ក្នុងរយ:ពេល ៥ថ្ងៃ ចាប់ពីថ្ងៃទី២០-២៥ ខែមេសា ឆ្នាំ២០២៣ គណៈប្រតិភូនៃក្រសួងព័ត៌មាន ដែលបានដឹកនាំដោយ ឯកឧត្ដម ជ្រីម ឆេងលីម ទីប្រឹក្សា និងអគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុ រួមទាំងសក្ខាកាមទាំង ៣១ រូបបានមកទស្សនៈកិច្ចសិក្សា និងបំប៉នបន្ថែមលើបច្ចេកទេសថតរូប នៅទីក្រុងហូជីមុីញ ប្រទេសវៀតណាម។
ឯកឧត្ដម ជ្រីម ឆេងលីម មានប្រសាសន៍ថា រយៈពេល ៥ថ្ងៃកន្លងទៅ មន្ត្រីរាជការដែលក្រសួងព័ត៌មានកម្ពុជា ដែលជាសិក្ខាកាមទទួលបានការបណ្តុះបណ្តាល រយៈពេលខ្លី ស្តីពីជំនាញបច្ចេកទេសថតរូប សម្រាប់ព្រឹត្តិការណ៍ស៊ីហ្គេម ដោយមានលោកគ្រូដ៏ចំណានចំនួនពីររូប គឺលោក Nguyen Quang Liem និងលោក Nguyen Doc Lap ដែលសុទ្ធសឹងជាអ្នកដែលមានបទពិសោធន៍ ច្រើនឆ្នាំក្នុងអាជីពជាអ្នកកាសែត និងថតរូបសម្រាប់ព្រឹត្តិការណ៍កីឡាជាច្រើន ដែលបានបង្ហាត់បង្ហាញ ក៏ដូចជាចែករំលែកនូវបទពិសោធន៍ដ៏មានតម្លៃ ផ្ទាល់ខ្លួនជាមួយសិក្ខាកាមទាំងអស់បានស្ដាប់ និងបានយល់បន្ថែមអំពីទ្រឹស្ដីមូលដ្ឋាន អំពីរបៀបនៃការប្រើប្រាស់ ការគ្រប់គ្រងសម្ភារៈថតរូប ការជ្រើសរើសប្លង់ថតរូប ការសង្កេត និងស្វែងយល់ពីសកម្មភាពក្នុងការប្រកួតកីទ្បានីមួយៗ ហើយដើម្បីទទួលបាននូវរូបភាពច្បាស់ ប្រកបដោយគុណតម្លៃអាចប្រើប្រាស់សម្រាប់ផ្សព្វផ្សាយ ដែលទាំងអស់នោះជាចំណុចគោលសំខាន់ៗ សម្រាប់សិក្ខាកាម ជាអ្នកប្រកបអាជីពថតរូបសម្រាប់កាសែត និងសិក្ខាកាមមួយចំនួនដែលធ្លាប់តែ ជាអ្នកសរសេរអត្ថបទកាសែត តែមានឱកាសបានមកចូលរួមវគ្គ បណ្តុះបណ្តាលជំនាញបច្ចេកទេសថតរូបនាពេលនេះ វាហាក់បីដូចជាយើង កំពុងទទួលបាននូវចំណេះដឹង ជំនាញថ្មី សមត្ថភាព និងផ្ដល់ឱកាសសម្រាប់ខ្លួនឯងបន្ថែមទៀតផងដែរ។
ព័ត៌មានជាតិ ថ្មីៗ
