មន្ត្រីជាន់ខ្ពស់នៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ បានជំរុញដល់គ្រប់ភាគីពាក់ព័ន្ធនានា ជួយបង្កើនការខិតខំប្រឹងប្រែងរួមគ្នា កៀរគរធនធានពីប្រភពនានា ដើម្បីការឆ្លើយតប ចំពោះបញ្ហាស្គមស្គាំងរបស់កុមារ ដែលជាការឆ្លើយតបនឹងការខិតខំរបស់រាជរដ្ឋាភិបាលកម្ពុជា ក្នុងការលើកកម្ពស់សុខមាលភាពកុមារ។
ថ្លែងក្នុងសិក្ខាសាលាស្តីពី “ការធ្វើការរួមគ្នាបំពេញកង្វះខាតលើផែនការសកម្មភាពសកលដើម្បីកាត់បន្ថយភាពស្គមស្គាំងរបស់កុមារ នៅថ្នាក់ក្រោមជាតិ” នាព្រឹកថ្ងៃទី២៣ ខែមីនា ឆ្នាំ២០២៣ នៅខេត្តសៀមរាប ឯកឧត្តម សំ សារ៉ាត អនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ មានប្រសាសន៍ថា កាលពីថ្ងៃទី១៨ ខែតុលា ឆ្នាំ២០២២កន្លងទៅ ក្រុមប្រឹក្សាស្តារនិងអភិវឌ្ឍន៍វិស័យកសិកម្ម និងជនបទ សហការជាមួយអង្គការ UNICEF បានរៀបចំសិក្ខាសាលា ស្វែងរកការគាំទ្រកម្រិតខ្ពស់ស្តីពី “ធ្វើការរួមគ្នាដើម្បីភ្ជិតគម្លាតទាក់ទងនឹងបញ្ហាស្គមស្គាំងរបស់កុមារ” ក្រោមអធិបតីភាព ឯកឧត្តម យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្នុងគោល បំណងកៀរគរ ការវិនិយោគ និងការប្ដេជ្ញាចិត្តកាន់តែច្រើនថែមទៀតពីសំណាក់រាជរដ្ឋាភិបាល និងដៃគូអភិវឌ្ឍន៍ ដើម្បីគាំទ្រដល់ការអនុវត្តផែនទីបង្ហាញផ្លូវ សម្រាប់ការទប់ស្កាត់ និង ព្យាបាលបញ្ហាស្គមស្គាំងរបស់កុមារ។
ព័ត៌មានជាតិ ថ្មីៗ
ឯកឧត្តម សំ សារ៉ាត បន្តថា ជាមួយគ្នានេះ សិក្ខាសាលាដែលដែលរៀបចំនាពេលនេះ ក៏មានគោលបំណងកៀរគរថវិកា ដើម្បីពន្លឿនវឌ្ឍនភាពនៃការបង្ការ ការព្យាបាលភាពស្គមស្គាំងរបស់កុមារ និងពង្រឹង-ពង្រីកកិច្ចសហប្រតិបត្តិការពហុវិស័យ ដើម្បីរួមគ្នាលើកកម្ពស់វិស័យសន្តិសុខស្បៀង និងអាហារូបត្ថម្ភនៅកម្ពុជា។ជាមួយគ្នានេះ អង្គសិក្ខាលាលាក៏មានគោលបំណងសំខាន់ៗដូចជាដើម្បីកំណត់ពីគម្លាតនៅក្នុងអត្រាគ្របដណ្តប់របស់កម្មវិធី និងបញ្ហាប្រឈមក្នុងការបញ្ចប់បញ្ហាស្គមស្គាំងរបស់កុមារនៅក្នុងប្រទេសកម្ពុជា ដោយផ្តោត លើភាពខុសគ្នានៅថ្នាក់ក្រោមជាតិ រួមទាំងខេត្តទាំងបីដែលមានអត្រាប្រេវ៉ាឡង់ភាពស្គមស្គាំង ខ្ពស់ ត្រូវបានកំណត់ជាដំណាក់កាលទីមួយនៃការពង្រីកកម្មវិធី និងការផ្សព្វផ្សាយ សារលិខិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសទិវាជាតិអាហារូបត្ថម្ភ លើកទី៩ ថ្ងៃទី៦ ខែវិច្ឆិកា ឆ្នាំ២០២២ ក្រោមប្រធានបទ “ម្ហូបអាហារកាន់តែមានសុវត្ថិភាព សុខភាពកាន់តែល្អប្រសើរ”។ ផែនទីបង្ហាញផ្លូវដើម្បីភ្ជិតតម្លាតនៃភាពស្គមស្គាំងរបស់ កុមារនៅកម្ពុជា បានកំណត់យកខេត្តចំនួន ១៣ ជាតំបន់ដែលមានអាទិភាពភូមិសាស្ត្រខ្ពស់ សម្រាប់សកម្មភាពដើម្បីកាត់បន្ថយភាពស្គមស្គាំងរបស់កុមារ។ ខេត្តទាំងនោះរួមមាន កំពង់ចាម ត្បូងឃ្មុំ កំពង់ឆ្នាំង កំពង់ធំ ក្រចេះ មណ្ឌលគិរី រតនគិរី ព្រះវិហារ ស្ទឹងត្រែង ពោធិ៍សាត់ សៀមរាប តាកែវ និងឧត្តរមានជ័យ។ ដើម្បីពង្រីកអន្តរាគមន៍ដោះស្រាយបញ្ហាស្គមស្គាំងរបស់ កុមារទៅកាន់ខេត្តដំណាក់កាលទីមួយ ការពង្រីកចាប់ផ្តើមនៅឆ្នាំ ២០២២-២០២៣ ក្នុងខេត្តចំនួន៣ គឺ ខេត្តសៀមរាប ខេត្តកំពង់ចាម និងខេត្តកំពង់ឆ្នាំង។
ឯកឧត្តម សំ សារ៉ាត បានឲ្យដឹងថា វិស័យសន្តិសុខស្បៀង និងអាហារូបត្ថម្ភ បានដើរតួនាទីយ៉ាងសំខាន់ក្នុងការរួមចំណែកអភិវឌ្ឍន៍មូលធនមនុស្ស បង្កើនប្រសិទ្ធភាព ការងារ ជំរុញកំណើនសេដ្ឋកិច្ច និងវឌ្ឍនភាពសង្គម។ ការអភិវឌ្ឍទីក្រុង ការធ្វើចំណាកស្រុក ការប្រែប្រួលអាកាសធាតុ ការបំរែបំរួលប្រជាសាស្ត្រ និងការរីកចម្រើនផ្នែកសេដ្ឋកិច្ច និងសង្គម បានធ្វើឲ្យប្រជាជនកម្ពុជាផ្លាស់ប្ដូររបៀបរស់នៅ និងការហូបចុក។ ការផ្លាស់ប្ដូរ និង បំរែបំរួលទម្លាប់បុគ្គល និងសង្គមនេះ មានឥទ្ធិពលលើស្ថានភាពសន្តិសុខស្បៀង និងអាហារូបត្ថម្ភ ដែលតម្រូវឲ្យមានការយកចិត្តទុកដាក់បន្ថែមទៀត លើការប្រយុទ្ធនឹងបញ្ហាកង្វះអាហារូបត្ថម្ភគ្រប់ទម្រង់ ហើយបញ្ហានេះបានធ្វើឲ្យប្រជាជនប្រឈមនឹងបញ្ហាថ្មីៗ ដែលបង្កការគំរាម កំហែងដល់សុខភាព និងសក្តានុពលនៃកំណើនសេដ្ឋកិច្ច។ ប្រសិនបើគ្មានការយកចិត្តទុកដាក់ លើសុខភាព សន្តិសុខស្បៀង និងអាហារូបត្ថម្ភនោះទេ ផលលាភដែលបានមកពីការអភិវឌ្ឍ សេដ្ឋកិច្ចនឹងត្រូវធ្លាក់ចុះ ដោយសារការខាតបង់ដែលមិនអាចមើលរំលងពីបញ្ហាកង្វះអាហារូប ត្ថម្ភ និងបន្ទុកចំណាយលើការថែទាំ និងព្យាបាលជំងឺមិនឆ្លងនានា ដូចជាជំងឺទឹកនោមផ្អែម ជំងឺ ដាច់សរសៃឈាមខួរក្បាល និងជំងឺបេះដូងជាដើម។
ឯកឧត្តម បន្តថា រយះពេល ២០ឆ្នាំកន្លងទៅនេះ ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្នុងនាមជាប្រធាន ក្រុមការងារបច្ចេកទេសចម្រុះលើវិស័យសន្តិសុខស្បៀងនិងអាហារូប ត្ថម្ភ បានសហការយ៉ាងជិតស្និទ្ធជាមួយនឹងក្រសួង-ស្ថាប័នពាក់ព័ន្ធនៅថ្នាក់ជាតិ និងថ្នាក់ ក្រោមជាតិ អង្គការនៃតួអភិវឌ្ឍន៍ សង្គមស៊ីវិល និង វិស័យឯកជន ធ្វើការសម្របសម្រួល និង អនុវត្តគោលនយោបាយ និងយុទ្ធសាស្ត្រជាអាទិភាពនានា លើវិស័យសន្តិសុខស្បៀង និង អាហារូបត្ថម្ភ ដែលនាំឲ្យមានលទ្ធផលល្អប្រសើរឡើងគួរជាទីមោទនៈ។ ជាក់ស្តែង បើប្រៀប ធៀបកាលពី ២០ឆ្នាំមុនពីប្រទេសមានបញ្ហាអសន្តិសុខស្បៀង ឥឡូវបានក្លាយជាប្រទេសនាំ ស្បៀងចេញ ហើយពិន្ទុសន្ទស្សន៍នៃភាពអត់ឃ្លានសកលបានធ្លាក់ចុះពី ៤៣,៥%នៅឆ្នាំ២០០០ មកត្រឹម ២០,៦% នៅឆ្នាំ២០២០, បញ្ហាក្រិសក្រិនកុមារអាយុក្រោម ៥ឆ្នាំ បានធ្លាក់ចុះពី ៥០%នៅឆ្នាំ២០០០ មកត្រឹម ២២% នៅឆ្នាំ២០២២, អត្រាមិនគ្រប់ទម្ងន់បានធ្លាក់ចុះពី២០% មកត្រឹម១៦% ប៉ុន្តែអត្រាស្គមស្គាំងកុមារអាយុក្រោម ៥ឆ្នាំ មានតួលេខដដែលគឺ ៩% ចាប់ពីឆ្នាំ២០១៤ មកដល់ឆ្នាំ២០២១ ។
អភិបាលរងខេត្តសៀមរាប លោក អ៊ឹង គឹមលាង បានលើកឡើងដែរថា បញ្ហាស្គមស្គាំងរបស់កុមារ បណ្ដាលមកពី អាហារូបត្ថម្ភ និងកង្វះអនាម័យ ក្នុងនោះដើម្បីកាត់បន្ថយនូវបញ្ហាទាំងនេះ រដ្ឋបាលខេត្ត និងក្រុមការងារដឹកនាំសម្របសម្រួល វិស័យសន្តិសុខស្បៀង និងអាហារូបត្ថម្ភខេត្តសៀមរាប នឹងខិតខំប្រឹងប្រែងសហការជាមួយក្រសួងស្ថាប័ន ជាពិសេស ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ មន្ទីរ-អង្គភាព ជុំវិញខេត្ត រដ្ឋបាលក្រុង-ស្រុក ឃុំ/សង្កាត់ និងអង្គការដៃគូអភិវឌ្ឍន៍នានា បានរៀបចំផែនការមេលើវិស័យកសិកម្ម បញ្ហារទឹកស្អាត បន្ថែមពីនោះខេត្តសៀមរាបគ្រោងនិងបញ្ចប់ការបនន្ទោបង់ពាសវាពាសកាលនៅឆ្នាំ២០២៤ ក្នុងន័យចូលរួម លើបញ្ហារសន្តិសុខស្បៀង អាហារូបត្ថម្ភ និងកង្វះអនាម័យ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
