នៅព្រឹកថ្ងៃទី១០ ខែមីនា ឆ្នាំ២០២៣នេះ ប្រជាពលរដ្ឋចំនួន ៧៥គ្រួសារ ដែលមកពីសង្កាត់ស្លក្រាម សង្កាត់គោកចក និងសង្កាត់នគរធំ ដែលបានរស់នៅបណ្តោះអាសន្នលើដីសាធារណៈរបស់រដ្ឋ បានមកធ្វើចាប់ឆ្នោតទទួលយកដីឡូតិ៍ និងលំនៅឋានសម្បទានសង្គមកិច្ចដែលស្ថិតនៅក្នុងភូមិវាល សង្កាត់សំបួរ ក្រុងសៀមរាប ខេត្តសៀមរាប បានទទួលអំណោយពីអង្គការលំនៅឋានមនុស្សជាតិកម្ពុជា។
លោក អឹប អ៊ាន់ ប្រធានផ្នែកប្រតិបត្តិកម្មវិធីនៃអង្គការលំនៅឋានមនុស្សជាតិកម្ពុជា មានប្រសាសន៍ថា អង្គការលំនៅឋានមនុស្សជាតិកម្ពុជា តាមរយៈគម្រោង លំនៅឋានសង្គមកិច្ចសម្រាប់ពលរដ្ឋដែលតាំងទីលំនៅបណ្តោះអាសន្ន លើដីសាធារណៈរបស់រដ្ឋក្នុងក្រុងសៀមរាប គឺគម្រោងនេះអនុវត្តរួមគ្នារវាងរដ្ឋបាលខេត្តសៀមរាប និងអង្គការលំនៅឋានមនុស្សជាតិកម្ពុជា ដោយមានការគាំទ្រពីអគ្គនាយកដ្ឋានលំនៅឋានក្រសួងរៀបចំដែនដី នគរូបនីយកម្ម និងសំណង់ និងបានការគាំទ្រមូលនិធិពីអង្គការលំនៅឋានមនុស្សជាតិ ដែលមានប្រភពជំនួយប្រទេសសឹង្ហបុរី ប្រទេសហូឡង់ ព្រមទាំងបានសាងសង់លំនៅឋានថ្មីដែល សាងសង់ជាផ្ទះភ្លោះ ទំហំសរុប ៧ម៉ែត្រគុណ ៧.៥ម៉ែត្រ មានបង្គន់អនាម័យ ដោយចំណាយថវិកាចំនួន ១៣.០០០ដុល្លារក្នុងខ្នងផ្ទះនីមួយៗ ហើយដោយក្នុង១ខ្នងផ្ទះគឺសម្រាប់ប្រគល់ជូនចំនួន ២គ្រួសារ។
លោក អឹប អ៊ាន់ បានបន្ថែមទៀតថា អង្គការលំនៅឋានមនុស្សជាតិកម្ពុជាក៍មានគម្រោងភ្ជាប់បណ្តាញទឹកភ្លើងជូនដល់គ្រួសារនីមួយៗ ហើយសាសង់ទីធ្លាសាធារណៈ និងកែលម្អរផ្លូវគ្រួសក្រហមក្នុងទីតាំងគម្រោង និងសាងសង់បណ្តាញលូទឹកភ្លៀងក្នុងទីតាំងគម្រោងផងដែរ។ ក្នុងនោះដែរអង្គការលំនៅឋានមនុស្សជាតិកម្ពុជា ក៍មានគម្រោងផ្តល់វគ្គបណ្តុះបណ្តាលចំណេះដឹងមូលដ្ឋានអំពីពីច្បាប់ដីធ្លីនានា ជាពិសេសសារាចរ០៣ ផ្តល់វគ្គបណ្តុះបណ្តាលបង្កើតមុខរបរ និងទទួលទុនខ្នាតតូច ដើម្បីចាប់ផ្តើមមុខរបរ ការបណ្តុះបណ្តាលផ្សេងទៀត ដូចជាការថែទាំផ្ទះ អនាម័យទឹកស្អាត និងការសម្អាតបរិស្ថានល្អនិងគម្រោងនឹងបង្កើតឲ្យមានក្រុមសន្សំផងដែរ។
