នៅវេលាម៉ោងប្រមាណជាង៣រសៀល ថ្ងៃទី២២ ខែមីនា ឆ្នាំ២០២៣នេះ ព្រះអគ្គិជ័យកីឡា និង ភ្លើងគប់កីឡា បានចាកចេញពីខេត្តសៀមរាប នៃប្រទេសកម្ពុជា តាមយន្តហោះពិសេសឆ្ពោះទៅកាន់ទីក្រុងហាហូយ នៃប្រទេសវៀតណាមហើយ បន្ទាប់ពីពិធីដង្ហែព្រះអគ្គិជ័យកីឡា និង ភ្លើងគប់កីឡា ពីវត្តរាជបូណ៌ ក្នុងក្រុងសៀមរាប ឆ្ពោះមកកាន់ព្រលានយន្តហោះអន្តរជាតិសៀមរាប ក្រោមវត្តមានឯកឧត្ដម ទៀ សីហា អភិបាលខេត្តសៀមរាប ដោយមានការចូលរួមពីសំណាក់ឯកឧត្ដម លោកជំទាវ លោក លោកស្រី ជាប្រធានក្រុមប្រឹក្សាខេត្ត សមាជិកក្រុមប្រឹក្សាខេត្ត អភិបាលរងខេត្ត និង មន្ត្រីអ្នកមុខអ្នកការសំខាន់ៗក្នុងខេត្ត ព្រមទាំងមានការចូលរួមអបអរសាទរ ឈរតាមដងផ្លូវសម្រាប់ពិធីដង្ហែព្រះអគ្គិជ័យកីឡា និង ភ្លើងគប់កីឡា ពីវត្តរាជបូណ៌ឆ្ពោះមកកាន់ព្រលានយន្តហោះអន្តរជាតិសៀមរាប ពីសំណាក់លោកគ្រូអ្នកគ្រូ សិស្សានុសិស្ស និង ប្រជាពលរដ្ឋក្នុងក្រុងសៀមរាបយ៉ាងច្រើនកុះករ ។
សូមបញ្ជាក់ថា ព្រះអគ្គិជ័យកីឡា នឹងធ្វើដំណើរឆ្ពោះទៅការបណ្តាប្រទេសនានាក្នុងតំបន់អាស៊ាន ដោយមានការរៀបចំពិធីពិធីដង្ហែព្រះអគ្គិជ័យកីឡា និង ភ្លើងគប់កីឡា នៅតាមទីក្រុងសំខាន់ៗនៃប្រទេនីមួយៗផងដែរ ក្នុងនោះ ៖ ថ្ងៃទី២២ ខែមីនា ចាកចេញពីប្រទេសកម្ពុជា ឆ្ពោះទៅកាន់ប្រទេសវៀតណាម , ថ្ងៃទី២៥ ខែមីនា ចាកចេញពីប្រទេសវៀតណាម ឆ្ពោះទៅកាន់ប្រទេសហ្វីលីពីន , ថ្ងៃទី២៨ ខែមីនា ចាកចេញពីប្រទេសហ្វីលីពីន ឆ្ពោះទៅកាន់ប្រទេសប៊្រុយណេ , ថ្ងៃទី៣១ ខែមីនា ចាកចេញពីប្រទេសប៊្រុយណេ ឆ្ពោះទៅកាន់ប្រទេសឥណ្ឌូនេស៊ី , ថ្ងៃទី០៤ ខែមេសា ចាកចេញពីប្រទេសឥណ្ឌូនេស៊ី ឆ្ពោះទៅកាន់ប្រទេសទីម័រ ឡេស្ត , ថ្ងៃទី០៨ ខែមេសា ចាកចេញពីប្រទេសទីម័រ ឡេស្ត ឆ្ពោះទៅកាន់ប្រទេសម៉ាឡេស៊ី , ថ្ងៃទី១២ ខែមេសា ចាកចេញពីប្រទេសម៉ាឡេស៊ី ឆ្ពោះទៅកាន់ប្រទេសស៊ឹង្ហបុរី , ថ្ងៃទី១៥ ខែមេសា ចាកចេញពីប្រទេសស៊ឹង្ហបុរី ឆ្ពោះទៅកាន់ប្រទេសថៃ , ថ្ងៃទី១៨ ខែមេសា ចាកចេញពីប្រទេសថៃ ឆ្ពោះទៅកាន់ប្រទេសមីយ៉ាន់ម៉ា , ថ្ងៃទី២៣ ខែមេសា ចាកចេញពីប្រទេសមីយ៉ាន់ម៉ា ឆ្ពោះទៅកាន់ប្រទេសឡាវ និង នៅថ្ងៃទី២៧ ខែមេសា ចាកចេញពីប្រទេសឡាវ ឆ្ពោះទៅកាន់ប្រទេសកម្ពុជា ។
