ពិធីសម្ពោធឆ្លងសង្ឃាសន: អគារមត្តេយ្យសិក្សា និងសមិទ្ធិនានា ក្នុងវត្តកេសរារាមស្ថិតក្នុងក្រុងសៀមរាប ខេត្តសៀមរាប នាថ្ងៃទី២៦ ខែមីនា ឆ្នាំ២០២៣ ឯកឧត្តម អ្នកឧកញ៉ាសៀង ណាំ តំណាងរាស្ត្រមណ្ឌលសៀមរាប បានអំពាវនាវបានដល់បងប្អូនប្រជាពលរដ្ឋដែលគ្រប់អាយុ និងមានឈ្មោះក្នុងបញ្ជីបោះឆ្នោត សូមទៅបោះឆ្នោត នៅថ្ងៃទី២៣ ខែកក្កដាឆ្នាំ២០២៣ខាងមុខនេះ ដើម្បីជ្រើសរើសសមាជិកសភាតំណាងរាស្ត្រ អាណត្តិទី៧ សូមបងប្អូនបោះឆ្នោតទៅតាមឆន្ទ: ក្នុងការជ្រើសរើសថ្នាក់ដឹកនាំប្រទេស ដែលមានឧត្តមគតិស្រឡាញ់ជាតិ គិតប្រយោជន៍ជាតិជាធំ ដើម្បីដឹកនាំអភិវឌ្ឍប្រទេសជាតិឱ្យកាន់តែរីកលូតលាស់ស្មើមុខស្មើមាត់ទៅនឹងប្រទេសជឿនលឿននានាក្នុងសកលលោក។
ឯកឧត្តម បានថ្លែងនូវការកោតសរសើរចំពោះព្រះចៅអធិការ ព្រះសង្ឃ គណ:កម្មការ អាចារ្យវត្ត អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងកាយចិត្ត និងទ្រព្យធនធ្វើឲ្យលេចចេញនូវសមិទ្ធផលនានាជាច្រើនដែលសុទ្ធតែជាគរុភណ្ឌសម្រាប់វត្ត ដើម្បីសម្រួលដល់ការធ្វើបុណ្យទានរបស់ប្រជាពុទ្ធបរិស័ទទាំងអស់គ្នា។ ឯកឧត្តម ថា៖ សមិទ្ធផលថ្មីៗនេះ ជាផ្នែកមួយដ៏សំខាន់រួមចំណែកក្នុងការរួមចំណែកបំរើឱ្យវិស័យពុទ្ធចក្រ ដែលត្រូវបានកំណត់ដោយរដ្ឋធម្មនុញ្ញនៃព្រះរាជាណាចក្រកម្ពុជាយើងថាព្រះពុទ្ធសាសនាជាសាសនារបស់រដ្ឋ។ ទន្ទឹមនឹងនេះ វិស័យពុទ្ធចក្រ និងអាណាចក្របានដើរទន្ទឹមគ្នាពុំអាចខ្វះមួយណាបានឡើយ ក្នុងការចូលរួមជួយស្តារ និងអភិវឌ្ឍន័សង្គមជាតិ។ ឯកឧត្តមឧកញ៉ា សៀង ណាំ ក៏បានរំលឹកឡើងដែរ អាស្រ័យដោយមានជ័យជំនះ ៧ មករា ឆ្នាំ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៍ និងទទួលបានសិទ្ធិសេរីភាព រួមគ្នាកសាងសង្គមជាតិឡើងវិញរហូតមានការរីកចំរើនជាលំដាប់ដូចឃើញជាក់ស្តែងក្នុងបច្ចុប្បន្ន។ កម្ពុជាក្រោមគោលនយោបាយឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី បាននាំមកនូវការផ្សះផ្សារ បង្រួមបង្រួមជាតិ ទទួលបានស្ថេរភាពនយោបាយក្រោមសុខឆ័ត្រសន្តិភាពតែមួយ ប្រកបដោយកិត្យានុភាពរបស់ខ្លួនឲ្យខ្ពស់ឡើងវិញគួរជាទីមោទកជាទីបំផុត។ ឯកឧត្តម បានលើកទឹកចិត្តឲ្យបងប្អូនប្រជាពលរដ្ឋ គ្រប់ស្រទាប់ទាំងអស់ ត្រូវជឿជាក់លើការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី ដែលមានគោលនយោបាយច្បាស់លាស់ និងដឹកនាំប្រទេសប្រកបដោយភាពរីកចំរើនលើគ្រប់វិស័យ និងការអភិវឌ្ឍន៍តាំងពីទីប្រជុំជនរហូតដល់ទីជនបទដាច់ស្រយាល។
ឯកឧត្តម សៀង ណាំ បានឧបត្ថម្ភបេតុង ចំនួន ១០០ម៉ែត្រត្រីគុណ និងទទួលបានការចូលរួមរបស់លោកស្នងការនគរបាលខេត្តឧបត្ថម្ភ ១០លានរៀល សម្រាប់ការកសាងផ្លូវបេតុងមួយខ្សែនៅក្រោយវត្ត ដែលមានប្រវែង ៥៦០ម៉ែត្រ ទទឹង ៦ម៉ែត្រ គ្រោងនឹងចំណាយប្រមាណជា ៧ពាន់ដុល្លារ។ ឯកឧត្តម សៀង ណាំ ក៏បានជូនថវិកាលោកតាលោកយាយលោកគ្រូ អ្នកគ្រូ សិស្ស និងប្រជាពលរដ្ឋចូលរួមក្នុងពិធីសរុបអស់ថវិកាចំនួន ១០លានរៀលផងដែរ។
សូមជំរាបថា៖ សមិទ្ធផលថ្មីៗដែលទើបតែសាងសង់ហើយ រូមមាន៖ សង្ឃាសន:មានទំហំទទឹង ១១.៥០ម៉ែត្រ បណ្តោយ ១៣ម៉ែត្រ កម្ពស់ ៣ជាន់ មាន ១៧បន្ទប់ និងអគារមត្តេយ្យមានទទឹង ៩ ម៉ែត្រ បណ្តោយ ៣៥ម៉ែត្រ កម្ពស់ ២ជាន់ មាន ៧បន្ទប់ អគារទាំងពីរផ្តើមកសាងនៅឆ្នាំ២០១៩ រួមជាមួយសមិទ្ឋផលមួយចំនួនទៀត ដូចជា រូបសំណាក, ក្លោងទ្វារ និងរបងសាលារៀន, សួនច្បារនិងផ្កាមុខវត្ត សរុបថវិកាអស់ ៣៣៨,៥០០ដុល្លារ។ វត្តកេសរារាម ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប មានអាយុកាល ១២៧ ឆ្នាំមកហើយ។ គម្រោងផែនការបន្ទាប់ វត្តបានរួមសហការជាមួយអាជ្ញាធរ ភូមិ សង្កាត់ កសាងផ្លូវបេតុងមួយខ្សែនៅក្រោយវត្ត ដែលមានប្រវែង ៥៦០ម៉ែត្រ ទទឹង ៦ម៉ែត្រ ក្នុងខ្ទង់ចំណាយទឹកប្រាក់ប្រមាណ ៦៥,២០០ ដុល្លារ ។ នេះបើតាមសង្ឃដីកា ព្រះតេជគុណ ព្រះវិបុលសត្ថា រី សាត (ថាមវរោ ) ព្រះចៅអធិការវត្ត៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
