នាព្រឹកថ្ងៃទី២៧ ខែមីនា ឆ្នាំ២០២៣ ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប បានអញ្ជើញកាត់ខ្សែបូរសម្ពោធឆ្លងសមិទ្ឋផលនានា ក្នុងវត្តសសរស្តម្ភ ស្ថិតនៅភូមិសសរស្ដម្ភ ឃុំសសរស្ដម្ភ ស្រុកពួក ខេត្តសៀមរាប រួមមាន៖ សាលាធម្មសភា សាលាឆាន់ រោងទទួលភ្ញៀវ សាលារោង ឬទង បន្ទប់ទឹក ខ្លោងទ្វារវត្ត ចាក់បេតុងផ្លូវក្នុងវត្ត រៀបចំសួនផ្កា និងទិញដីពង្រីកទីធ្លាវត្ត ដែលចំណាយអស់ថវិកាសរុបជិត ៥០ម៉ឺនដុល្លារអាមេរិក។
បើតាមលោក គី ឡាយ មេឃុំសសរស្តម្ភ បានឲ្យដឹងថា វត្តសុថម្ភារាម ហៅវត្តសសរស្ដម្ភ គិតមកដល់បច្ចុប្បន្នមានអាយុកាល ១១៩ឆ្នាំហើយ និងមានព្រះចៅអធិការចំនួន ១៦អង្គ។ ក្នុងរបបខ្មែរក្រហមទីអារាមនេះត្រូវបានបោះបង់ និងក្រោយមកទៀតក៏ពុំទាន់មានការអភិវឌ្ឍន៍អ្វីនៅឡើយទេ ទើបតែឆ្នាំ១៩៩៨ រហូតមកដល់ពេលនេះ ប្រទេសកម្ពុជាក្រោមការដឹកនាំដ៍ឈ្លាសវៃរបស់សម្តេចតេជោ ហ៊ុន សែន បាននាំមកជូនប្រទេសជាតិនូវសុខសន្តិភាពពេញលេញ និងការរីកចម្រើនលើគ្រប់វិស័យ ហើយទីអារាមដ៏ចំណាស់នេះ ក៏ទទួលបានសមិទ្ឋផលជាបន្តបន្ទាប់ តាមរយៈការសាមគ្គី និងកៀងគរថវិកាពីសប្បុរសជនជិតឆ្ងាយ យកមកសាងសង់លេចចេញជាសម្បត្តិគរុភ័ណ្ឌវត្ត និងរីកចម្រើនគួរឱ្យកត់សម្គាល់។ ហើយចំពោះសាលាធម្មសភាថ្មីនេះដែរ មានទទឹង ២៨ម៉ែត្រ បណ្តោយ ៣៥ម៉ែត្រ សាលាឆាន់ មានទទឹង ១៣ម៉ែត្រ បណ្តោយ ១៥ម៉ែត្រ សាលារោងបាយទទួលភ្ញៀវ មានទទឹង ១០ម៉ែត្រ បណ្តោយ ១៥ម៉ែត្រ សាលារោងទងមានទទឹង ៦ម៉ែត្រ បណ្តោយ ២៣ម៉ែត្រ បន្ទប់ទឹកអនាម័យមាន ៦បន្ទប់។
មានប្រសាសន៍ក្នុងឱកាសនោះ ឯកឧត្តម អ្នកឧកញ៉ា សៀង ណាំ បានសំដែងនូវភាពសោមនស្ស ចំពោះសមិទ្ធិផលថ្មីដែលបានកើតមានឡើងនៅក្នុងវត្តសសរស្តម្ភ និងសូមសម្ដែងការកោតសរសើរ ចំពោះព្រះចៅអធិការ អាចារ្យ គណៈកម្មការវត្ត និងពុទ្ធបរិស័ទទាំងអស់ ដែលបានប្រឹងប្រែងយកព្រះទ័យ និងយកចិត្តទុកដាក់ក្នុងការកសាងសមិទ្ធិផលនេះឡើងទុកជាប្រយោជន៏នៅក្នុងព្រះពុទ្ធសាសនា សំរាប់ជាទីគោរពបដិបត្តិព្រះធម៌ និងប្រារព្ឋពិធីបុណ្យផ្សេងៗដែលចាត់ទុកជាបច្ច័យរួមចំណែកបន្ថែមទៀត ញ៉ាំងឱយវិស័យពុទ្ធចក្រកាន់តែរីកចំរើនគង់វង្សស្ថិតស្ថេរថែមទៀត។ ចំពោះការកសាងសមិទ្ធផលនានា ទាំងផ្នែកអាណាចក្រក្តី ទាំងផ្នែកពុទ្ធចក្រក្ដី អាចសម្រេចទៅបានមកដល់ពេនេះ គឺដោយសារតែប្រទេសជាតិមានសុខសន្តិភាពពេញលេញចាប់ពីឆ្នាំ១៩៩៨មក អាស្រ័យដោយមានគោល នយោបាយ ឈ្នះ-ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី។
ឯកឧត្តម អ្នកឧកញ៉ា សៀង ណាំ ក៏បានរំលឹកពីសម័យកាលដែលប្រទេសកម្ពុជាធ្លាក់ចូលទៅក្នុងរបប្រល័យពូជជសាសន៏ ៣ឆ្នាំ ៨ខែ ២០ថ្ងៃ បណ្តាឱ្យហេដ្ឋារចនាសម្ព័ន្ធសង្គមជាតិ វត្តអារាមសាលារៀន ទ្រព្យសម្បត្តិសាធារណៈរបស់រដ្ឋ ត្រូវទទួលរងនូវការបំផ្លិចបំផ្លាញស្ទើរតែសូន្យ សូម្បីតែព្រះសង្ឃ វត្តអារាម និងសាសនាផ្សេងៗទៀត ក៏ត្រូវទទួលរងនូវការកាប់សំលាប់ និងបំផ្លិចបំផ្លាញស្ទើរតែផុតពូជដែរ។ អាស្រ័យដោយមានជ័យជំនះ ៧ មករា ឆ្នាំ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៏ និងទទួលបានសិទ្ធិសេរីភាព រួមគ្នាកសាងសង្គមជាតិឡើងវិញរហូតមានការរីកចំរើនជាលំដាប់ទាំងពុទ្ចចក្រ និងអណាចក្រដូចឃើញជាក់ស្តែងក្នុងបច្ចុប្បន្ន។
ជាមួយគ្នានោះដែរ ឯកឧត្តម ក៏បានប្រគេនថវិកាចំនួន ១០លាន សម្រាប់វត្ត និងប្រគេនព្រះសង្ឃយាយជីតាជី និងសិស្សានុសិស្សអស់ថវិកាប្រមាណជា ៧លានរៀលទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
