នៅថ្ងៃទី២២ ខែមីនា ឆ្នាំ២០២៣ នៅទីស្នាក់ការសាខាកាកបាទក្រហមកម្ពុជា ខេត្តសៀមរាប លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានដឹកនាំយុវជនកាកបាទក្រហមកម្ពុជា ចំនួន១៥០នាក់ បត់បេះដូងក្រដាស ចូលរួមក្នុងយុទ្ធ Beyond The Games ដែលមានន័យថា យុទ្ធនាការ លើសពីការប្រកួត។
ថ្លែងសំណេះសំណាលនាពេលនោះ លោកជំទាវ ទាង អេង ទៀ សីហា បានបង្ហាញថា ដើមចមនៃការជួបជុំគ្នា បត់បេះដូងក្រដាស នាពេលនេះ គឺជាការចូលរួមគាំទ្រដល់កីឡាករ កីឡាការិនីដែលមានពិការភាព និងដើម្បីបំបែកកំណត់ត្រាពិភពលោកនាពេលខាងមុខ ក្នុងឱកាសដែលកម្ពុជាធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។ ជាមួយនោះ សហភាពសហព័ន្ធយុវជនកម្ពុជា បានបង្កើតយុទ្ធនាការ Beyond The Games ក្នុងគោលបំណងចូលរួមផ្សព្វផ្សាយពីព្រឹត្តិការណ៍កីឡាដ៏ធំទាំងពីរនេះ ដែលជាមោទកភាពជាតិ និងជាម្ចាស់ផ្ទះលើកដំបូងក្នុងប្រវត្តិសាស្ត្រ ដែលនេះជាការផ្សារភ្ជាប់ទឹកចិត្តរបស់ប្រជាពលរដ្ឋខ្មែរ និងបង្កើតនូវអនុស្សាវរីយ៍ ដែលមិនអាចបំភ្លេចបានរបស់យុទ្ធនាការ Beyond The Games។
លោកជំទាវ បន្ថែមថា ”បេះដូងច្រើនជាងគេលើពិភពលោក” ជាការប្រមូលផ្តុំការចូលរួមរបស់ប្រជាជនខ្មែរគ្រប់មជ្ឈដ្ឋាន ដើម្បីបង្ហាញពីទំហំទឹកចិត្តក្នុងការគាំទ្រដល់កីឡាករ កីឡាការិនីគ្រប់រូប។ ក្នុងនាមយើងជាយុវជនខ្មែរ និងជាសសរទ្រូងរបស់ប្រទេសជាតិ យើងនឹងរួមចំណែកក្នុងយុទ្ធនាការ Beyond The Games ដោយចូលរួមបត់បេះដូងក្រដាស ដើម្បីបំបែកឯកគ្គទកម្ម “បេះដូងច្រើនជាងគេលើពិភពលោក” ដែលនឹងគ្រោងយកទៅដាក់តាំងបង្ហាញក្នុងព្រឹត្តិការណ៍អង្គរសង្ក្រាន្តនាពេលខាងមុខ។ លើសពីនេះ នេះជាការបង្ហាញឱ្យឃើញពីការរួមសហការគ្នារបស់ប្រជាជាតិខ្មែរ ក្នុងការចែករំលែកក្តីស្រលាញ់ ការលើកទឹកចិត្ត និងការគាំទ្រជាតិមាតុភូមិ ជាពិសេសផ្សព្វផ្សាយឱ្យសកលលោកបានឃើញពីសាមគ្គីភាព សន្តិភាព អរិយធម៌ វប្បធម៌ និងសក្តានុពលរបស់កម្ពុជាផងដែរ។
គួរជម្រាបថា យុទ្ធនាការ ”បេះដូងច្រើនជាងគេលើពិភពលោក” នឹងមានការបត់បេះដូងចំនួន ១លានបេះដូង ដើម្បីបំបែកកំណត់ ៥៣,៧០៤បេះដូង របស់ប្រទេសអង់គ្លេស។ ក្រៅពីការបំបែកឯកគ្គទកម្មពិភពលោកនេះ ការបត់បេះដូងក្រដាសនេះ គឺជាការគាំទ្រដល់កីឡាករ កីឡាការិនីដែលមានពិការភាព ដែលសម្រាប់ការបត់បេះដូងក្រដាសមួយ មានតម្លៃ គិតជាថវិកាចំនួន ៥០០រៀល និងស្មើ ៥០០លានរៀល នៃបេះដូងមួយលាន។
អត្ថបទ និងរូបភាព៖ សាខាកាកបាទក្រហមកម្ពុជា ខេត្តសៀមរាប
កែសម្រួល៖ លោក សេង ផល្លី
