លោក យន់ លីនណេ អភិបាលរងខេត្តសៀមរាប បង្ហាញថា គិតត្រឹមរយៈពេល២ខែ ដើមឆ្នាំ២០២៣នេះ ខេត្តសៀមរាប ទទួលបានទេសចរអន្តរជាតិជាង១៥ម៉ឺននាក់ មានការកើនឡើង ១២.៤៥ភាគរយ បើធៀបនឹងរយៈពេលដូចគ្នានឹងឆ្នាំ២០២២។
ថ្លែងនៅក្នុងវគ្គបណ្តុះបណ្តាលជនបង្គោលស្តីពី “ទីក្រុងស្អាត-កម្ពុជាស្អាត” ឆ្ពោះទៅស្វាគមន៍ព្រឹត្តិការកីឡាស៊ីហ្គេមលើកទី៣២ និងប៉ារ៉ាហ្គេមឆ្នាំ២០២៣ នៅព្រឹកថ្ងៃទី៣ ខែមេសា ឆ្នាំ២០២៣ លោក យុន លីនណេ លើកឡើងថា ការសម្រេចបានកំណើនទេសចរណ៍ប្រកបដោយក្តីសង្ឃឹមនេះ បានឆ្លុះបញ្ចាំងដោយ កត្តា រួមផ្សំជាច្រើនរួមមាន៖ទី១ សុខសន្តិភាព ទី២ ការគ្រប់គ្រងការរីករាលដាលជំងឺកូវីដ-១៩ ក្នុងសង្គមបានល្អ រហូតឈាន ដល់មានការទទួលស្គាល់កម្ពុជា ជាប្រទេសជាប់ចំណាត់ថ្នាក់លេខ១ នៅលើពិភពលោក ក្នុង ចំណោម ១៦៦ប្រទេស ដែលបានធ្វើឱ្យកម្ពុជាក៏ដូចជាខេត្តសៀមរាបក្លាយជាគោលដៅ សុវត្ថិភាពសម្រាប់ទទួលទេសចរជាតិ-អន្តរជាតិ។ ទី៣). ការត្រៀមលក្ខណៈសម្បត្តិនៃឧស្សាហកម្មទេសចរណ៍ នៅក្នុងខេត្តសៀមរាប យើងដែលផ្តោតសំខាន់ទៅលើការពង្រឹងគោលដៅទេសចរណ៍ និងឧស្សាហកម្មទេសចរណ៍ ក្នុងការត្រៀមទទួលទេសចរឡើងវិញ តាមរយៈការអនុវត្តបានជោគជ័យតាមវិធានការសុខាភិបាល, បទប្បញ្ញត្តិ, វិធានការរដ្ឋបាល និងជាពិសេសការ ដាក់ចេញឱ្យអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) តាមគន្លងប្រក្រតីភាពថ្មីសម្រាប់សេវាកម្មទេសចរណ៍ ។
លោកអភិបាលរងខេត្ត បន្ថែមថា ក្រោមការយកចិត្តទុកដាក់ខ្ពស់របស់សម្ដេចតេជោ ហ៊ុន សែន ការស្ថាបនាហេដ្ឋារចនាសម្ព័ន្ធផ្លូវ ៣៨ខ្សែក្នុងក្រុងសៀមរាប ការរៀបចំសោភណ្ឌភាពដងស្ទឹងសៀមរាប និងសមិទ្ធផលជាច្រើនបានលេចជារូបរាងជាស្ថាពរ ស្របពេលស្ថានភាពជំងឺកូវីដ១៩លើកសកលលោកមានសភាពធូរស្រាល។ លើសពីនោះ រដ្ឋបាលខេត្ត ក៏បានរៀបចំក្រុងសៀមរាប ឱ្យកាន់តែមានសណ្ដាប់ធ្នាប់ ទំនើប ដែលសក្តិសមជាសមាជិកទីក្រុងឆ្លាតវៃអាស៊ាននាពេលខាងមុខ។
អត្ថបទ និងរូបភាព: លោក ជា ស្រស់
កែសម្រួល: លោក សេង ផល្លី
