អភិបាលខេត្តសៀមរាប ឯកឧត្តម ទៀ សីហា បានធ្វើការអំពាវនាវដល់អ្នកទេសចរ និងអ្នកវិនិយោគរបស់ជប៉ុន ចូលមកកម្ពុជាបន្ថែមទៀត ដើម្បីទស្សនា និងធ្វើការវិនិយោគផ្សេងៗ។
ឯកឧត្តមអភិបាលខេត្តសៀមរាប លើកឡើងបែបនេះ កាលពីរាត្រីថ្ងៃទី១០ ខែមីនា ឆ្នាំ២០២៣ ក្នុងពិធីជប់លៀងអបអរសាទរបុណ្យចម្រើនព្រះជន្មាយុគម្រប់ ៦២យាងចូល៦៣ព្រះវស្សារបស់ព្រះចៅ ណារូ ហ៊ីតុ ព្រះចៅអធិរាជនៃប្រទេសជប៉ុន ដែលរៀបចំឡើងដោយស្ថានឯកអគ្គរាជទូតជប៉ុនប្រចាំកម្ពុជា និងការិយាល័យកុងស៊ូលជប៉ុនប្រចាំខេត្តសៀមរាប នៅសណ្ឋាគារសុខាខេត្តសៀមរាប។
ឯកឧត្តម ទៀ សីហា បានសម្ដែងនូវអំណរសាទរយ៉ាងក្រៃលែងជាមួយរដ្ឋាភិបាល និងប្រជាជននៃប្រទេសជប៉ុនទាំងមូលដែល កន្លងមកតែងតែបានជួយឧបត្ថម្ភគាំទ្រគ្រប់បែបយ៉ាងដល់ប្រជាជន និងរាជរដ្ឋាភិបាលកម្ពុជា ជាពិសេសបានចូលរួមការពារនូវ អធិបតេយ្យភាព ឯករាជ្យភាព បុព្វហេតុនៃការបង្រួបបង្រួមជាតិ និងសន្តិភាពនៅកម្ពុជា។ ឯកឧត្តម បន្តថា កម្ពុជា ក្រោមការដឹកនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី ទំនាក់ទំនង និងកិច្ចសហប្រតិបត្តិការរវាងកម្ពុជា និងប្រទេសដៃគូសម្ព័ន្ធមេត្រីភាព ពិសេសជប៉ុនត្រូវបានលើកកម្ពស់មួយកម្រិតធំបន្ថែមទៀត។ ផ្តើមចេញពីលទ្ធផល នៃកិច្ចសហប្រតិបត្តិការទ្វេភាគី រវាងព្រះរាជាណាចក្រកម្ពុជា និងប្រទេសជប៉ុន, ភាគីជប៉ុន បាននឹងកំពុងជួយលើគ្រប់វិស័យ ដល់ព្រះរាជាណាចក្រកម្ពុជា។
ព័ត៌មានជាតិ ថ្មីៗ
ដោយឡែកខេត្តសៀមរាប ក៏បានទទួលនូវអត្ថប្រយោជន៍ទំនាក់ទំនងតាមការកសាងហេដ្ឋារចនាសម្ព័ន្ធរូបវ័ន្ត ការបណ្តុះបណ្តាលធនធានមនុស្ស កសិកម្ម ការអភិរក្ស ជួលជុលប្រាសាទបុរាណ ជាពិសេសគម្រោងទីក្រុងឆ្លាតវៃក្នុងខេត្តសៀមរាប ហើយថ្មីៗនេះក៏បានសាង សង់អគារបន្ថែមក្នុងមន្ទីរពេទ្យបង្អែកខេត្តផងដែរ។ ក្នុងនោះខេត្តសៀមរាប បានបង្កើតនូវបំណងសម្ព័ន្ធមេត្រីភាពជាមួយខេត្ត ក្រុង នៃប្រទេសជប៉ុនចំនួន ០៤ខេត្ត-ក្រុងទៀតផង។ ឯកឧត្តមអភិបាលខេត្ត ក៏បានថ្លែងអបអរសាទរចំពោះប្រទេសប៉ុន ដែលឆ្នាំក្រោយនឹងត្រូវធ្វើជាសហប្រធាន ICC Angkor ជាមួយបារាំង នេះជាឱកាសជួយដល់ការអភិវឌ្ឍន៍ អភិរក្ស ប្រាសាទនានាក្នុងរមណីយដ្ឋានអង្គរ និងទូទាំងខេត្ត សៀមរាប។
