ក្នុងឱកាសបញ្ចប់អាណិត្តបេសកកម្មការទូត រយះពេល៤ ឆ្នាំ នៅព្រះរាជា ណាចក្រកម្ពុជា ឯកឧត្តម ក្រីសស្តូហ្វឺ បាល់តាហ្សា មុនទើរ៉ូ(Christopher Baltazar MONTERO) ឯកអគ្គរដ្ឋទូត នៃ សាធារណរដ្ឋហ្វីលីពីន ប្រចាំកម្ពុជា បានអញ្ជើញចូលជួប ជម្រាបលា ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន នៅព្រឹកថ្ងៃទី ១៩ ខែ មេសា ឆ្នាំ ២០១៩ នាទី ស្តីការក្រសួងព័ត៌មាន ។
នៅក្នុងឱកាសនោះ ឯកឧត្តម ក្រីសស្តូហ្វឺ បាល់តាហ្សា មុនទើរ៉ូ(Christopher Baltazar MONTERO) ឯកអគ្គរដ្ឋទូត នៃ សាធារណរដ្ឋហ្វីលីពីន ប្រចាំកម្ពុជា បានសំដែងនូវការរីករាយ ដែលបានមក បំពេញ បេសកកម្មការងារ ការទូតរយះ ៤ ឆ្នាំនៅកម្ពុជា ហើយសម្រេចបាន លទ្ធផលការងារល្អ ពិសេសទទួលបានការគាំទ្រ និងកិច្ចសហការ ពីគ្រប់បណ្តា ស្ថាប័នរបស់ រាជរដ្ឋាភិបាលកម្ពុជា ក៏ដូចជាក្រសួងព័ត៌មាន ផងដែរ។ ជាងនេះ ទៅទៀត ក្នុងពេលដែលរូបលោក បំពេញកិច្ចការងារនៅទីនេះ ហើយបានធ្វើ ដំណើរទៅកន្លែងផ្សេងៗ គេថាមុខរបស់លោក ដូចជាជនជាតិកម្ពុជា បើសិនជា គេមិនបានដឹងច្បាស់ថា លោកជាជានជាតិហ្វីលីពីន នោះ។
ឯកឧត្តម ឯកអគ្គរដ្ឋទូត ក៏បានលើកពីចំណង មិត្តភាព និងកិច្ចសហប្រតិបត្តិការល្អ រវាង ប្រទស ហ្វីលីពីន និង ប្រទេសកម្ពុជា តាំងពីយូរមកហើយ ពិសេសក្នុងដំណើរ ទស្សនះ កិច្ចជាផ្លូវរដ្ឋ របស់ ប្រធានាធិបតីហ្វីលីពីន ឌូដឺតេ មកកាន់កម្ពុជា នាពេលកន្លង មក ក៏ដូច ជា កីឡាប្រដាល់ពិភពលោក ប៉ាគីអាល់ របស់ហ្វីលីពីន ដែលជាការ បង្ហាញនូវ កិច្ចទំនាក់ទនងដ៏ល្អ រវាងប្រទេសទាំង ២ ហើយកាលនោះ ទទួលបាន នូវការស្វាគមន៏យ៉ាងកក់ក្តៅ ពីសំណាក់ថ្នាក់ដឹកនាំ និងប្រជាជនកម្ពុជា ។
នៅក្នុងឱកាសនោះដែរ ឯកឧត្តម ឯកអគ្គរដ្ឋទូតហ្វីលីពីន បានលើកពីចំណាប់ អារម្មណ៏ និងការយល់ឃើញនូវចំណុចមួយ ទាក់ទងទៅនិងសហគមអាស៊ាន ដែលមានបណ្តាប្រទេសមួយចំនួន មិនបានប្រើប្រាស់ភាសា អង់គ្លេស អោយ បានទូលំទូលាយ ដើម្បីអោយមានការយល់ដឹងពី អាស៊ាន បានកាន់តែស៊ីជម្រៅ ដែលប្រការនេះ ត្រូវមានការជម្រុញអោយបានដឹងបន្ថែមទៀត។
ឯកឧត្តម រដ្ឋមន្ត្រី ខៀវ កាញារីទ្ធ បានសំដែងការវាយតំលៃខ្ពស់ចំពោះលទ្ធផល ការងារ ប្រកបដោយលទ្ធផលផ្លែផ្កា ក្នុងអាណិត្តបេសកកម្មការទូត ប្រចាំកម្ពុជា របស់ ឯកឧត្តម ក្រីសស្តូហ្វឺ បាល់តាហ្សា មុនទើរ៉ូ(Christopher Baltazar MONTERO) ឯកអគ្គរដ្ឋទូត នៃ សាធារណរដ្ឋ ហ្វីលីពីន ដោយបានចូលរួមចំណេកក្នុងការធ្វើអោយរាល់ចំណងមិត្តភាព និង កិច្ចសហប្រតិបត្តិការ លើគ្រប់ផ្នែក គ្រប់វិស័យ នៃប្រទេសទាំង ពីរ កម្ពុជា ហ្វីលីពីន បានកាន់តែល្អប្រសើរ ជាពិសេសលើកិច្ចការងារការទូតបានយ៉ាងល្អ។
ឯកឧត្តម រដ្ឋមន្ត្រី ខៀវ កាញារីទ្ធ និង ឯកឧត្តម ឯកអគ្គរដ្ឋទូត ហ្វីលីពីន បានលើកឡើនូវ ចំនុចការងារសំខាន់ៗមួយចំនួន ដែលធ្លាប់បំពេញជាមួយគ្នា ក្នុងរយះពេល កន្លងមក ដោយទទួលបានលទ្ធផលជា វិជ្ជមាន។ តាមរយះនេះ ឯកឧត្តម រដ្ឋមន្ត្រី ខៀវ កាញារីទ្ធ បានជូនពរ អោយ ឯកឧត្តម ក្រីសស្តូហ្វឺ បាល់តាហ្សា មុនទើរ៉ូ(Christopher Baltazar MONTERO) ឯកអគ្គ រដ្ឋទូត នៃ សាធារណរដ្ឋហ្វីលីពីន ដែលទើបបញ្ចប់អាណិត្តការទូត នៅកម្ពុជា ពេលត្រូវទៅបំពេញ កិច្ចការងារ នៅកន្លែងផ្សេងទៀត សូមទទួលបានជោគជ័យ បន្តទៀត ៕
អត្ថបទ និង រូបភាព ៖ ក្រសួងព័ត៌មាន
