លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល បានលើកឡើងថា ក្នុងការលើកកម្ពស់វិស័យសុខុមាលភាពនៅកម្ពុជា ត្រូវទាមទារឲ្យមានការចូលរួមទាំងអស់គ្នាជាអន្តរវិស័យ ដោយមិនត្រូវទុកឲ្យតែផ្នែកសុខាភិបាលទទួលខុសត្រូវតែម្នាក់ឯងនោះទេ ហើយក៏មិនត្រូវចាត់ទុកវិស័យសុខាភិបាល ជាវិស័យទោលដែលជាការទទួលខុសត្រូវផ្តាច់មុខរបស់មន្ត្រីសុខាភិបាលនោះទេ ប៉ុន្តែវាជាការទទួលខុសត្រូវរួមគ្នា ដោយក្នុងនោះអាជ្ញាធរមូលដ្ឋានឃុំសង្កាត់ ក៏ជាអ្នកដើរតួនាទីសំខាន់មួយដែរ នៅក្នុងការអប់រំផ្សាយអំពីការសម្អាតអនាម័យ ការថែទាំសុខភាពបឋម ជាដើម។
ក្នុងឱកាសអញ្ជើញចូលរួមជាអធិបតី ក្នុងពិធីបើកសន្និបាតបូកសរុបការងារឆ្នាំ២០២២ ទិសដៅអនុវត្តការងារឆ្នាំ២០២៣ របស់មន្ទីរសុខាភិបាល នៃរដ្ឋបាលខេត្តសៀមរាប នាព្រឹកថ្ងៃទី២៣ ខែមីនា ឆ្នាំ២០២៣ លោកជំទាវ ឱ វណ្ណឌីន បានសង្កត់ធ្ងន់ថា ប្រសិនបើមិនមានការចូលរួមពីគ្រប់ភាគី រួមទាំងប្រជាជនផងទេ វាមិនអាចទទួលបានជោគជ័យនោះទេ ដែលជាបទពិសោធន៍ នៅក្នុងការប្រយុទ្ធនាការប្រឆាំងការរាតត្បាតនៃជំងឺកូវីដ-១៩ ដោយសារការចូលរួមទាំងអស់គ្នា ទើបកម្ពុជាអាចសម្រេចបាននូវការបើកប្រទេសឡើងវិញគួរជាទីមោទក ដូច្នេះក្នុងឱកាសនេះ សូមថ្លែងនូវការកោតសរសើរចំពោះថ្នាក់ដឹកនាំ និងមន្ត្រីបម្រើការលើវិស័យសុខាភិបាលក្នុងខេត្តសៀមរាប ដែលកន្លងមក បានធ្វើការសហការគ្នាជាមួយវិស័យដទៃទៀតបានយ៉ាងល្អប្រសើរ និងមានភាពរីកចម្រើន។
លោកជំទាវបានផ្ដាំផ្ញើដល់ក្រុមគ្រូពេទ្យគ្រប់រូបទូទាំងប្រទេស ត្រូវប្តេជ្ញាចិត្តខ្ពស់ក្នុងការផ្តល់ការថែទាំសុខភាព ប្រកបដោយសមត្ថភាព និងមេត្តាធម៌ ព្រមទាំងគោរពសេចក្តីថ្លៃថ្នូរ និងសិទ្ធិមនុស្ស ត្រូវប្រកាន់ខ្ជាប់នូវបទដ្ឋានវិជ្ជាជីវៈ ភាពស្មោះត្រង់ក្នុងទំនាក់ទំនងប្រកបដោយវិជ្ជាជីវៈព្រមទាំងចូលរួមយកចិត្ដទុកដាក់អប់រំសុខាភាពជូនប្រជាពលរដ្ឋឱ្យបានល្អផងដែរ ពិសេសគ្រូពេទ្យគ្រប់រូបត្រូវតែបន្តសិក្សាអនុវត្ត និងបង្កើនចំណេះដឹងវិទ្យាសាស្ត្រ ព្រមទាំងរក្សាការប្តេជ្ញាចិត្តខ្ពស់ក្នុងការអប់រំសុខភាព ផ្លាស់ប្ដូរបទពិសោធន៍គ្នាទៅវិញទៅមក ដើម្បីបំរើប្រជាពលរដ្ឋឱ្យមានប្រសិទ្ធិភាពខ្ពស់។បន្ថែមពីនោះ ក្រុមគ្រូពេទ្យត្រូវរក្សាឱ្យបាននូវសុខសន្ដិភាព សុវត្ថិភាព និងស្ថេរីភាពសង្គមជាតិ ។
ព័ត៌មានជាតិ ថ្មីៗ
លោកពិន ប្រាកដ អភិបាលរងខេត្ដសៀមរាប មានប្រសាសន៍ថា ក្នុងបរិបទនៃជំងឺកូវីដ-១៩ អាជ្ញាធរ បានបង្កើនកិច្ចសហការ ជាមួយកម្លាំងមានសមត្ថកិច្ចនានា ក្នុងក្របខណ្ឌគណៈបញ្ជាការឯកភាពរដ្ឋបាលគ្រប់ថ្នាក់ ខិតខំ រក្សាការពារ បាននូវសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម ក្នុងការទប់ស្កាត់អំពើភេរវកម្ម និងការខិតខំប្រឹងប្រែងគ្រប់គ្រង សភាពការណ៍ផ្ទៃក្នុង ទប់ស្កាត់ក្រុមជ្រុលនិយម និងពួកអគតិនានា ទាំងក្នុងនិងក្រៅប្រទេស ដែលប៉ុនប៉ងធ្វើសកម្មភាពផ្ដួលរលំរាជរដ្ឋាភិបាល ព្រមទាំងសហការស្រាវជ្រាវបង្ក្រាបបទល្មើសនានាដែលកើតឡើងក្នុងខេត្ត ស្របតាមគោលនយោបាយរបស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិត និងប៉ិនប្រសប់ របស់សម្តេចតេជោ នាយករដ្ឋមន្ត្រី ការដាក់ចេញគោលការណ៍ វិធានការនានា បានទាន់ពេលវេលា និងមានប្រសិទ្ធភាពក្នុងការគ្រប់គ្រង ឆ្លើយតបបានចំពោះ ជំងឺកូវីដ-១៩ ដែលបានរាតត្បាតជាសកល ដើម្បីសង្គ្រោះ ការពារអាយុជីវិតប្រជាជន និងការពុះពារជម្នះ ដោះស្រាយ បញ្ហាប្រឈមនានា បណ្ដាលមកពីវិបត្តិជំងឺនេះ ទប់ទល់នឹងសេដ្ឋកិច្ច សង្គម និងជីវភាពរស់នៅរបស់ប្រជាពលរដ្ឋ ហើយបានបើកប្រទេសឲ្យដំណើរការឡើងវិញ ដោយពេញលេញលើគ្រប់វិស័យ និងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី ដើម្បីបន្តជំរុញការអភិវឌ្ឍសេដ្ឋកិច្ច សង្គម និងលើកកម្ពស់ជីវភាពរស់នៅរបស់ប្រជាពលរដ្ឋ ឲ្យមានការរីកចម្រើន ទៅមុខជាបន្តបន្ទាប់៕
អត្ថបទ និងរូបភាព ៖ លោក ជា ស្រស់ និង លោក ឈិត សាវី
កែសម្រួល៖ លោក លីវ សាន្ត