ជាមួយនឹងទំនាក់ទំនងរវាងប្រទេសទាំងពីរ កម្ពុជា ជប៉ុន មានការរីកចម្រើន ឯកឧត្តម បានអំពាវនាវដល់អ្នកទេសចរ និងអ្នកវិនិយោគរបស់ប្រទេសជប៉ុន ចូលមកកម្សាន្ត និងស្វែងរកឱកាសបណ្តាក់ទុននៅកម្ពុជាបន្ថែមទៀត។
ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំព្រះរាជាណាចក្រកម្ពុជា ឯកឧត្ដម អ៊ូអ៊ីណុ អាត់ហ្ស៊ូស៊ី មានប្រសាសន៍ថា ឆ្នាំនេះជាឆ្នាំខួបទី៧០នៃការបង្កើតទំនាក់ទំនងការទូតរវាងប្រទេសកម្ពុជា និងជប៉ុន ហើយនេះជាលើកដំបូងដែរ ដែលបានរៀបពិធីលៀងសាយភោជន៍នៅខេត្តសៀមរាប ដើម្បីអបអរសាទរបុណ្យចម្រើនព្រះជន្មរបស់ព្រះចៅអធិរាជជប៉ុន។ ឯកឧត្តម បន្តថា ទំនាក់ទំនង និងកិច្ចសហប្រតិបត្តិការ ជប៉ុន និងកម្ពុជា បានក្លាយទៅជាភាពដៃគូយុទ្ធស្ត្រគ្រប់ជ្រុងជ្រោយ ហើយកិច្ចសហប្រតិបត្តិការរវាងប្រទេសទាំងពីរនាពេលនេះគ្របដណ្តប់លើវិស័យសន្តិសុខ សេដ្ឋកិច្ច វប្បធម៌ និងការផ្លាស់ប្តូរទៅវិញទៅមករវាងប្រជាជន និងប្រជាជន។
ក្នុងរយ:ពេលជាង ៣ទសវត្សចុងក្រោយនេះ ទំនាក់ទំនងការទូតរវាងកម្ពុជា ជប៉ុន ត្រូវបានពង្រឹងពង្រីក ឱ្យកាន់តែរឹងមាំ និងស៊ីជម្រៅឈានដល់កម្រិត ” ភាពជាដៃគូយុទ្ធសាស្ត្រគ្រប់ជ្រុងជ្រោយ” ។ ប្រទេសជប៉ុន បានចូលរួមយ៉ាងសកម្មក្នុងដំណើរការចរចាររកសន្តិភាពសម្រាប់កម្ពុជា តាំងពីទសវត្សឆ្នាំ១៩៩០ ជប៉ុននាំមុខគេក្នុងការផ្តល់ជំនួយសម្រាប់ដំណើរការបោះឆ្នោតសកល និងអសកលជាបន្តបន្ទាប់ រួមចំណែកយ៉ាងសំខាន់ក្នុងការលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។ ជប៉ុន បានផ្តល់ជំនួយយ៉ាងច្រើនក្នុងការស្តារ និងកសាងវិស័យសំខាន់ៗ ដូចជាវិស័យគមនាគមន៍ វិស័យកសិកម្ម វិស័យអប់រំ និងសុខាភិបាល ។ល។
ព្រមជាមួយនោះ ក៏បានផ្ដល់ជំនួយនាំមុខគេក្នុងការងារបោសសំអាតមីន និងអាវុធយុទ្ធភ័ណ្ឌមិនទាន់ផ្ទុះ ដែលធ្វើឲ្យអត្រាស្លាប់ ដោយសារមីន និងអាវុធយុទ្ធភ័ណ្ឌមិនទាន់ផ្ទុះ ពីមួយឆ្នាំទៅមួយឆ្នាំបានថយ ចុះជាលំដាប់កាត់បន្ថយបាននូវជនពិការ ស្ត្រីមេម៉ាយ កុមារកំព្រា ព្រមទាំង រំដោះផ្ទៃដីបានរាប់ម៉ឺនហិកតា ផ្ដល់ជូនប្រជាជនសម្រាប់សង់លំនៅដ្ឋាន និងបង្កបង្កើនផល រួមចំណែកឱ្យកិច្ច អភិវឌ្ឍន៍សេដ្ឋកិច្ចសង្គមរបស់កម្ពុជា បានរីកចម្រើនយ៉ាងឆាប់រហ័ស៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
