ដើម្បីផ្ដល់ចំណេះដឹងផ្នែកហិរញ្ញវត្ថុ និងឱកាសកាន់តែប្រសើរដល់ប្រជាជនកម្ពុជា ដែលមានអត្ថប្រយោជន៍កាន់តែច្រើនដល់សេដ្ឋកិច្ចរបស់ប្រទេសកម្ពុជា នៅថ្ងៃទី១៩ ខែមីនា ឆ្នាំ២០២៣ ក្រុមហ៊ុន ភីភីលីង ស៊ីឃ្យួរឹធី រួមជាមួយក្រុមហ៊ុន ខេមបូឌាន ដេរីវ៉េទីវ អ៊ិចឆេង និងក្រុមហ៊ុន ហ្គោលវែល ខាភីថល បានសហការបើកសិក្ខាសាលាផ្សព្វផ្សាយទាក់ទងនឹងទីផ្សារមូលបត្រក្នុងស្រុក នៅខេត្តសៀមរាប វត្តមានលោក នាក់ ណេរ៉ុន អភិបាលរងខេត្ដ រួមនឹងវត្តមានលោកលោកស្រី តំណាងស្ថាប័នពាក់ព័ន្ធជាច្រើននាក់។
លោក នាក់ ណេរ៉ុន មានប្រសាសន៍ថា ចំពោះក្រុមហ៊ុនដែលបានបើកសិក្ខាសាលាផ្សព្វផ្សាយទាក់ទងនឹងទីផ្សារមូលបត្រក្នុងស្រុក គឺមានអត្ថប្រយោជន៍នៃទីផ្សារហិរញ្ញវត្ថុ និងវិធីសាស្រ្ដក្នុងការចាប់ផ្តើមចូលរួមក្នុងទីផ្សារ ក្នុងគោលបំណងដើម្បីផ្តល់ការអប់រំផ្នែកហិរញ្ញវត្ថុឱ្យកាន់តែទូលំទូលាយ និងស៊ីជម្រៅ ទាក់ទងនឹងទីផ្សារមូលបត្រក្នុងស្រុក ទីផ្សារឧបករណ៍និស្សន្ទដែលពេញនិយមនៅទូទាំងពិភពលោក និងព័ត៌មានសំខាន់ៗផ្សេងទៀតទាក់ទងនឹងការវិនិយោគជាដើម។ សិក្ខាសាលានេះនឹងអាចជួយលើកកម្ពស់ចំណេះដឹងផ្នែកហិរញ្ញវត្ថុរបស់ប្រជាពលរដ្ឋ និងធ្វើបច្ចុប្បន្នភាពការយល់ដឹងរបស់ពួកគាត់មុននឹងចូលរួមក្នុងដំណើរវិនិយោគនាពេលអនាគត។
លោកបានបន្តថា បងប្អូនអាជីវករ និងសហគ្រាសនានា និងប្អូនៗនិស្សិតក្នុងខេត្តសៀមរាប យើងគួរតែចាប់យកឱកាសនេះ ហើយលោកសង្ឃឹមថា ពាក់ព័ន្ធនិងព័ត៍មានរបស់ក្រុមហ៊ុនទាំងនេះ ដែលវាគ្មិន ឬក៏ឯកឧត្តម អស់លោក នឹងធ្វើបទបង្ហាញពីផ្នែកហិរញ្ញវត្ថុឱ្យកាន់តែទូលំទូលាយ និងស៊ីជម្រៅ ទាក់ទងនឹងទីផ្សារមូលបត្រក្នុងស្រុក។ ចំពោះការរកស៊ីរបស់បងប្អូន សំខាន់គឺទុន ជាមូលធនធំៗក្តី ឬក៏យើងកម្ចីពីធានាគារ ដើម្បីយកមកវិនិយោគទុននោះ អញ្ចឹងទីផ្សារមូលបត្រនេះ វាជាផ្នែកមួយដែលយើងប្រមូលទុនយកចេញពីស្រោមខ្នើយ ចេញពីក្រោមកន្ទេលមួយកាក់មួយសេន ដើម្បីយកទៅឲ្យអ្នកមានគំនិតដែលគាត់បានគិតឆ្លាតឆ្លៀសវៃក្នុងការរកស៊ី ឬវិនិយោគនោះ ដល់ពេលបានផលចំណេញ់ គឺយើងម្ចាស់លុយក៏បានដែរ។
