ព្រឹត្តិការណ៍សៀមរាប-សង្ក្រាន្ត ដែលប្រារព្ធឡើងរយៈពេល៣ថ្ងៃ ក្នុងក្រុងសៀមរាប មានបងប្អូនប្រជាពលរដ្ឋ ភ្ញៀវជាតិនិងអន្តរជាតិបានចូលរួមកំសាន្តសប្បាយ ប្រមាណជា ៣៧ម៉ឺននាក់ ក្នុងនេះ ភ្ញៀវបរទេសមានចំនួនប្រមាណ ជាង ២ម៉ឺន ៦ពាន់នាក់ ដែលចំនួននេះ មានការកើនឡើងជាង ៥% បើធៀបទៅនឹងរយៈពេលដូចគ្នាកាលពីឆ្នាំ២០១៨ ដែលមានភ្ញៀវបរទេសប្រមាណជាង ២ម៉ឺន ៥ពាន់នាក់ ។
ក្នុងឱកាសចូលឆ្នាំថ្មីប្រពៃណីជាតិខ្មែរ ឆ្នាំនេះ ខេត្តសៀមរាប បានរៀបចំព្រឹត្តិការណ៍ «សៀមរាបសង្ក្រាន្ដ» លើកទី១ ដើម្បីអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរឆ្នាំកុរ ឯកស័កព.ស២៥៦៣ រៀបចំដោយសហភាពសហព័ន្ធយុវជនកម្ពុជាខេត្តសៀ្មរាប និងចូលរួមសហការដោយ អាជ្ញាធរខេត្តសៀមរាប និង អាជ្ញាធរជាតិអប្សរា បានបើកដំណើរទៅអស់រយៈពេលបីថ្ងៃ ចាប់ពីថ្ងៃទី១៤ដល់ថ្ងៃទី១៦ខែមេសាឆ្នាំ២០១៩ នៅបរិវេណសួនច្បារ ព្រះរាជដំណាក់ ក្រុងសៀមរាប។ សៀមរាបសង្ក្រាន្ត ត្រូវបានរៀបចំប្រារព្ធឡើងជាលើកដំបូង បន្ទាប់ពីមហាព្រឹត្តិការណ៍អង្គរ-សង្ក្រាន្ត ដែលបានរៀបចំប្រារព្ធឡើងអស់រយៈពេល៦ឆ្នាំជាប់ៗគ្នាកន្លងមក។
សៀមរាបសង្ក្រាន្តឆ្នាំទី១នេះ បានបើកដំណើរការ ក្រោមអធិបតីភាពដ៏ខ្ពង់ខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ និង ជាប្រធានក្រុមការងារថ្នាក់ជាតិចុះជួយខេត្តសៀមរាប រួមទាំងឥស្សរជនថ្នាក់ជាតិ ថ្នាក់ដឹកនាំខេត្ត ព្រមទាំងថ្នាក់ដឹកនាំមន្ទីរអង្គភាពស្ថាប័ននានាក្នុងខេត្ត មន្ត្រីរាជការប្រជាពលរដ្ឋ យុវជននិងយុវនារី ចូលរួមយ៉ាងច្រើនកុះករ ។
ឯកឧត្តម ទៀ សីហា អភិបាលនៃគណៈអភិបាលខេត្តខេត្តសៀមរាប បានឲ្យដឹងថា៖ សៀមរាប-សង្ក្រាន្ត គឺជាការជួបជុំមហាជន យុវជន មហាគ្រួសារខ្មែរ នឹង ផ្តល់ឱកាសឲ្យយុវជន ប្រជាពលរដ្ឋ ភ្ញៀវទេសចរជាតិ និងអន្តរជាតិ បានស្វែងយល់អំពីជំនឿសាសនា បានឃើញនិងសិក្សាបន្ថែម អំពីភាពរុងរឿងល្បីល្បាញ សម្បូរបែបនៃវប្បធម៍ អរិយធម៍ ទំនៀមទម្លាប់ ប្រពៃណីខ្មែរ និងបន្តថែរក្សា កេរមរតកទាំងនេះឲ្យបានគង់វង្ស បំផុសគំនិតរួបរួមកម្លាំងមហាសាមគ្គី និង បណ្តុះស្មារតីអភិរក្សដើម្បីអភិវឌ្ឍ អភិវឌ្ឍដើម្បីអភិរក្សវប្បធម៌ប្រពៃណី និង អត្តសញ្ញាណជាតិខ្មែរ ក្នុងសម័យកាលសាកលភាវូបនីយកម្មទំនើបជំនាន់ថ្មីនេះ ព្រមទាំងជាការផ្តល់ឱកាសឲ្យពាណិជ្ជករ អាជីវករចូលរួមតាំងបង្ហាញផលិតផលវត្ថុអនុស្សាវរីយ៍ ម្ហូបអាហារ ដោយទៅលើការបង្ហាញពីអត្តសញ្ញាណវប្បធម៌ក្នុងតំបន់ ។
ថ្លែងក្នុងឱកាសបើក ព្រឹត្តិការណ៍សៀមរាបសង្ក្រាន្តលើកទី១ សម្ដេចពិជ័យសេនា ទៀ បាញ់ បានមានប្រសាសន៍ ថា នេះគឺលើកទី១ហើយ នៃព្រឹត្តិការណ៍សៀមរាបសង្ក្រាន្ត ហើយឆ្នាំនេះសង្ក្រាន្តឆ្នាំថ្មីត្រូវបានរៀបចំឡើងនៅតាមបណ្ដារាជធានី ខេត្តនៃព្រះរាជាណាចក្រកម្ពុជា ដើម្បីបង្ហាញ អំពីកេរ្តិ៍តំណែលវប្បធម៌ ទំនៀមទម្លាប់ប្រពៃណីដ៏ផូរផង់ខ្មែរយើង ដែលជាមោទនៈភាពជាតិ ។ សម្ដេចពិជ័យសេនា បានថ្លែងកោតសរសើរ ដល់អាជ្ញាធរខេត្ត កងកម្លាំងប្រដាប់អាវុធ គ្រប់ប្រភេទ និង សហភាពសហព័ន្ធយុវជនកម្ពុជាខេត្ត ដែលបានចូលរួមថែរក្សាការពារ សណ្ដាប់ធ្នាប់ក្នុងព្រឹត្តិការណ៍សៀមរាបសង្ក្រាននេះបានយ៉ាងល្អ ផ្ដល់លទ្ធភាពឲ្យយុវជនយើង បានចូលរួមក្នុងសកម្មភាពផ្សេងៗ ដើម្បីជួយជម្រុញការអភិវឌ្ឍសង្គម ដូចជាព្រឹត្តិការណ៍សៀមរាបសង្ក្រាន្តនេះជាដើម ។ សម្ដេចពិជ័យសេនាបានបន្តទៀតថា ម្យ៉ាងទៀតក៏ជាការផ្ដល់នូវភាពសប្បាយរីករាយ ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ជាសំខាន់ឆ្លុះបញ្ចាំង ពីការសាមគ្គីភាព មិត្តភាព ក្នុងចំណោមមហាក្រុមគ្រួសារខ្មែរទាំងអស់ ជាពិសេសនៅក្នុងស្រទាប់យុវជនយើង ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី