នៅថ្ងៃទី១៤ ខែមីនា ឆ្នាំ២០២៣នេះ រដ្ឋបាលឃុំចំនួន២ គឺឃុំស្វាយចេក និងឃុំជប់តាត្រាវ ក្នុងស្រុកអង្គរធំ ខេត្តសៀមរាប បានបើកការដេញថ្លៃនៅសាងសង់អាគារផលិតចំណីសត្វចំនួន ២ខ្នង បានប្រព្រឹត្តិទៅដោយរលូន និងមានភាពល្អប្រសើរ ដែលមានគណៈកម្មការលទ្ធកម្មឃុំទាំង២ និងអាជ្ញាធរពាក់ព័ន្ធជាច្រើននាក់បានចូលរួម។
សូមជម្រាបថា កិច្ចលទ្ធកម្មរបស់គម្រោងលាបនៃរដ្ឋបាលសាលាខេត្ត្តសៀមរាប គឺចាប់ផ្តើមទទួលសំណើរដេញថ្លៃនៅម៉ោង ០៩:៣០នាទីព្រឹក និងពេលវេលាឈប់ទទួលសំណើរដេញថ្លៃនៅម៉ោង ០៩:៤០នាទីព្រឹក។ ក្នុងនោះមានក្រុមហ៊ុនបានដាក់សំណើរដេញថ្លៃ នៅឃុំស្វាយចេកចំនួន ៣ក្រុមហ៊ុន និងឃុំជប់តាត្រាវចំនួន ៤ក្រុមហ៊ុន សរុប ៧ក្រុមហ៊ុន។ បន្ទាប់មកគណៈកម្មការលទ្ធកម្មទាំង២ បានធ្វើការបើកស្រង់តម្លៃដាក់លើក្រដាសផ្ទាំងឆាតដែលក្រុមហ៊ុននីមួយៗ បានដាក់ក្នុងសំណើរដេញថ្លៃ ហើយគណៈកម្មការលទ្ធកម្មឃុំបានពិនិត្យ និងវាយតម្លៃទៅលើសំណើររបស់ក្រុមហ៊ុននីមួយៗ ដែលមានតម្លៃទាបជាងគេទើបជ្រើសរើសយក។
លោក ឈួន ឯម ប្រធានគណ:កម្មការលទ្ធកម្មឃុំស្វាយចេក បានឲ្យដឹងថា ដំណើរការដេញថ្លៃគឺធ្វើឡើងដោយត្រឹមត្រូវ មិនមានការខ្សឹបខ្សៀវ មិនហួសម៉ោង មិនមានការលាក់លៀមខ្សឹបខៀវ ដើម្បីកេញប្រវ៉ាញ់ថវិការដ្ឋនោះទេ គឺធ្វើទៅតាមច្បាប់ ទៅតាមគោលការរបស់រដ្ឋត្រឹមត្រូវ។ ក្រោយពីយើងបានពិនិត្យធ្វើការវាយតម្លៃរួចមក ពាក់ព័ន្ធសំណើរដេញថ្លៃនីមួយៗ គឺមានសុពលភាពគ្រប់គ្រាន់ដែលអាចទទួលយកបាន ហើយគណៈកម្មលទ្ធកម្មឃុំបានធ្វើការប្រកាសលទ្ធផលដល់ក្រុមហ៊ុន ដែលទទួលបានជោគជ័យក្នុងការដាក់សំណើរដេញថ្លៃនេះតែម្តង។
ជាមួយគ្នានោះដែរ លោក ឆេង ឆុង ប្រធានគណ:កម្មការលទ្ធកម្មឃុំជប់តាត្រាវ ក៏បានទទួលស្គាល់ថា រាល់គណៈកម្មការលទ្ធកម្មឃុំទាំងអស់ នៅក្នុងកិច្ចដំណើរការនៃការអនុវត្តនីតិវិធីនៃកិច្ចលទ្ធកម្ម ចាប់តាំងពីពេលដំណើរការរហូតដល់ការប្រកាសលទ្ធផល នៃការដេញថ្លៃ គឺពុំមានបាតុភាពអសកម្មណាមួយមិនប្រក្រតីឡើយ នៅក្នុងបរិវេននិងទីកន្លែងនៃកិច្ចប្រជុំបើកសំណើដេញថ្លៃនោះទេ ដោយពុំមានការរារាំងការបង្ខិតបង្ខំដល់អ្នកទទួលការឬក្រុមហ៊ុន ដែលបានចូលរួមដាក់សំណើរដេញថ្លៃនោះដែរ។ ដោយឡែកការពិនិត្យរបស់គណៈកម្មការលទ្ធកម្មគម្រោងលាបឃុំ និងការអនុត្តនិតិវិធីលទ្ធកម្ម ជាទូទៅយើងតែងតែអនុវត្តកិច្ចលទ្ធកម្មដោយសន្តិវិធី ដោយជោគជ័យ និងតម្លាភាពខ្ពស់។ ប្រសិនបើយើងត្រួតពិនិត្យឃើញថា អ្នកទទួលការអនុវត្តមិនត្រឹមត្រូវទៅតាមលក្ខណៈបច្ចេកទេស និងកិច្ចសន្យានានានោះ គឺយើងតម្រូវអោយអ្នកទទួលការអនុវត្តគម្រោងនោះត្រូវតែធ្វើការឡើងវិញតាមលក្ខណៈបច្ចេកទេស ដែលបានចុះក្នុងកិច្ចសន្យាទើបរដ្ឋបាលសង្កាត់សម្រេចទូទាត់ថវិកា ក្នុងការអនុវត្តគម្រោងដល់អ្នកទទួលការដែលបានអនុវត្តនោះជាដើម៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
