អ្នកគ្រប់គ្រងបណ្ណាល័យ នៅខេត្ដសៀមរាប បានលើកឡើងថា ការអានសៀវភៅរបស់យុវជន ក៏ដូចជាប្រជាពលរដ្ឋខ្មែរ និងអន្ដរជាតិ នៅតាមបណ្ណាល័យ មានការកើនឡើងពីមួយថ្ងៃទៅមួយថ្ងៃ ខណ:ដែលរាជរដ្ឋាភិបាល បានរៀបចំទិវាអំណានជារៀងរាល់ឆ្នាំ ដើម្បីបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងការតែងនិពន្ធរួមចំណែកការងារ និងពង្រឹងវប្បធម៌ខ្មែរ។
កញ្ញា ព្រឿង សុខឃីម ជំនួយការបណ្ណារក្ស នៅបណ្ណាល័យមជ្ឍមណ្ឌលខេមរសិក្សា ស្ថិតនៅក្រុងសៀមរាប មានប្រសាសន៍ថា បច្ចុប្បន្ននេះ អ្នកចូលអានសៀវភៅនៅតាមណ្ណាល័យនេះ មានយ៉ាងតិច ១០០នាក់ក្នុងមួយថ្ងៃៗ ពួកគាត់ជាសិស្ស អ្នកនិពន្ធ មគ្គុទេសក៍ អ្នកស្រាវជ្រាវ ព្រមទាំងប្រជាពលរដ្ឋខ្មែរ និងជនបរទេសផងដែរ។ កញ្ញា បានបន្ដថា អ្នកចូលអានសៀវភៅភាគចច្រើន ជាសិស្សជិតប្រឡង។ កញ្ញា បន្ថែមថា កំណើននៃការអាននេះ ដោយពួកគាត់គិតថាការអានសៀវភៅមានអត្ថប្រយោជន៍ច្រើន ជាពិសេសធ្វើឱ្យធនធានមនុស្សកាន់តែកើនឡើង។ កញ្ញាអំពាវដល់យុវជនខ្មែរចូលរួមអានសៀវភៅឱ្យបានច្រើននៅតាមបណ្ណាល័យ ព្រោះការអានច្រើនជួយបណ្ដុះគំនិតថ្មីៗ និងសិក្សាស្រាវជ្រាវផ្នែកចំណេះដឹងបានច្រើន ដែលខុសពីការអានតាមទូរស័ព្ទ។
លោក ហួន ហេន ជាគ្រូបង្រៀនសាលាឯកជនខេត្ដសៀមរាប បានឱ្យដឹងថាលោក ក៏ជាយុវជនម្នាក់ចូលចិត្ដអានសៀវភៅនៅតាមបណ្ណាល័យដែរ ព្រោះការអានសៀវភៅបានធ្វើឱ្យចំណេះដឹងរបស់លោកកាន់តែកើនឡើងជាបន្ដបន្ទាប់ ។ លោក បានបន្ដថា ការទម្លាប់អានសៀវភៅនេះ ជាចំណុចវិជ្ជមានមួយសម្រាប់ឱ្យយុវជនមានទម្លាប់ល្អ ហើយ និងមានចំណេះដឹងសម្រាប់យកទៅបំរើសង្គមជាតិ។ លោក បានបន្ដថា តាមការកត់សំគាល់បច្ចុប្បន្ននេះ មានយុវជនជន និងអ្នកសិក្សាជាច្រើនចូលចិត្ដអានសៀវភៅ ភាគច្រើនការអានសៀវភៅនៅថ្ងៃសៅរិ៍ និងថ្ងៃអាទិត្យ។ លោក បន្ថែមថា នៅខេត្ដសៀមរាប មានការបង្កើតនូវបណ្ណាល័យច្រើនកន្លែងទាំងនៅតាមសាលារៀនរបស់រដ្ឋ និងឯកជន នៅតាមសហគមន៍ និងមានបង្កើតបណ្ណាល័យចល័តផងដែរ។ ទោះជាយ៉ាងលោកបានអំពាវនាវដល់រាជរដ្ឋាភិបាលឱ្យជួយបង្កើតវេទិការអានសៀវភៅ កម្មវិធីអំណានឱ្យបានច្រើន ដើម្បីបំផុសគំនិតយុវជន សិស្សានុសិស្សឱ្យចូលចិត្ដអានសៀវភៅ ដើម្បីចំណេះដឹងដល់ពួកគាត់ ព្រោះសង្គមត្រូវអ្នកមានចំណេះដឹងសម្រាប់អភិវឌ្ឍន៍ប្រទេសជាតិ។
ព័ត៌មានជាតិ ថ្មីៗ
លោក លី ប៊ុនណា ប្រធានមន្ទីរអប់រំ យុវជន និងកីឡា មានប្រសាសន៍ទទួលស្អាល់ថា ខេត្ដសៀមរាប អ្នកអានសៀវភៅមានការកើនឡើងជាបន្ដបន្ទាប់ ព្រោះខេត្ដនេះ លោកបានជម្រុញ ឱ្យមានបណ្ណាល័យជាច្រើនកន្លែងទាំងនៅតាមគ្រឹះស្ថានសិក្សារបស់រដ្ឋ និងឯកជន ព្រមទាំងនៅតាមសហគមន៍ សម្រាប់បំរើដល់ការអានរបស់ប្រជាពលរដ្ឋ។ លោកបន្ដថា នៅថ្ងៃ១១ មីនានេះ ខេត្ដសៀមរាប បង្កើតការអានសៀវភៅនៅតាមសាលារៀន ដើម្បីអបអរទិវាអំណានលើកទី៨ ដើម្បីបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងការតែងនិពន្ធរួមចំណែកការងារ និងពង្រឹងវប្បធម៌ខ្មែរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
