នៅថ្ងៃទី២០ខែមីនាឆ្នាំ២០២៣ គណៈកម្មាធិការសម្របសម្រួលអន្តរជាតិសម្រាប់ការអភិរក្ស និងការលើកតម្លៃព្រះវិហារ ហៅកាត់ថា ICC Preah Vihear បានរៀបចំសន្និសីទអន្តរជាតិពិសេសមួយ ស្តីពីតំបន់បេតិកភណ្ឌព្រះវិហារ និងកោះកេរ នៅខេត្តសៀមរាប ដែលអញ្ជើញជាអធិបតីពី លោកជំទាវ ឌីវីយ៉ានី អ៊ូតា ខបប្រាន (Divyani Utar Khobrante) អគ្គរដ្ឋទូតឥណ្ឌាប្រចាំនៅកម្ពុជា ជាសហប្រធាន និងលោកស្រី ស៊ូ យី (Zhu Ye) អគ្គនាយករងទទួលបន្ទុកការផ្លាស់ប្តូរ និងសហប្រតិបត្តិការនៃរដ្ឋបាលវប្បធម៌ និង បេតិកភណ្ឌចិន ជាសហប្រធាន និងតំណាងរដ្ឋសមាជិកចំនួន ៤ប្រទេសផ្សេងទៀត ព្រមទាំងមានការចូលរួមពីស្ថាប័នជាតិ និងអន្តរជាតិ អាជ្ញាធរជាតិអប្សរា អាជ្ញាធរជាតិសំបូរព្រៃគុក អ្នកស្រាវជ្រាវជាតិ និងអន្តរជាតិ សរុបប្រមាណ ១០០នាក់។
សន្និសីទអន្តរជាតិពិសេសនេះធ្វើឡើង ដើម្បីអបអរសាទរខួប១៥ឆ្នាំ នៃការចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក(២០០៨-២០២៣) និងខួប ១០ឆ្នាំនៃការបង្កើត ICC Preah Vihear (២០១៤-២០២៣) ។
យោងតាមសេចក្ដីប្រកាសព័ត៌មាន នៃសន្និសីទអន្តរជាតិពិសេសនេះ មានគោលដៅបូកសរុបលទ្ធផល នៃការងារអភិរក្ស និងជួសជុល ប្រាសាទព្រះវិហារ និងកោះកេរ ក្នុងរយៈពេល១០ឆ្នាំ ក្រោមយន្តការរបស់ ICC Preah Vihear.ព្រមទាំងការងារសំខាន់ៗមួយចំនួនទៀត ដែលអាជ្ញាធរជាតិព្រះវិហារបានអនុវត្តន៍កន្លងមក រួមមាន ការកំណត់ផែនទីហានិភ័យនៃប្រាសាទព្រះវិហារទាំងមូល ការអន្តរាគមន៍ទល់ទ្រតាមកន្លែង ដែលមានហានិភ័យខ្ពស់ចំនួនជាង៣០កន្លែង ការជួសជុលបង្គោលផ្កាឈូកនៅលើស្ពានហាលគោបុរៈទី២ និងទី៤ និងការស្តារប្រព័ន្ធបង្ហូរទឹកបុរាណតាមបណ្ដោយប្រាសាទព្រះវិហារ ដើម្បីទប់ស្កាត់ការខូចខាតដោយសារទឹកភ្លៀងជាដើម។ ជាមួយគ្នានេះដែរ ក្នុងក្របខណ្ឌ ICC-Preah Vihear អាជ្ញាធរជាតិព្រះវិហារបានទទួលបានការគាំទ្រ និង ការចូលរួមពីបណ្ដាប្រទេសមួយចំនួនដូចជា សហរដ្ឋអាមេរិក ដែលបាននិងកំពុងផ្តល់ថវិកាជួយជួសជុល និងអភិរក្សជណ្តើរបុរាណខាងជើងចាប់តាំងពីឆ្នាំ២០១៨កន្លងមក។ ជាមួយនោះ ប្រទេសឥណ្ឌាក៏បានចាប់ផ្ដើមការងារអភិរក្សនៅគោបុរៈទី៥។ ចំណែកប្រទេសចិន នឹងចាប់ផ្តើមការងារអភិរក្សនៅគោបុរៈទី១, ២ និង៣ និងប្រទេសប៊ែលហ្សិកបានជួយក្នុងការបោសសម្អាតមីន និងរៀបចំប្រព័ន្ធគ្រប់គ្រងទិន្នន័យ សម្រាប់អាជ្ញាធរជាតិព្រះវិហារ។
ព័ត៌មានជាតិ ថ្មីៗ
ចំពោះសន្និសីទអន្តរជាតិពិរសសរនះ ក៏នឹងពិភាក្សាដកស្រង់បទពិសោធន៍សម្រាប់ការងារគ្រប់គ្រង កាលានុវត្តភាព និងបញ្ហាប្រឈម ក្នុងតំបន់បេតិកភណ្ឌពិភពលោកនៅតំបន់អាមេរិកកណ្ដាល តំបន់មជ្ឈិមបូព៌ា ដើម្បីផ្ដល់ជាគំនិតដល់ការគ្រប់គ្រងបេតិកភណ្ឌពិភពលោកនៅកម្ពុជា។ សន្និសីទនេះ ក៏មានការចូលរួមពីអ្នកជំនាញអន្តរជាតិក្នុងការសិក្សា និងវាយតម្លៃអំពីហានិភ័យដែលបង្កឡើងដោយកត្តាមនុស្ស និងកត្តាធម្មជាតិនៅក្នុងតំបន់ បេតិកភណ្ឌព្រះវិហារ និងកោះកេរផងដែរ។
សូមបញ្ជាក់ថា សន្និសីទនេះដែរ អាជ្ញាធរជាតិព្រះវិហារ ក៏បានរៀបចំដាក់តាំងពិព័រណ៍សមិទ្ធផលការងាររយៈពេល ១៥ឆ្នាំ ដែលបង្ហាញពីលទ្ធផលនៃការអភិរក្សនៅក្នុងតំបន់បេតិកភណ្ឌព្រះវិហារ និងកោះកេរ ចាប់តាំងពីឆ្នាំ ២០០៨ ដល់ឆ្នាំ ២០២៣៕
អត្ថបទ និងរូបភាព៖ លោក បូ សាវី និងលោក យូ វង្ស
កែសម្រួល៖ លោក សេង ផល្លី
