នៅថ្ងៃទី២៣ ខែឧសភា ឆ្នាំ២០២៣នេះ ថ្នាក់ដឹកនាំមន្ទីរព័ត៌មានខេត្តសៀមរាប ទទួលជួបពិភាក្សាការងារជាមួយប្រតិភូទំនាក់ទំនងព័ត៌មានភូមិភាគ២ មន្ទីរព័ត៌មានខេត្តស៊ីសាកេត បូរីរ៉ាំ និងខេត្តសូរិន្ទ នៃព្រះរាជាណាចក្រថៃ ដើម្បីធ្វើការពិភាក្សាជុំវិញការត្រៀមរៀបចំដំណើរទស្សនៈកិច្ចសិក្សា ដកស្រង់ និងផ្លាស់ប្ដូរបទពិសោធន៍ការងារផលិតកម្មវិធី Twin Radio កម្ពុជា-ថៃ នៅចុងខែមិថុនា ឆ្នាំ២០២៣ខាងមុខនេះ នៅខេត្តសៀមរាប។
លោក លុកស៊ីត ស៊ីងធារី ប្រធានទំនាក់ទំនងព័ត៌មានភូមិភាគ២ នៃព្រះរាជាណាចក្រថៃ បានបញ្ជាក់ថា នៅចុងខែមិថុនា ឆ្នាំ២០២៣ខាងមុខនេះ មន្ទីរព័ត៌មានខេត្តស៊ីសាកេត បូរីរ៉ាំ និងខេត្តសូរិន្ទ នៃព្រះរាជាណាចក្រថៃ នឹងធ្វើដំណើរទស្សនៈកិច្ចសិក្សា ដកស្រង់ និងផ្លាស់ប្ដូរបទពិសោធន៍ការងារផលិតកម្មវិធី Twin Radio កម្ពុជា-ថៃ មកខេត្តសៀមរាប ប្រទេសកម្ពុជា ដែលដំណើរទស្សនៈកិច្ចនេះគឺមានរយៈពេល ២ថ្ងៃ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះដែរ ឯកឧត្តម លីវ សុខុន ទីប្រឹក្សាក្រសួង និងជាប្រជាប្រធានមន្ទីរព័ត៌មានខេត្តសៀមរាប បានឲ្យដឹងថា កិច្ចសហប្រតិបត្តិការ ការផ្សាយវិទ្យុមិត្តភាពកម្ពុជា-ថៃ Twin Radio មានស្ថានីយ៍វិទ្យុទាំង៤ រួមមាន៖ សុរិន្ទ សៀមរាប ឧត្តរមានជ័យ និងព្រះវិហារ។ ក្នុងនោះស្ថានីយ៍នីមួយៗ បានសហការគ្នាយ៉ាងល្អប្រសើរ ក្នុងដំណើរការផ្សព្វផ្សាយព័ត៌មានរបស់ខ្លួន ទាំងការផលិតកម្មវិធីបម្រើឲ្យលើគ្រប់វិស័យ វប្បធម៌ ប្រពៃណី ទេសចរណ៍ បរិស្ថាន កសិកម្ម និងវិស័យសក្តានុពលផ្សេងៗទៀត។ ជាក់ស្ដែងកន្លងទៅថ្មីៗនេះ ភាគីប្រទេសទាំង២ ក៏បានធ្វើការការចែករំលែកព័ត៌មាន ជុំវិញព្រឹត្តិការណ៍ SEA Games និង ASEAN Para Games នៅកម្ពុជា និងការប្រែប្រួលអាកាសធាតុផងដែរ។
ឯកឧត្តម លីវ សុខុន មានប្រសាសន៍ទៀតថា កន្លងមកភាគីទាំង២ កម្ពុជា-ថៃ ក៏ធ្លាប់បានប្រជុំដកស្រង់បទពិសោធន៍ បច្ចេកទេស ជាលក្ខណៈទ្វេភាគីបានចំនួន ៣លើករួចមកហើយ នៅខេត្តសូរិន្ទ ខេត្តបុរីរ៉ាំ ប្រទេសថៃ និងនៅខេត្តកែប ប្រទេសកម្ពុជា។ ជាមួយនោះការផ្សាយវិទ្យុមិត្តភាពកម្ពុជា-ថៃ Twin Radio នៃបណ្តាខេត្តជាប់ព្រំដែន ក៏បានដើរតួនាទីយ៉ាងសំខាន់ក្នុងការរឹតចំណងសាមគ្គីភាព មិត្តភាព កិច្ចសហប្រតិបត្តិការ និងឈានឆ្ពោះទៅរកការកសាងព្រំដែនសន្តិភាព និងការអភិវឌ្ឍន៍ ក្រោមការសម្របសម្រួលរបស់ក្រសួងព័ត៌មានកម្ពុជា ជាមួយភាគីប្រទេសថៃ៕
អត្ថបទ និងរូបភាព៖ លោក ធន់ ពូថេ
កែសម្រួល៖ អ៊ុន ណារាជ្យ