នៅក្នុងវគ្គធ្វើបទបង្ហាញ លោកស្រី មាស សុម៉ាលីន អនុប្រធានការិយាល័យត្រួតពិនិត្យ និងរក្សាទុកមូលបត្រ នៃ ន.ម.ក បានបង្ហាញពីវឌ្ឍនភាពនៃទីផ្សារហិរញ្ញវត្ថុរបស់កម្ពុជាថា ការចុះបញ្ជីនៃក្រុមហ៊ុនចំនួន ៩ មកពីស្ថាប័នសាធារណៈ និងឯកជន នៅផ្សារមូលបត្រកម្ពុជាសម្រាប់សាធារណជនវិនិយោគ បានរួមចំណែកដល់ស្ថិរភាពសេដ្ឋកិច្ចកម្ពុជា។ ជាក់ស្ដែង គិតត្រឹមឆ្នាំ២០២២ ន.ម.ក បានទទួលចុះបញ្ជីលេខអត្តសញ្ញាណវិនិយោគិនថ្មីចំនួន ៣៥ ៩៦៨ នាក់ ជាមួយនឹងទំហំជួញដូរកើនឡើង ១០២,៥% បើធៀបនឹងឆ្នាំ២០២១។ «សម្រាប់ទីផ្សារឧបករណ៍និស្សន្ទវិញ វាក៏ជាប្រភេទនៃការវិនិយោគមួយយ៉ាងសំខាន់ ដែលបានជួយដល់ទាំងបុគ្គល និងក្រុមហ៊ុនសាជីវកម្មក្នុងការវិនិយោគដើមទុនរបស់ខ្លួន។ នៅឆ្នាំ២០២២ តម្លៃនៃការជួញដូរឧបករណ៍និស្សន្ទសរុបកើនដល់ ១,២៦ ពាន់លានរៀល ឬប្រហែល ៣១៤,៩៦ លានដុល្លារសហរដ្ឋអាមេរិក»។
លោក ជា សុធា អគ្គនាយក និងអភិបាលកិច្ចនៃក្រុមហ៊ុន ភីភី លីង ស៊ីឃ្យួរឹធី និងជាវាគ្មិនកិត្តិយសមួយរូប បានគូសបញ្ជាក់ពីមោទកភាពរបស់ក្រុមហ៊ុនក្នុងការរៀបចំព្រឹត្តិការណ៍អប់រំជាច្រើនកន្លងមក ដូចជា៖ សិក្ខាសាលាតាមបណ្ដាខេត្ដ-ក្រុង វគ្គបណ្ដុះបណ្ដាល ការតាំងពិព័រណ៍ និងកម្មវិធីជាច្រើនទៀត ដែលសុទ្ធសឹងតែជាផលប្រយោជន៍សម្រាប់ប្រជាជនកម្ពុជា និងសម្រាប់កំណើនសេដ្ឋកិច្ចជាតិ។ «ការអប់រំ គឺជាគ្រឹះនៃគ្រប់វិស័យ ដើម្បីភាពរីកចម្រើនប្រកបដោយចីរភាព នេះជាមូលហេតុដែលយើងមកទីនេះ និងនៅកន្លែងផ្សេងៗទៀត ម្តងហើយម្តងទៀត ដើម្បីផ្ដល់ការអប់រំដល់សាធារណជនអំពីការវិនិយោគ និងអ្វីដែលយើងគួរអនុវត្ត សម្រាប់ការបង្កើនចំណេះដឹង និងការអនុវត្តការវិនិយោគដ៏ជោគជ័យ៕
អត្ថបទ និងរូបភាព៖ លោក ស៊ាន សុផាត
