រដ្ឋមន្ត្រីក្រសួងវប្បធម៌ និងវិចិត្រសិល្ប: លោកជំទាវ ភឿង សកុណា បានលើកឡើងថា តាំងពីយូរលង់មកហើយ ក្រៅពីប្រាសាទបុរាណ ដូនតាខ្មែរ បានបន្សល់ទុកនូវមរតកជាច្រើន សម្រាប់កូនចៅជំនាន់ក្រោយ។ ដូច្នេះការបណ្តុះបណ្តាលជំនាញមរតកពីដូនតានេះ ពិតជាសំខាន់ខ្លាំងណាស់។
លោកជំទាវរដ្ឋមន្ត្រី បានលើកឡើងបែបនេះ នៅក្នុងឱកាសដែលអញ្ជើញជាអធិបតីក្នុងពិធីបើកជាផ្លូវការនៃមជ្ឈមណ្ឌលបណ្តុះបណ្តាលសិប្បកម្មកម្ពុជា ( ហៅកាត់ថា សច្ច: ) ក្នុងក្រុងសៀមរាប នាព្រឹកថ្ងៃទី១១ ខែមីនា ឆ្នាំ២០២១។
លោកជំទាវ ភឿង សកុណា បានលើកឡើងថា នៅក្នុងឆ្នាំ២០២៤ រាជរដ្ឋាភិបាលកម្ពុជា បានដាក់ចេញនូវគោលនយោបាយបណ្តុះបណ្តាលជំនាញវិជ្ជាជីវ:ចំនួន ១លាន៥សែននាក់ ក្នុងនោះពី ២ទៅ៤% ជាការបណ្តុះបណ្តាលជំនាញមរតកពីដូនតា ដូចជា តម្បាញ ស្មូន ចម្លាក់ជាដើម។ លោកជំទាវ បន្តថា ជំនាញដូនតាទាំងអស់នេះ បើមិនមានការបណ្តុះបណ្តាលទេ វានឹងបាត់ពីមួយជំនាន់ទៅមួយជំនាន់។
លោកជំទាវ បន្ថែមថា៖ ផលិតផលរបស់ខ្មែរគឺពឹងលើសិប្បករតាមរយ:ជំនាញ និងបំណិន ជាអ្នកច្នៃប្រឌិត សម្រេចឱ្យលេចចេញជាផលិតផលដ៏ល្អៗ ហើយផលិតផលល្អៗទាំងនោះ មិនត្រឹមតែល្បីក្នុងស្រុកទេ តែក៏អាចនឹងល្បីល្បាញលើឆាកអន្តរជាតិទៀតផង។
អគ្គនាយកមជ្ឈមណ្ឌលបណ្តុះបណ្តាលសិប្បកម្មកម្ពុជា ( សច្ច: ) លោកព្យែ អង់ដ្រេ (Pierre Andre) បានឲ្យដឹងថា មជ្ឈមណ្ឌលនេះបានធ្វើការបណ្តុះបណ្តាលមុខជំនាញសិប្បកម្មចំនួន ១១មុខផ្សេងៗគ្នា ដូចជា ចម្លាក់ឈើ ចម្លាក់ថ្ម តម្បាញ ខ្មុក ជាដើម។ លោក ថា នៅទីនេះ យើងបានផ្តោតសំខាន់លើការបណ្តុះបណ្តាលសិប្បករខ្មែរ ឲ្យពួកគាត់មានភាពម្ចាស់ការលើខ្លួនឯង និងអាចគ្រប់គ្រងអាជីវកម្មដោយខ្លួនឯងផងដែរ។ លោកអង់ដ្រេ បន្តថា នៅសៀមរាប វាជាការចាប់ផ្តើម ប៉ុន្តែវានឹងបន្តមាននៅតាមបណ្តាខេត្តនានាទូទាំងប្រទេសកម្ពុជា ស្របតាមប្រសាសន៍របស់សម្តេចតេជោ ប្រមុខរាជរដ្ឋាភិបាល ដែលជានិច្ចកាលសម្តេចតែងតែងជំរុញឲ្យមានការបណ្តុះបណ្តាលវិជ្ជាជីវ:នៅគ្រប់ទិសទី។លោក Pierre Andre បន្ថែមថា៖ ពេលនេះ មជ្ឈមណ្ឌលសច្ច:បាសម្រេចតាមក្តីបំណង ដោយបានបង្កើតអាជីវកម្មបែបសិប្បកម្មប្រកបដោយនិរន្តរភាព និងសមស្របតាមតម្រូវការរបស់សិប្បករ តាមរយ:ការច្នៃប្រឌិតតាមបែបសហសម័យ ដើម្បីរំលេចស្នាដៃថ្មី មានគុណភាពខ្ពស់ ប៉ុន្តែអនុលោមទៅតាមលំអាន ក្បាច់ចម្លាក់ សិល្ប:ប្រពៃណីបុរាណ និងជាស្នាដៃរបស់ហត្ថកររបស់កូនខ្មែរពិតប្រាកដ៕ អត្ថបទ និងរូបភាព: លោកយូ វង្ស និងលោកជា ស្រស់។ កែសម្រួលដោយ លីវ សុខុន!!! 
