ស្ថិតក្នុងស្រុកប្រាសាទបាគង ខេត្តសៀមរាប នាថ្ងៃទី១០ ខែមីនា ឆ្នាំ២០២៣ ឯកឧត្តម ឧត្តមសេនីយឯក គង់ ប៊ុនលី មេបញ្ជាការរងអង្គរក្ស តំណាងដ៏ខ្ពង់ខ្ពស់ ឯកឧត្តមនាយឧត្តមសេនីយ៍ផ្កាយមាស៤ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង ខ.ភ.ម និងជាមេបញ្ជាការដ្ឋានអង្គរក្ស សម្តេចតេជោ ហ៊ុន សែន នាយករដ្ឋមន្ត្រី បាននាំយកស្បៀងអាហារ មានដូចជាអង្ករចំនួន ១០តោន, មី ២០កេសធំ និងត្រីខ ២០កេសធំ ជាអំណោយដ៏ថ្លៃថ្លា របស់ ឯកឧត្តម នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង ប្រគល់ជូន ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងមេបញ្ជាការយោធភូមិភាគទី៤ ដើម្បីឧបត្ថម្ភ និងទំនុកបំរុងដល់កងកម្លាំង ដែលបានខិតខំប្រឹងប្រែងសហការចុះជួយលើកដាក់សម្ភារ: ផ្ទះសម្បែងជូនបងប្រជាពលរដ្ឋ ដែលបានស្ម័គ្រចិត្តរុះរើលំនៅឋានចេញពីតំបន់រមណីយដ្ឋានអង្គរ និងដឹកជញ្ជូនទៅកាន់តំបន់អភិវឌ្ឍថ្មីរុនតាឯក។
ឯកឧត្តម ឧត្តមសេនីយឯក គង់ ប៊ុនលី បាននាំយកប្រសាសន៍ផ្តាំផ្ញើសួរសុខទុក្ខពីសំណាក់ឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ដែលជានិច្ចកាលឯកឧត្តម តែងតែគិតគូរពីសុខទុក្ខ និងភាពហត់នឿយរបស់កងកម្លាំងប្រដាប់អាវុធនៅគ្រប់ទីកន្លែង។ឯកឧត្តម គង់ ប៊ុនលី ក៏បានជំរុញលើកទឹកចិត្តដល់មេបញ្ជាការ មេបញ្ជាការរង និងយោធិនគ្រប់រូប នៅក្នុងយោធភូមិភាគតី៤ ឱ្យបន្តរក្សារឹតចំណងសាមគ្គីភាពផ្ទៃក្នុងអង្គភាព ពង្រឹងសហការជិតស្និទ្ធជាមួយអាជ្ញាធរមានសមត្ថកិច្ច និងកងកម្លាំងប្រដាប់អាវុធទាំងអស់ ដើម្បីរួមគ្នាដោះស្រាយ និងជួយធុរ:គ្នាទៅវិញទៅមកក្នុងគ្រាចាំបាច់ ត្រូវរក្សាភាពម៉ឹងម៉ាត់ គោរពបទបញ្ជា វិន័យយោធា ចូលរួមបង្កបង្កើនផលឱ្យបានសស្រាក់សស្រាំក្នុងអង្គភាពក៏ដូចជាប្រជាពលរដ្ឋក្នុងមូលដ្ឋាន។ ឯកឧត្តម ឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ បានសម្តែងនូវក្តីរំភើបនិងអរគុណយ៉ាងជ្រាលជ្រៅចំពោះឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង មេបញ្ជាការដ្ឋានអង្គរក្ស ដែលបានគិតគូរយកចិត្តទុកដាក់ពីសុខទុក្ខដល់កងកម្លាំងយោធាក្នុងភូមិភាគទី៤។
ឯកឧត្តម មានប្រសាសន៍ថា៖គ្រឿងឧបភោគបរិភោគទាំងនេះនឹងបែងចែកជូនដល់កងកម្លាំងដែលបានខិតខំ និងចូលរួមសហការក្នុងការលើកដាក់ឥវ៉ាន់ សម្ភារ:ផ្សេងៗជូនបងប្អូនប្រជាពលរដ្ឋ ដែលរស់នៅក្នុងតំបន់អង្គរហើយពួកគាត់បានស្ម័គ្រចិត្តរុះរើលំនៅឋានទៅរស់នៅតំបន់អភិវឌ្ឍថ្មីរុនតាឯក ក្នុងស្រុកបន្ទាយស្រី។ ឯកឧត្តម បញ្ជាក់ថា៖ ក្រោយពីទទួលបាននូវអនុសាសន៍ក៏ដូចជាបទបញ្ជាដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី យោធភូមិភាគទី៤ បានចាត់ និងបែងចែកកម្លាំងដោយបានសហការជាមួយអាជ្ញាធរជាតិអប្សរា អាជ្ញាធរដែនដី ដើម្បីជួយលើកដាក់សម្ភារ: ផ្ទះសម្បែងជូនបងប្អូនប្រជាពលរដ្ឋ ដែលរស់នៅក្នុងតំបន់អង្គរហើយពួកគាត់បានស្ម័គ្រចិត្តរើលំនៅឋានទៅរស់នៅតំបន់អភិវឌ្ឍថ្មីរុនតាឯក ក្នុងស្រុកបន្ទាយស្រី តាំងតែពីថ្ងៃទី០៥ ខែវិច្ឆិកា ឆ្នាំ២០២២មកម្ល៉េះ៕
ព័ត៌មានជាតិ ថ្មីៗ
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