ព័ត៌មានជាតិ ថ្មីៗ
នៅក្នុងឱកាសនោះដែរ លោក ចឹក គឹមជុន នាយករងរដ្ឋបាលសាលាខេត្តសៀមរាប បានមានប្រសាសន៍ថា ក្រោមការដឹកនាំរបស់សម្ដេចតេជោ ហ៊ុន សែន រាជរដ្ឋាភិបាលមានគោលនយោបាយជាតិបានដោះស្រាយនូវបញ្ហាលំនៅឋានដោយកសាងលំនៅឋានមានតម្លៃសមរម្យសំរាប់បងប្អូនប្រជាពលរដ្ឋ ដែលមានជីវភាពក្រីក្រពិតប្រាកដនិងអ្នកដែលមិនមានលទ្ធភាពជាដើម។ ចំពោះគម្រោងដីឡូតិ៍នេះ មានទីតាំងស្ថិតនៅក្នុងភូមិវាល សង្កាត់សំបួរ ក្រុងសៀមរាប ដែលមានរដ្ឋបាលខេត្តជាម្ចាស់គម្រោង និងអង្គការលំនៅឋានមនុស្សជាតិកម្ពុជា ជាដៃគូសហការគាំទ្រ ផ្នែកបច្ចេកទេស និងផ្នែកហិរញ្ញវត្ថុ សម្រាប់ជួយសាងសង់ លំនៅឋានជូន ក្រុមគ្រួសារគោលដៅដែលពួកគាត់ពីមុននៅក្នុងសង្កាត់គោកចក សង្កាត់ស្លក្រាមនិងសង្កាត់នគរធំ ក្រុងសៀមរាប ដែលបានរស់នៅលើចំណីផ្លូវ ៣៨ខ្សែ និងមាន ទីលំនៅបណ្តោះអាសន្ន លើដីសាធារណៈរបស់រដ្ឋ ហើយអាជ្ញាធរខេត្តក៍បានធ្វើការសម្របសម្រួលដីធ្លីឱ្យពួកគាត់ មករស់នៅក្នុងទីតាំងនេះវិញ។
លោក ចឹក គឹមជុន ក៍បានសំដែងការអបអរសាទរ ដល់បងប្អូនប្រជាពលរដ្ឋទាំង ៧៥គ្រួសារ ដែលទទួលបានដីឡូត៍មានសាងសង់លំនៅឋាននៅទីតាំងថ្មី តាមការរៀបចំរបស់រដ្ឋបាលខេត្ត ហើយក៏បានទទួលនូវបង្កាន់ដៃ និងកិច្ចសន្យារួចរាល់ហើយនៅពេលនេះ ដើម្បីរក្សាទុកជាភស្តុតាងបញ្ជាក់អំពីសិទ្ធិស្របច្បាប់របស់បងប្អូន។ ក្នុងនាមរដ្ឋបាលខេត្ត លោកក៍បានថ្លែងអំណរគុណដល់ប្រជាពលរដ្ឋ ដែលបានចូលរួមសហការជាមួយរដ្ឋបាលខេត្ត ដែលពុំមានបញ្ហាអ្វីកើតឡើង ហើយការដោះស្រាយនេះ គឺដើម្បីខេត្តរបស់យើងដែលបងប្អូនទទួលបានលំនៅឋានស្របច្បាប់ និងដីស្របច្បាប់។ លោកមានជំនឿយ៉ាងមុតមាំថា ក្រោយពីបានរៀបចំទីលំនៅឋានជូនដល់បងប្អូន ៧៥គ្រួសារនាពេលនេះ គឺជាការរួមចំណែកយ៉ាងសំខាន់ ក្នុងការកាត់បន្ថយ ការតាំងលំនៅឋាន មិនរៀបរយ ដើម្បីឈានដល់ការលុបបំបាត់ បញ្ហាសំណង់បណ្ដោះអាសន្ន ក្នុងក្រុងរបស់យើង បន្តិចម្ដងៗផងដែរ៕
អត្ថបទ និងអត្តបទ៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
