នាព្រឹកថ្ងៃទី២៤ ខែមីនា ឆ្នាំ២០២៣នេះ នៅសាកលវិទ្យាល័យអង្គរ ខេត្ដសៀមរាប មានរៀបចំកម្មវិធីដង្ហែរក្បួនសង្ក្រាន្ដសាកលវិទ្យាល័យ ពីចំណុចភ្លើងស្ដុបចុងកៅស៊ូ ឆ្ពោះទៅកាន់សាកលវិទ្យាល័យអង្គរ ស្ថិតនៅបុរីសៀងណាំ ក្រុងសៀមរាប ដើម្បីបំផុសគំនិតដល់ប្រជាពលរដ្ឋឱ្យនឹករំលឹកដល់វប្បធម៌អរិយធម៌ខ្មែរ និងដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ ក្រោមប្រធានបទ “ការដាស់ព្រលឹងអង្គរ”។
បើតាមលោក សុខ តុញ អនុប្រធាក្រុមប្រឹក្សាភិបាល នៃសកលវិទ្យាល័យអង្គរ និងជាអ្នករៀបចំកម្មវិធីនេះឡើង បានបញ្ជាក់ថា សង្ក្រាន្ដសាកលវិទ្យាល័យនេះ ធ្វើឡើងដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ ក្រោមប្រធានបទ “ការដាស់ព្រលឹងអង្គរ” ព្រមទាំងដើម្បីបង្កើនការសប្បាយរីករាយដល់យុវជនក្រោមម្លប់សន្ដិភាពដ៍ត្រជាក់របស់រាជរដ្ឋាភិបាល។ លោកបន្ដថា សង្ក្រាន្ដនេះដែរមានការជួបជុំយុវជនរាប់រយនាក់ ដោយមានលេងល្បែងប្រជាប្រិយនានា រាំម៉ាឌីហ្សុន ពូនភ្នំខ្សាច់ លើកទង់ ស្តាប់ព្រះធម៌ទេសនា សម្តែងសិល្បៈខ្មែរ-បរទេស ស្រង់ព្រះ ព្រមទាំងមានស្តង់លក់អាហារ ការប្រគុំតន្ដ្រីសម័យ ប្រលងចំរៀង ការប្រដាល់គុណខ្មែរ រយៈពេលបីថ្ងៃ ចាប់ពីថ្ងៃទី២៣-២៥ ខែមីនា ឆ្នាំ២០២៣។
លោក ញ៉ិល រដ្ឋា សាកលវិទ្យាធិការនៃសកលវិទ្យាល័យអង្គរ បានឲ្យដឹងថា ចំពោះការជ្រើសរើសយកប្រធានបទ “ការដាស់ព្រលឹងអង្គរ” ក៏ព្រោះថាដួងព្រលឹងត្រូវបានចាត់ទុកជាផ្នែកខាងវិញ្ញាណ ឬភាពអរូបិយនៃមនុស្ស ឬសត្វ ហើយវាមានភាពជាអមតៈ។ បុព្វបុរសខ្មែរបានបង្ហាញភាពខ្លាំងរបស់ខ្លួនរាប់ពាន់ឆ្នាំ ហើយត្រូវបានបង្ហាញតាមរយៈការបន្សល់វប្បធម៌យ៉ាងសម្បូរបែប ជាពិសេសប្រាសាទថ្មដ៏អស្ចារ្យ។ ទោះជាអ្វីៗដែលបានកសាងជាង ១000ឆ្នាំមុន ហើយបានបន្សល់ត្រឹមតែអតីតកាលក៏ដោយ ក៏ដួងព្រលឹងអង្គរនៅតែបន្តជាអមតៈជាមួយយើងទាំងអស់គ្នា ដូចនេះការដាស់ព្រលឹងអង្គរឡើងវិញជាកតព្វកិច្ចរបស់ពួកយើងទាំងអស់គ្នា៕
អត្ថបទ និងរូបភាព៖ លោក បូ សាវី ,លោក យូ វង្ស
កែសម្រួ៖ អ៊ុុន ណារាជ្យ
