បន្ទាប់ពីបានធ្វើការជួសជុលកែលំអ លាបព៌ណ និងសាងសង់បន្ថែមនូវព្រះវិហារ សាលាធម្មសភា និងសមិទ្ឋផលនានាជាច្រើនទៀត ក្នុងបរិវេនវត្តឥន្ទបត្តបុរី ហៅវត្តអង្គរខាងជើង ស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប ត្រូវបានកាត់ខ្សែបូរដាក់ឱ្យប្រើប្រាស់ទុកជាសម្បត្តិសាធារណៈសម្រាប់វត្ត និងបានដាក់បាត្រឆ្លង វេរភ័ត្តាហារប្រគេនព្រះសង្ឃចំនួន ៧៥អង្គ នៅព្រឹកថ្ងៃទី២៣ ខែមីនា ឆ្នាំ២០២៣ ក្រោមអធិបតីភាព មហាឧបាសិកាបណ្ឌិត ហ៊ុន សេងនី និងក្រុមគ្រួសារព្រមទាំងញាតិធម៌។
បើតាមលោក គង់ សុភាព អតីតព្រះគ្រូចៅអធិការជំនាន់ទី១០ នៃវត្តអង្គរខាងជើង បានឲ្យដឹងថា វត្តឥន្ទបត្តបុរី ហៅវត្តអង្គរខាងជើង បានបង្កើតឡើងនៅឆ្នាំ១៤៣២ ក្នុងរជ្ជកាលព្រះបាទពញាយ៉ាត។ ដោយសារកត្តាអាកាសធាតុ កត្តាសង្គ្រាម និងកត្តាមនុស្ស ទីអារាមនេះរងនូវការខូចខាតជាអន្លើរៗ និងទទួលការជួសជុលថែទាំជាបន្តបន្ទាប់។ ជាក់ស្តែងក្នុងអំឡុងឆ្នាំ២០២០ ចៅអធិការ និងគណៈកម្មការវត្តបានស្រុះស្រួលមូលមតិគ្នាជួសជុលដំបូល និងលាបពណ៌នៃព្រះវិហារ ជួសជុលកែលំអ និងសាងសង់បន្ថែមនូវទីសេនាសេនៈ មានកុដិ សាលាធម្មសភា អគារសាលាពុទ្ឋិកបឋមសិក្សា បន្ទប់ទឹក សួនច្បារ ជាដើម។ល។ ដោយចំណាយថវិកាអស់ជាង ៨៥២,២០៣ដុល្លារ ជាបច្ច័យបានមកពីសទ្ឋាជ្រះថ្លា របស់មហាឧបាសិកាបណ្ឌិត ហ៊ុន សេងនី និងកូនចៅក្រុមគ្រួសារព្រមទាំងញាតិធម៌និងពុទ្ឋបរិស័ទជិតឆ្ងាយទាំងក្នុង និងក្រៅប្រទេស។
លោក គង់ សុភាព បន្ថែមថា ការជួយទំនុកបំរុងដល់ព្រះសង្ឃក៏ដូចជាហេដ្ឋារចនាសម្ព័ន្ឋនានាក្នុងវត្តនេះ គឺបង្ហាញនូវសទ្ឋាជ្រះថ្លាដ៏មុតមាំផ្តើមចេញពីទឹកចិត្តរបស់មហាឧបាសិកានិងញាតិធម៌ សបុរសជនជិតឆ្ងាយ នូវក្តីគោរព ស្រឡាញ់និងជឿជាក់លើគុណព្រះពុទ្ឋព្រះធម៌ព្រះសង្ឃ និងក៏ជាការរួមចំណែកដើម្បីថែរក្សាព្រះពុទ្ឋសាសនា ប្រពៃណីវប្បធម៌ទំនៀមទំលាប់របស់បុព្វបុរសដូនតាខ្មែរដែលមានតាំងពីយូរលង់ណាស់មកហើយៗ ឱ្យស្ថិតស្ថេររុងរឿងជានិរន្តន៍។
ព័ត៌មានជាតិ ថ្មីៗ
ព្រះតេជគុណ តាត មហាទី ប្រធានគណៈគ្រប់គ្រងវត្តអង្គរខាងជើង និងជាព្រះធម្មធរអនុគណក្រុងសៀមរាប បានបង្ហាញព្រះទ័យសោមនស្សរីករាយ និងបានចាត់ទុកការចូលរួមបរិច្ចាគធនធានថវិកាទោះតិចក្តីច្រើនក្តី គឺជាការជួយជ្រោមជ្រែងដល់វិស័យព្រះពុទ្ឋសាសនាឱ្យកាន់តែរីកចម្រើនឡើង។ ព្រះអង្គថា ការសាងសង់ ឬជួសជុលវិហារ សាលា ឬកុដិជាដើមតម្កល់ទុកជាទានក្នុងព្រះពុទ្ឋសាសនា ថាជាកុសលបានផល្លានិសង្ឃច្រើនជាអនេក ព្រោះជាការអាចញ៉ាំងព្រះពុទ្ឋសាសនា រុងរឿងអស់កាលជាអង្វែង។ ដូច្នេះសុំឲ្យមន្ត្រីសង្ឃ និងភិក្ខុ សាមណេរទាំងអស់ ត្រូវរួមមគ្នាថែរក្សាសមិទ្ឋផលក្នុងវត្តឱ្យស្ថិតស្ថេរ និងបន្តកិច្ចកែលំអ និងអភិវឌ្ឍគរុភណ្ឌ័នានាក្នុងអារាមឱ្យបានរីកចម្រើនទៅតាមលទ្ឋភាព ដើម្បីលើកស្ទួយវិស័យព្រះពុទ្ឋសាសនា ឱ្យកាន់តែខ្ពស់ត្រដែតឡើងថែមទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
