នៅរសៀលថ្ងៃទី ២២ ខែ មីនា ឆ្នាំ២០២៣នេះ លោកជំទាវ ទាង អេង ទៀ សីហា បានដឹកនាំប្រតិភូស្ត្រី និងក្រុមការងារស្ម័គ្រចិត្តក្នុងខេត្តសៀមរាប ចុះជួបសួរសុខទុក្ខ និងនាំយកនំចំណីចែកជូន ក្មួយៗ ប្អូនៗ នៅវិទ្យាល័យអប់រំពិសេសខេត្តសៀមរាប ដែលមានពិការភាព គ ថ្លង់ ព្រមទាំងនាំយកការសួរសុខទុក្ខពីសំណាក់ សម្ដេចពិជ័យសេនា ទៀ បាញ់ ប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប និងឯកឩត្តម ទៀ សីហា អភិបាលខេត្តសៀមរាបផងដែរ។
លោកជំទាវ ទាង អេង ទៀ សីហា លើកឡើងថា នាពេលខាងមុខនេះ ខួប ១០ឆ្នាំ នៃព្រឹត្តការណ៍អង្គរសង្ក្រាន្ត នឹងរៀបចំនៅក្នុងខេត្តសៀមរាប ក្នុងនោះ ក៏មានការបត់បេះដូងក្រដាស ដើម្បីបំបែកកំណត់ត្រា ”បេះដូងច្រើនជាងគេលើពិភពលោក” ដែលនឹងដាក់បង្ហាញនៅក្នុងព្រឹត្តការណ៍អង្គរសង្ក្រាន្តឆ្នាំ២០២៣ លើទឹកដីប្រវត្តិសាស្ត្រ ខេត្តសៀមរាប។
លោកជំទាវ បញ្ជាក់ថា ការបត់បេះដូងក្រដាសនេះ ជាផ្នែកមួយនៃ យុទ្ធនាការ លើសពីការប្រកួត ឬ ហៅថា Beyond The Games។ កំណត់ត្រាប្រភេទនេះ ធ្លាប់បានធ្វើរួចមកហើយនៅប្រទេសអង់គ្លេស ដែលមានការបត់បេះដូងក្រដាសសរុប ៥៣,៧០៤បេះដូង។ សម្រាប់កម្ពុជានៅឆ្នាំ២០២៣នេះ នឹងធ្វើការបំបែកឯកគ្គទកម្មពិភពលោកនេះ ជាមួយនឹងបេះដូងច្រើនជាងគេ ដែលនឹងមានចំនួនសរុប ១លានបេះដូង។
លោកជំទាវ បញ្ជាក់បន្ថែមថា ការបត់បេះដូងក្រដាសនេះ មិនគ្រាន់តែជាការបំបែកឯកគ្គទកម្មពិភពលោកប៉ុណ្ណោះទេ តែក៏ជាការគាំទ្រដល់កីឡាករ កីឡាការិនីដែលមានពិការភាព ដោយការបត់បេះដូងក្រដាសមួយ មានតម្លៃ គិតជាថវិកាចំនួន ៥០០រៀល និងស្មើ ៥០០លានរៀល នៃបេះដូងមួយលាន។ ជាមួយនោះ យុទ្ធនាការ Beyond The Games ដែលបង្កើតឡើងដោយ សហភាពសហព័ន្ធយុវជនកម្ពុជានេះ មានគោលបំណង ចូលរួមផ្សព្វផ្សាយពីព្រឹត្តិការណ៍ជាប្រវត្តិសាស្ត្រ ដែលប្រទេសកម្ពុជា ធ្វើជាម្ចាស់ផ្ទះជាលើកដំបូង នៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣នេះ ព្រមទាំងចូលរួមបង្កើតនូវអនុស្សាវរីយ៍ នៃប្រជាជាតិខ្មែរ ដែលមិនអាចបំភ្លេចបានរបស់យុទ្ធនាការ Beyond The Games។
គួរជម្រាបថា សម្រាប់ខួប ១០ឆ្នាំនៃព្រឹត្តការណ៍អង្គរសង្ក្រាន្តឆ្នាំ២០២៣នេះ ព្រះរាជាណាចក្រកម្ពុជា នឹងយកយុទ្ធនាការពីរ ដើម្បីបំបែកកំណត់ត្រាពិភពលោកគឺ ការរាំម៉ាឌីហ្សុនដែលមានមនុស្ស ៣ពាន់នាក់ និង ការបត់បេះដូងក្រដាសចំនួន ១លានបេះដូង។
អត្ថបទ និងរូបភាព៖ លោក ម៉ី សុខារិទ្ធ និងលោក ហាំ ម៉េងហួត
កែសម្រួល៖ លោក សេង ផល្លី
