិទ្ធិមនុស្ស និងប៉ះពាល់ជាអវិជ្ជមានយ៉ាខ្លាំងទៅលើធនធានស្រ្តី មិនតែប៉ុណ្ណោះកូនរបស់ពួកគេ ក៏នឹងទទួលរងនូវផលវិបាក នៃការរំលោភសិទ្ធិ និងអំពើហិង្សានេះជាបន្តបន្ទាប់ទៅអនាគត។
អញ្ជើញជាអធិបតីក្នុងឱកាសនោះ ឯកឧត្ដម ផៃ សុខខេង នាយករងខុទ្ធកាល័យ សម្ដេចពិជ័យសេនាទៀ បាញ់ លើកឡើងថា សម្រាប់ជនជាតិខ្មែរ សិទ្ធិនារី មិនមែនទើបតែនៅសម័យទំនើនេះទេ គឺតាំងពីសម័យបុរាណមកម្ល៉េះ។ ហើយការអបអរទិវានារីអន្ដរជាតិ ៨មីនានាពេលនេះ ជាការដាស់សតិស្មារតី ឲ្យមនុស្សគ្រប់រូបក្នុងសង្គម ផ្ដល់សិទ្ធិក្នុងការចូលរួម និងសម្រេចចិត្ត ឱ្យបានដូចបុរសដែរ។ ជាពិសេសនោះ គឺធ្វើយ៉ាងណា កុំឲ្យស្ត្រីនៅតែក្លាយជាជនរងគ្រោះ នៃអំពើរើសអើងផ្លូវភេទ និងហិង្សាគ្រប់រូបភាព។ ឯកឧត្ដម បន្ថែមថា ក្រៅពីការផ្ដល់សិទ្ធិសេរីភាព ដល់ស្ត្រី រាជរដ្ឋាភិបាលកម្ពុជា ក៏បាននិងកំពុង ជំរុញ និងលើកទឹកចិត្តដល់ស្ត្រី បង្កើនសមត្ថភាព និងក្លាយជាថ្នាក់ដឹកនាំដូចបុរសផងដែរ។
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
