ភូមិចំនួន៣ ស្ថិតក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប ត្រូវបានអាជ្ញាធរខេត្តសៀមរាប ដាក់ស្នើទៅកាន់រាជរដ្ឋាភិបាល ដើម្បីធ្វើការកាត់ឆ្វៀលដីចេញពី តំបន់៣ ដែលជាតំបន់អភិរក្សបឹងទន្លេសាប និងផ្ដល់សិទ្ធិដល់ប្រជាពលរដ្ឋអាចអាស្រ័យផលបាន សម្រាប់លើកកម្ពស់ជីវភាពប្រចាំថ្ងៃ។ នេះបើតាមការលើកឡើងរបស់ លោក ពិន ប្រាកដ អភិបាលរងខេត្តសៀមរាប ក្នុងឱកាសដែលក្រុមគ្រូស្ម័គ្រចិត្ត នៃសមាគមមនុស្សធម៌ឈឹងអ៊ីសាន់សៀហួយ មកពីកោះតៃវ៉ាន់ ប្រទេសចិន ចុះពិនិត្យ និងព្យាបាលជំងឺទូទៅតាមបែបបុរាណចិន ដោយឥតគិតថ្លៃ និងចែកអំណោយសប្បុរសធម៌ ជូនប្រជាពលរដ្ឋ ព្រមទាំងចែកសម្ភារសិក្សាដល់សិស្សានុសិស្ស ស្ថិតក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប សរុបចំនួន ១០២០គ្រួសារ។
លោក ពិន ប្រាកដ បន្ថែមថា ក្រោមការយកចិត្តទុកដាក់ របស់សម្ដេចតេជោ ហ៊ុន សែន ដីដែលគ្រោងនឹងកាត់ឆ្វៀលនេះ នឹងជាមរតករបស់បងប្អូនប្រជាពលរដ្ឋសម្រាប់អ្នកជំនាន់ក្រោយ និងមានសិទ្ធិប្រើប្រាស់តាមតម្រូវការ។ លើសពីនោះ ក្នុងនាមជាអ្នកតំណាងឱ្យប្រជាជនក្នុងខេត្តសៀមរាប ឯកឧត្តម អ្នកឧកញ៉ា បណ្ឌិត សៀង ណាំ បានកសាងសមិទ្ធផលជាច្រើនក្នុងឃុំកំពង់ភ្លុកនេះ តួយ៉ាង អណ្ដូងទឹកស្អាត ស្ដារព្រែក មណ្ឌលសុខភាព និងជួយដល់អ្នករងគ្រោះមហន្តរាយជាច្រើនទៀត។
ព័ត៌មានជាតិ ថ្មីៗ
អញ្ជើញជាអធិបតីក្នុងឱកាសនោះ ឯកឧត្តម អ្នកឧកញ៉ា បណ្ឌិត សៀង ណាំ បានថ្លែងអំណរគុណដល់ ក្រុមគ្រូស្ម័គ្រចិត្ត កោះតៃវ៉ាន់ ដែលតែងតែចូលរួមជាមួយរាជរដ្ឋាភិបាលកម្ពុជា ដើម្បីលើកកម្ពស់សុខុមាលភាពប្រជាជនក្នុងខេត្តសៀមរាប ក៏ដូចជានៅទូទាំងប្រទេសរយៈពេលកន្លងមកនេះ។ ឯកឧត្តម បន្ថែមថា ក្រោមការដឹកនាំរបស់សម្ដេចតេជោ ហ៊ុន សែន ប្រជាជននៅទូទាំងប្រទេសបានជួបសន្តិភាពពិតប្រាកដ និងប្រទេសជាតិមានការរីកច្រើនទៅមុខយ៉ាងឆាប់រហ័សលើគ្រប់វិស័យ។
ឯកឧត្តម អ្នកឧកញ៉ា បញ្ជាក់ថា ក្នុងនាមជាអ្នកតំណាងឱ្យបងប្អូនប្រជាពលរដ្ឋទាំងអស់ ឯកឧត្តម តែងតែនៅរួមសុខរួមទុក្ខជាមួយបងប្អូនជានិច្ច គិតមកដល់បច្ចុប្បន្នមានរយៈពេល ២៥ឆ្នាំមកហើយ។ ដូច្នេះ សូមបងប្អូនប្រជាពលរដ្ឋទាំងអស់ បន្តជឿជាក់លើការដឹកនាំរបស់សម្ដេចតេជោ ហ៊ុន សែន និងនាំគ្នាទៅបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ឱ្យបានគ្រប់ៗគ្នា។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
