ប្រជាពលរដ្ឋ និងលោកយាយលោកតាដែលមានជីវភាពខ្វះខាត រស់នៅក្នុងឃុំរុនតាឯក និងឃុំព្រះដាក ស្រុកបន្ទាយស្រី ចំនួន ២៥២គ្រួសារ បានទទួលអំណោយពី ឯកឧត្តម នាយឧត្តមសេនីយ៍ផ្កាយមាស៤ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការដ្ឋានអង្គរក្ស សម្តេចតេជោ តាមរយៈ ឯកឧត្តម ឧត្តមសេនីយឯក គង់ ប៊ុនលី មេបញ្ជាការរងអង្គរក្ស ដោយក្នុងមួយគ្រួសារទទួលបាន៖ អង្ករ ២០គីឡូ សារ៉ុង ឬក្រម៉ា១ និងថវិកា ៣ម៉ឹនរៀល។ ពីធីនេះធ្វើឡើងកាលពីថ្ងៃទី២៦ ខែមីនា ឆ្នាំ២០២៣នេះ ក្នុងបរិវេណនៅទីបញ្ជាការដ្ឋានអង្គរក្ស ស្ថិតក្នុងស្រុកបន្ទាយស្រី ខេត្តសៀមរាប។
មានប្រសាសន៍ក្នុងឱកាសនោះ ឯកឧត្តម ឧត្តមសេនីយឯក គង់ ប៊ុនលី បាននាំយកប្រសាសន៍ផ្ដាំផ្ញើ សាកសួរសុខទុក្ខរបស់ឯកឧត្តម កិត្តិបណ្ឌិត ហ៊ីង ប៊ុនហៀង ជូនចំពោះប្រជាពលរដ្ឋទាំងអស់ដែឡបានចូលរួមនាពេលនេះ។ ជាមួយគ្នានោះដែរ ឯកឧត្តមក៏បានរំលឹកពីប្រវត្តិប្រទេសកម្ពុជាយើង ពេលដែលកម្ពុជាធ្លាប់ជួបនូវវិបត្តសង្គ្រាមផ្ទៃក្នុងរ៉ាំរ៉ៃអស់ជាច្រើនទសវត្ស ទម្រាំបានមកដល់ពេលនេះយើងមានសុខសន្តិភាពពេញលេញ ដែលទទួលបានមកដោយការលំបាក និងការលះបង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី ដែលជាស្ថាបនិក និងជាមគ្គុទេសក៍ក្នុងការស្វែងរកសន្តិភាពតាមរយៈ នយោបាយឈ្នះឈ្នះ បាននាំមកនូវការផ្សះផ្សានិងបង្រួបបង្រួបជាតិ ក្រោមឆ័ត្រសន្តិភាពតែមួយ។ ដោយសារស្ថេរភាពនៃសន្តិភាពនេះហើយ ទើបនាំមកនូវការអភិវឌ្ឍ លើគ្រប់វិស័យជូនប្រជាជនទូទាំងប្រទេស និងបានបង្កលក្ខណៈឱ្យពលរដ្ឋគ្រប់រូបមានសិទ្ធិសេរីភាព ក្នុងការប្រកបរបរចិញ្ចឹមជីវភាពដោយភាពសុខសាន្ត រស់នៅប្រកបដោយភាពថ្លៃថ្នូរ ហេតុនេះ យើងទាំងអស់គ្នាត្រូវចូលរួមថែរក្សាសន្តិភាព និងដឹងគុណសន្តិភាព ពីព្រោះសន្តិភាពមានតម្លៃមិនអាចកាត់ថ្លៃបាន សម្រាប់មនុស្សជាតិលើពិភពលោក។
ក្នុងឱកាសនោះដែរ ឯកឧត្តម គង់ ប៊ុនលី ក៏បានណែនាំដល់បងប្អូនទាំងអស់គ្នាត្រូវខិតខំដាំដំណាំ បង្កបង្កើនផលចិញ្ចឹមសត្វ ដើម្បីបង្កើតប្រាកចំណូលសេដ្ឋកិច្ចគ្រួសារ និងរួមគ្នាថែរក្សាភាពសុខសានរបស់យើងទាំងអស់គ្នា។ ជាពិសេសសូមបងប្អូនប្រជាពលរដ្ឋដែលគ្រប់អាយុ និងមានឈ្មោះក្នុងបញ្ជីបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ជាថ្ងៃបោះឆ្នោតជ្រើសរើសសមាជិកសភាតំណាងរាស្ត្រអាណត្តិទី៧ ហេតុនេះសូមបងប្អូនបោះឆ្នោតទៅតាមឆន្ទៈដើម្បីជ្រើសរើសថ្នាក់ដឹកនាំប្រទេសដែលមានឧត្តមគតិស្រឡាញ់ជាតិ គិតប្រយោជន៍ជាតិជាធំ ដើម្បីបន្តការដឹកនាំអភិវឌ្ឍប្រទេសជាតិឱ្យកាន់តែរីកលូតលាស់ស្មើមុខស្មើមាត់ទៅនឹងប្រទេសជឿនលឿននានាក្នុងសកលលោកផងដែរ៕
អត្ថបទ និងរូបភាព៖ លោក យូ វង្ស ,ទ្រា ពន្លឺ
កែសម្រួល៖ លោក អ៊ុន ណារាជ្យ
