ប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ លោកឧកញ៉ា ហ៊ុយ ភៀវ បានបញ្ជាក់ថា អគ្គកុងស៊ុលចិន ប្រចាំខេត្តសៀមរាប បានធ្វើការសន្យាថា នឹងធ្វើសហប្រតិបត្តិការជាមួយសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ក្នុងការធ្វើឲ្យប្រសើរឡើងនូវកំណើនសេដ្ឋកិច្ចក្នុងតំបន់មួយនេះ។
ក្នុងឱកាសដឹកនាំសមាជិកជ្រើសតាំងសភាពាណិជ្ជកម្មមណ្ឌលសៀមរាប-ឧត្តរមានជ័យ ដើម្បីជួបសម្តែងការគួរសម និងពិភាក្សាការងារជាមួយ លោក លី ជីជៀ ( Lui Zhi Jie) អគ្គកុងស៊ុលចិន ប្រចាំខេត្តសៀមរាប នៅព្រឹកថ្ងៃទី២៣ ខែមីនា ឆ្នាំ២០២៣នេះ លោកឧកញ៉ា ហ៊ុយ ភៀវ បានលើកឡើងពីសក្តានុពលជាច្រើនរបស់ខេត្តសៀមរាប ក្នុងនោះក៏មានវិស័យទេសចរណ៍ និងវិស័យកសិកម្ម ដែលជាសក្តានុពលស្នូលរបស់ខេត្តសៀមរាប។
លោកឧកញ៉ា លើកឡើងថា នៅសៀមរាបយើងកសិកម្មមានដំឡូងមី និងស្វាយចន្ទី ដោយយើងស្នើសុំខាងភាគីចិន បើសិនមានអ្នកវិនិយោគិនមកវិនិយោគ សុំឲ្យគាត់មកវិនិយោគវិស័យកសិកម្មផង។ ហើយបើទេសចរណ៍ហ្នឹងសុំជួយឲ្យអ្នកទេសចរម៉ោខេត្តសៀមរាប និងបង្កើតមជ្ឈមណ្ឌល(សម្រាប់)អ្នកទេសចរឲ្យបានច្រើនផង។ និយាយឲ្យចំខាងភាគីចិនគាត់គាំទ្រ និងទទួលយកអ្វីដែលយើងចង់សហការ គាត់និងជំរុញសហការជាមួយយើង”។ ខេត្តសៀមរាប ក្រៅពីវិស័យទេសចរណ៍ដ៏មានសកត្តានុពល វិស័យកសិកម្ម ក៏ជាផ្នែកមួយយ៉ាងសំខាន់នៅក្នុងជំរុញកំណើនសេដ្ឋកិច្ចរបស់ខេត្តនៅទិសឧត្តរនៃប្រទេសកម្ពុជាមួយនេះដែរ។
ជាមួយគ្នានោះ កាលពីពេលថ្មីៗកន្លងទោ អភិបាលខេត្តសៀមរាប ឯកឧត្តម ទៀ សីហា ក៏បានជំរុញដល់វិស័យឯកជនស្វែងយល់បន្ថែមអំពីឱកាសវិនិយោគលើវិស័យការងារ ដូចជាការបង្កើតរោងចក្រផ្សេងៗជាដើម៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
