ពលករទេសន្តរប្រវេសន៍ចំនួន ៦០នាក់ និងអាជ្ញាធរពាក់ព័ន្ធក្នុងខេត្តសៀមរាបជាច្រើនរូប បានទទួលការបណ្តុះគំនិតអាជីវកម្មខ្នាតតូច ពីអង្គការអន្តរជាតិទេសន្តរប្រវេសន៍(IOM) នូវចំណះដឹងអំពីការបង្កើតអាជីវកម្មខ្នាតតូច សហគ្រិនភាព ការធ្វើផែនការ និងការគ្រប់គ្រងអាជីវកម្ម ដើម្បីជាការរួមចំណែកដល់ការអភិវឌ្ឍជំនាញ និងជម្រើសនៃការកសាងជីវភាពឲ្យកាន់តែប្រសើររបស់ពលករទេសន្តរប្រវេសន៍គ្រួសារ និងសហគមន៍ ដោយវគ្គបណ្តុះបណ្ដាលនេះមានរយៈពេល ៣ថ្ងៃ ចាប់ពីថ្ងៃទី២២-២៤ ខែមីនា ឆ្នាំ២០២៣ នៅវិទ្យាស្ថានពហុបច្ចេកទេសអង្គរ ខេត្តសៀមរាប។
លោកស្រី កៅ សុគន្ធផារ៉ាឌី មន្រ្តីគម្រោងថ្នាក់ជាតិ នៃអង្គការអន្តរជាតិទេសន្តរប្រវេសន៍ (IOM) បានបញ្ជាក់ថា វគ្គបណ្តុះបណ្តាលនាពេលនេះ ធ្វើឡើងតាមរយៈកម្មវិធីកាត់បន្ថយភាពក្រីក្រតាមរយៈទេសន្តរប្រវេសន៍ ដោយសុវត្ថិភាព ការអភិវឌ្ឍជំនាញ និងការបង្កើនសេវាស្វែងរកការងារឲ្យធ្វើនៅកម្ពុជា ឡាវ មីយ៉ាន់ម៉ា និងថៃ (PROMISE) ដែលជាការបណ្តុះគំនិតអាជីវកម្មខ្នាតតូច ជូនដល់ពលករទេសន្តរប្រវេសន៍ដែលវិលត្រឡប់មកវិញនូវចំណេះដឹង។ ទេសន្តរប្រវេសក៏ការងារ គឺជាមាគ៌ាមួយឆ្ពោះទៅរកការផ្តល់ភាពអង់អាច និងលើកកម្ពស់ភាពធន់ផ្នែកសេដ្ឋកិច្ចរបស់ពលករទេសន្តរប្រវេសក៍ប្រមាណ ៣លាននាក់ ដែលមកពីកម្ពុជា សាធារណរដ្ឋប្រជាមានិតប្រជាធិបតេយ្យឡាវ និងមីយ៉ាន់ម៉ា(CLM) ទៅធ្វើការនៅក្នុងប្រទេសថៃ។
លោកស្រីបន្ថែមថា ពលករទេសន្តរប្រវេសន៍ គឺជាកត្តាជំរុញដ៏សំខាន់នៃកំណើនសេដ្ឋកិច្ច និងការអភិវឌ្ឍន៍អាជីវកម្មនៅក្នុងប្រទេសថៃផងដែរ។ ប៉ុន្តែមានតែកម្មករទេសន្តរប្រវេសក៍ មួយចំនួនតូចប៉ុណ្ណោះ ដែលទទួលបានការបណ្តុះបណ្តាលជំនាញមុនពេលចេញដំណើរ។ ការធ្វើទេសន្តរប្រវេសន៍ការងារ ទៅប្រទេសថៃក៏ត្រូវបានផ្សារភ្ជាប់ជាទូទៅជាមួយនឹងហានិភ័យនៃការកេងប្រវ័ញ្ច លក្ខខណ្ឌការងារ និងការរស់នៅលំបាក មានបំណុល និងប្រាក់ឈ្នួលទាប។ ដូចគ្នាដែរ ពលករទេសន្តរប្រវេសក៍ ដែលត្រឡប់មកធ្វើការនៅក្នុងស្រុកវិញរួមចំណែករកប្រាក់ចំណូលដល់គ្រួសារ និងជាតិនៅក្នុងប្រទេសដើមតាមរយៈការផ្ញើប្រាក់។ ពួកគេត្រូវបានទទួលស្គាល់កាន់តែខ្លាំងឡើងនៅក្នុងគោលនយោបាយជាតិថាមានសារៈសំខាន់ក្នុងការកសាងកម្លាំងពលកម្មដ៏រឹងមាំនៅក្នុងប្រទេសជាដើម។ ហើយគម្រោងកាត់បន្ថយភាពក្រីក្រតាមរយៈទេសន្តរប្រវេសន៍ដោយសុវត្ថិភាព ការអភិវឌ្ឍជំនាញនិងការបង្កើនសេវាស្វែងរកការងារធ្វើកម្ពុជា ឡាវ មីយ៉ាន់ម៉ា និងថៃ មានគោលបំណងលុបបំបាត់ឧបសគ្គ និងបញ្ហារារាំងពលករទេសន្តរប្រវេសក៍ និយោជករបស់ពួកគេ និងសហគមន៍ទូទាំងប្រទេសកម្ពុជា សាធារណរដ្ឋប្រជាធិបតេយ្យប្រជាមានិតឡាវ មីយ៉ាន់ម៉ា និងប្រទេសថៃ ទទួលបានអត្ថប្រយោជន៍ជាសក្តានុពលពេញលេញនៃការធ្វើទេសន្តរប្រវេសក៍ ក្នុងការកាត់បន្ថយភាពក្រីក្រ កំណើនសេដ្ឋកិច្ច និងភាពធន់។
លោកស្រី សុខ សុធារតន៍ អ្មកប្រឹក្សានៃអង្គការអន្តរជាតិខាងការងារ (ILO) ក៏បានឲ្យដឹងដែរថា ការទទួលខុសត្រូវដោយធ្វើការជាមួយធុរកិច្ចបង្កើតថ្មី ទីភ្នាក់ងារជ្រើសរើសបុគ្គលិក អ្នកផ្តល់សេវាអភិវឌ្ឍន៍ជំនាញ អង្គការសង្គមស៊ីវិល និងរដ្ឋាភិបាល ក៏ដូចជាតាមរយៈយន្តការ និងវេទិកាក្នុងតំបន់ រួមទាំងអាស៊ានផងដែរ។ ដោយទទួលស្គាល់ពីផលប៉ះពាល់នៃការរាតត្បាតនៃជំងឺកូវីដ-១៩ លើពលករទេសន្តរប្រវេសក៍ និងនិយោជក និងតួនាទីសំខាន់របស់ពលករទេសន្តរប្រវេសក៍ ក្នុងការកសាងភាពប្រសើរឡើង building back better, គោលបំណងរួមគឺស្ត្រី និងបុរសជាពលករទេសន្តរប្រវេសក៍ មកពីប្រទេសកម្ពុជា សាធារណរដ្ឋប្រជាធិបតេយ្យប្រជាមានិតឡាវ និងមីយ៉ាន់ម៉ា។ នៅក្នុងប្រទេសថៃ និងជនទេសន្តរប្រវេសន៍ដែលវិលត្រឡប់មកវិញ បានបង្កើនការងារសមរម្យ និងលើកកម្ពស់ជីវភាពរស់នៅ ដែលរួមចំណែកដល់ភាពធន់នឹងសេដ្ឋកិច្ច និងការកាត់បន្ថយភាពក្រីក្រ៕
អត្ថបទ និងរូបភាព៖លោក ស៊ាន សុផាត
កែសម្រួល៖ លោក អ៊ុន ណារាជ្យ