ឯកឧត្ដម បានវាយតម្លៃខ្ពស់នូវវគ្គបណ្ដុះបណ្តាល និងការធ្វើលំហាត់អនុវត្តន៍តាមក្រុមនីមួយៗ ជាពិសេសការទទួលរៀបចំបដិសណ្ឋារកិច្ចទាំងបន្ទបើសិក្សាការ ស្នាក់នៅ និងការហូបចុករបស់សិក្ខាកាមទាំងអស់ ដែលអគ្គនាយកដ្ឋានសារព័ត៌មានបានរៀបចំឡើងបានយ៉ាងល្អប្រសើរ។ ឯកឧត្ដម ជ្រីម ឆេងលីម តំណាងអោយក្រសួងព៍ត៌មាន ក៏បានស្នើសុំក្រសួងព័ត៏មានវៀតណាម ចំនួនពីរចំណុច ទី១ ជួយបង្កើនចំនួនវគ្គបណ្តុះបណ្តាលជូនសិក្ខាកាមជាមន្ត្រីវ័យក្មេងក្រសួងព័ត៌មាន បន្ថែមទៀតនិងទី២ ស្នើសុំ ឯកឧត្តម លីវ ឌីញហ្វិក ពិនិត្យលទ្ធភាពដើម្បីជួយបន្តបណ្តុះបណ្តាលធនធានមនុស្សសម្រាប់ក្រសួងព័ត៌មានកម្ពុជាក្នុងផ្នែកឌីជីថលនេះបន្ថែម។
ថ្លែងក្នុងពិធីបិទនិងប្រគល់វិញ្ញាបនបត្រដល់សិក្ខាកាមនា ថ្ងៃទី២៤ខែមេសាឆ្នាំ២០២៣ ឯកឧត្ដម Luu Dinh Phuc (លីវ ឌីញហ្វិក) អគ្គនាយក នៃអគ្គនាយក ដ្ឋានសារព័ត៌មាន ក្រសួងព័ត៌មាន និងសារគមន៍គម នៃសាធារណរដ្ឋ សង្គមនិយមវៀតណាម មានប្រសាន៍ថា ក្នុងរយៈពេលត្រឹមតែ ៥ ថ្ងៃប៉ុណ្ណោះ គ្រូបង្រៀងខាងវៀតណាម បានណែនាំ ពន្យល់ដល់ភាគីមិត្តទាំងអស់គ្នា អំពីខ្លឹមសារជាមូលដ្ឋានបំផុតអំពីការថតរូប ការជ្រើសរើសប្លងថតរូបមុំថត ជាពិសេសគឺបច្ចេកទេសថតរូបបែបកីឡា សម្រាប់វិញ្ញាសារកីឡាផ្សេងៗគ្នាដូចជា កីឡា Indoor outdoor កីឡាមានសកម្មភាពចល័ត ឬ អចល័ត ហើយ សិក្ខាកាមទាំងអស់ក៏ទទួលបានបទពិសោធន៍ជាក់ស្ដែងនៅវគ្គផ្ដាច់ព្រ័ត្រជើងឯកអត្តពលកម្មជនពិការ នៅមជ្ឈមណ្ឌលហ្វឹកហាត់កីឡាជាតិប្រចាំទីក្រុងហូជីមិញផងដែរ។
ឯកឧត្ដម Luu Dinh Phuc (លីវ ឌីញហ្វិក) តាងនាម ក្រសួងព័ត៌មាន និងសារគមនាគមន៍វៀតណាម សូមសម្តែងនូវការគោរព និងថ្លែង អំណរគុណចំពោះកិច្ចសហប្រតិបត្តិការដ៏ល្អពីក្រសួងព័ត៌មាននៃព្រះរាជាណាចក្រកម្ពុជា និងសូមថ្លែងអំណរគុណ យ៉ាងស្មោះស្ម័គ្រចំពោះ ឯកឧត្តម ជ្រីម ឆេងលីម ចំពោះការគាំទ្រយ៉ាងសកម្មដល់អគ្គនាយកដ្ឋានសារព័ត៌មាន ក្រសួងព័ត៌មាន និងសារគមនាគមន៍វៀតណាម ក្នុងការអនុវត្តសកម្មភាពកិច្ចសហប្រតិបត្តិការរវាងក្រសួងទាំងពីរ៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