ពេលព្រះអគ្គិជ័យកីឡា និង ភ្លើងគប់កីឡា មកដល់ព្រំដែនកម្ពុជា-ឡាវ ក៏មានរៀបចំពិធីដង្ហែព្រះអគ្គិជ័យកីឡា និង ភ្លើងគប់កីឡាពីព្រំដែនកម្ពុជា-ឡាវ មកដល់រាជធានីភ្នំពេញ តាមក្បួនរថយន្ត និង រៀបចំពិធីដង្ហែព្រះអគ្គិជ័យកីឡា និង ភ្លើងគប់កីឡាពីរាជធានីភ្នំពេញ ឆ្ពោះទៅកាន់បណ្តាខេត្តនៅជុំវិញបឹងទន្លេសាប ហើយនៅល្ងាចថ្ងៃទី០៥ ខែឧសភា ពិធីដង្ហែព្រះអគ្គិជ័យកីឡា បានមកដល់កីឡដ្ឋានមរតកតេជោ ដែលជាកន្លែងប្រារព្ធពិធីបើកការប្រកួតកីឡាអាស៊ីអាគ្នេយ៍លើកទី៣២ ហៅកាត់ថា ស៊ីហ្គេម និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ។
គួររំលឹកថា កាលពីម៉ោងប្រមាណ៥និង៣០នាទីល្ងាច នាថ្ងៃទី២៤ ខែឧសភា ឆ្នាំ២០២២ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ បាននាំយកទង់កីឡាអាស៊ីអាគ្នេយ៍ ២០២៣ ហៅកាត់ថា SEA Games 2023 ដែលទទួលពីប្រទេសវៀតណាម ជូនព្រះរាជាណាចក្រកម្ពុជាបានមកដល់រាជធានីភ្នំពេញ និង នៅព្រឹកថ្ងៃទី២១ ខែមីនា ឆ្នាំ២០២៣នេះ មានរៀបចំព្រះរាជពិធីប្រទានព្រះអគ្គិជ័យកីឡា សម្រាប់ព្រឹត្តិការណ៍ស៊ីហ្គេមលើកទី៣២និងអាស៊ានប៉ារ៉ាហ្គេមលើកទី១២ នៅប្រាសាទអង្គរវត្ត ខេត្តសៀមរាប ក្រោមព្រះរាជាធិបតីព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងនោះក៏មានវត្តដ៍ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមនឹងឥស្សរជនជាន់ខ្ពស់ នៃរាជរដ្ឋាភិបាលកម្ពុជា ព្រមទាំងមន្ត្រីជាន់ខ្ពស់ក្រុមប្រឹក្សាកីឡាអាស៊ីអាគ្នេយ៍ និងអាស៊ាន ប៉ារ៉ាហ្គេម និងសិស្សានុសិស្ស យុវជនកាយរិទ្ធ យុវជនកាកបាទក្រហមកម្ពុជា និងភ្ញៀវទេសចរជាតិអន្តរជាតិជាច្រើននាក់ ៕
អត្ថបទ ៖ លោក លីវ សាន្ត
