ក្រុមគ្រូពេទ្យវេជ្ជសាស្រ្តចិនបុរាណ និងមន្ទីរសុខាភិបាលខេត្តសៀមរាប ថ្ងៃទី០៩ ខែមីនា ឆ្នាំ២០២៣ម្សិលមិញនេះ រៀបចំពិនិត្យ ព្យាបាលជំងឺ ជូនពលរដ្ឋក្នុងខេត្តសៀមរាបដោយឥតគិតថ្លៃ រយៈបេលពេញ១ថ្ងៃ ក្នុងគោលបំណងលើកកម្ពស់ការថែរក្សាសុខភាព និងចូលរួមកាត់បន្ថយចំណាយក្នុងការព្យាបាលជំងឺ ដែលមានប្រជាពលរដ្ឋប្រមាណជាង ២០០នាក់ មកពីសង្កាត់ស្វាយដង្គំ ក្រុងសៀមរាប ខេត្តសៀមរាបមកទទួលសេវា។
លោក លីវ ជីជៀ (LIU ZHI JIE) អគ្គកុងស៊ុលចិនប្រចាំខេត្តសៀមរាប មានប្រសាសន៍ថា ក្រុមគ្រូពេទ្យញវិជ្ជសាស្រ្តចិនបុរាណ ដែលមានអ្នកជំនាញចំនួន ១៦នាក់ មកពីទីក្រុងប៉េកាំង នៃប្រទេសចិន ឯកទេសជំនាញ ផ្នែកជំងឺផ្លូវដង្ហើម ផ្នែកជំងឺសសៃឈាមបេះដូង ផ្នែកជំងឺប្រព័ន្ធរំលាយអាហារជាដើម ដែលបានរៀបចំកម្មវិធីពិនិត្យសុខភាព និងព្យាបាលជំងឺដោយឥតគិតថ្លៃ ជូនដល់ប្រជាពលរដ្ឋកម្ពុជាបានចំនួន ៨១ដង ដែលមានអ្នកមកទទួលព្យាការបាលជំងឺបានចំនួន១២០០០នាក់ដោយឥតគិតថ្លៃ។
ក្នុងឱកាសនោះដែរ លោកវេជ្ជបណ្ឌិត អ៊ាប ប៊ុនលឿន អនុប្រធានមន្ទីរសុខាភិបាលខេត្តសៀមរាប មានប្រសាសន៍ថា ដោយមានកិច្ចសហប្រតិបត្តការល្អរវាងប្រទេសកម្ពុជា និងចិន ពិសេសទំនាក់ទំនងសហប្រតិបត្តការជាមួយរដ្ឋបាលខេត្តសៀមរាប ក៏ដូចជាមន្ទីរសុខាភិបាលខេត្ត មន្ទីរពេទ្យខេត្ត ដោយកន្លងមកបានរៀបចំកម្មវិធីមនុស្សធម៌ ក្នុងការពិគ្រោះព្យាបាលជំងឺដោយឥតគិតថ្លៃ។ ជាក់ស្ដែងថ្ងៃនេះ កុងស៊ុលចិនប្រចាំខេត្តសៀមរាប បាននាំយកមកនូវឧបករណ៍បរិក្ខាពេទ្យ ថ្នាំពេទ្យ គ្រូពេទ្យឯកទេសជំនាញមកជួយព្យាបាល ជូនប្រជាពលរដ្ឋក្នុសង្កាត់ស្វាយដង្គំ។ ក្នុងនាមមន្ទីរសុខាភិបាលសូមថ្លៃងអំណរគុណដល់ក្រុមគ្រូពេទ្យ ចិននិងខ្មែរ ដែលបានចំណាយពេលវេលា និងកម្លាំកាយចិត្តក្នុងការព្យាបាលជំងឺដោយឥតគិតថ្លៃជូនដល់ប្រជាពលរដ្ឋ៕
អត្ថបទ និងអត្តបទ៖ លោក ជា ស្រស់
កែសម្រួល៖ លោក អ៊ុន ណារាជ្យ