នាព្រឹកថ្ងៃទី១៦ ខែមីនា ឆ្នាំ២០២៣នេះ លោកជំទាវ ញ៉ឹក ស៊ីម សមាជិកកាក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមកម្ពុជាខេត្តសៀមរាប និង សហការី បានអញ្ជើញជួបសំណេះសំណាល និងនាំយកអំណោយនុស្សធមជូនអ្នកផ្ទុកមេរោគអេដស៍ចំនួន១៥នាក់ ក្នុងនោះស្រីចំនួន១១នាក់ មកពីឫស្សីលក ឃុំសង្វើយ ឃុំគោកធ្លកក្រោម និងឃុំកំពង់ក្ដី ក្នុងស្រុកជីក្រែង ដែលក្នុងម្នាក់ៗទទួលបាន៖ អង្ករ៣០គីឡូក្រាម មុង១ ភួយ១ សារុង១ ក្រមា១ មី១កេស ត្រីខ១យួរ និងថវិកា៥ម៉ឺនរៀល ។
នាក្នុងឱកាសនេះលោកជំទាវ ញ៉ឹក ស៊ីម បានពាំនាំការសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការសាខា។
លោកជំទាវបន្តថា ដើម្បីជួយសម្រាលទុក្ខលំបាក ក៏ដូចជាសុខទុក្ខរបស់បងប្អូនអ្នកផ្ទុកមេរោគអេដស៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា តែងបានចាត់ក្រុមការងារឥស្សរជនឆ្នើមថ្នាក់ជាតិ សាខាខេត្តសៀមរាប ជួបសួរសុខទុក្ខជាបន្តបន្ទាប់ ដែលនេះបង្ហាញពីការយកចិត្តទុកដាក់ខ្ពស់បំផុតពីសំណាក់ថ្នាក់ដឹកនាំ។
លោកជំទាវក៏បានផ្ដាំផ្ញើដល់បងប្អូនអ្នកផ្ទុកមេរោគអេដស៍ និងអ្នកជំងឺអេដស៍ សូមថែរក្សាសុខភាពផ្ទាល់ខ្លួន រស់នៅមានអនាម័យ និងទៅទទួលសេវាថែទាំ និងព្យាបាលដោយថ្នាំប្រឆាំងមេរោគអេដស៍ទៀងទាត់ នៅមណ្ឌលសុខភាព ឬមន្ទីរពេទ្យបង្អែកខេត្តសៀមរាប តាមការណាត់របស់លោកគ្រូពេទ្យ ៕
អត្ថបទ និងរូបភាព៖ សាខាកាកបាទក្រហមកម្ពុជាខេត្តសៀមរាប
កែសម្រួល៖ លោក លីវ សាន្ត
