នៅព្រឹកថ្ងៃទី២៤ ខែមីនា ឆ្នាំ២០២៣នេះ នៅសាលាភាសាចិនជីងហ៊ួរ ក្រុងសៀមរាប បានរៀបចំកម្មវិធីចែកវិញ្ញាបនបត្រ និងប័ណ្ណសរសើរ ជូនដល់សិស្សឆ្នើម ព្រមទាំងសិស្សានុសិស្សដែលបានបញ្ចប់វគ្គសិក្សា សរុបចំនួន ១២៥នាក់។
លោក ថាប់ សេង ហុក នាយកសាលាភាសាចិនជីងហ៊ួ បានឲ្យដឹងថា សាលាភាសាចិនជីងហ៊ួ ត្រូវបានបង្ហាត់បង្រៀនដោយផ្ទាល់ជាមួយលោកគ្រូអ្នកគ្រូ ដែលមានបទពិសោធជាច្រើនឆ្នាំកន្លងមក ដោយផ្ដោតសំខាន់លើភាសាចិន “ការសិក្សាសម្រាប់មនុស្សពេញវ័យ និងកុមារា កុមារីមិនទាន់ពេញវ័យ” គឺជាវគ្គសិក្សាដំបូងក្នុងចំណោមវគ្គសិក្សាផ្សេងៗ ទៀតនៃកម្មវិធីអភិវឌ្ឍសមត្ថភាពរបស់សិស្សនោះ។ សម្រាប់ខេត្តសៀមរាប ជាខេត្តដែលមានសក្តានុពលលើវិស័យទេសចរណ៍ ដែលតម្រូវការប្រើប្រាស់ភាសាជាច្រើន។ ក្នុងនោះភាសាចិន ភាសាអង់គ្លេស គឺជាភាសាចាំបាច់ ហើយសាលាក៏មានការផ្តល់សេវាកម្មអប់រំផ្នែក ភាសាចិនគ្រប់កំរិតសិក្សា ភាសាអង់គ្លេស និងមានថ្នាក់ computer គ្រប់វគ្គសិក្សាផងដែរ។
មានប្រសាសន៍ក្នុងឱកាសនោះដែរ លោកស្រី សូ ចិន្តា មន្ត្រីទទួលបន្ទុកផ្នែកអប់រំ នៃមន្ទីរអប់រំ យុវជន និងកីឡាខេត្តសៀមរាប បានបង្ហាញពីការគាំទ្រ និងលើកទឹកចិត្តដល់សិស្សានុសិស្ស ត្រូវបន្តការសិក្សារៀនសូត្រឲ្យបានល្អប្រសើរបន្ថែមទៀត នៅពេលយើងមករៀនសូត្រត្រូវចេះស្តាប់គ្រូពន្យល់ នៅផ្ទះត្រូវចេះជួយការងារឪពុកម្តាយ ត្រូវប្រកាន់ខ្ជាប់នៅសីលធម៍សង្គម ចេះគោរពចាស់ទំ នឹងចៀសឲ្យផុតពីគ្រឿងញៀនជាដើម។ ទន្ទឹងនិងនោះដែរ ប្អូនៗសិស្សានុសិស្សរៀនភាសាចិន បានឡើងបង្ហាញពីការយល់ដឹងរបស់ខ្លួនស្រដៀងៗគ្នាថា ចំពោះការសិក្សារៀនសូត្រភាសាចិន និងចំណេះដឹងទូទៅនៅក្នុងសាលានេះ គឺមានច្បាប់ទំលាប់បទបញ្ជាផ្ទៃក្នុងរបស់សាលា មានវិន័យល្អ លោកគ្រូ អ្នកគ្រូ បានបង្ហាត់បង្រៀនដោយយកចិត្តទុកដាក់ក្នុងកិច្ចការពន្យល់ឲ្យសិស្សានុសិស្សងាយចាំងាយយល់។ សិស្សខ្លះពួកគាត់រៀនបានជិត ៣ឆ្នាំហើយ ខ្លះទៀតរៀនបាន ១ឆ្នាំទៅ ២ឆ្នាំ ពួកគាត់អាចនិយាយភាសាចិនបានល្អគួរសម អាចទទួលយកបានសម្រាប់ការអភិវឌ្ឍន៍ខ្លួនទៅថ្ងៃអនាគតរបស់ពួកគាត់ក្នុងកិច្ចការងារសង្គមដើម្បីប្រទេសជាតិ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
