ក្នុងឱកាសជួបពិភាក្សាការងារជាមួយឯកឧត្តម ទៀ សីហា អភិបាលខេត្តសៀមរាប កាលពីរសៀលថ្ងៃទី១៩ ខែមេសា ឆ្នាំ២០១៩ ម្សិលមិញនេះ លោក Xiang Qiongha ប្រធានប្រតិភូខេត្តស៊ីឈួន នៃសាធារណរដ្ឋប្រជាមានិតចិន បានមានប្រសាសន៍ថា គោលបំណងនៃដំណើរទស្សនកិច្ចនៅខេត្តសៀមរាបនាពេលនេះ គឺដើម្បីត្រួតពិនិត្យ ស្វែងយល់ និង រកឱកាសឲ្យខេត្តស៊ីឈួន បានចូលរួមក្នុងកម្មវិធីខ្សែក្រវ៉ាត់មួយផ្លូវមួយឲ្យកាន់តែសកម្ម ក្នុងការផ្សាភ្ជាប់ចំណងមិត្តភាពនៃប្រទេសទាំងពីរ និង ការអភិវឌ្ឍរបស់ប្រទេសកម្ពុជា សំខាន់គឺខេត្តសៀមរាប ដែលជាខេត្តសម្ព័ន្ធមេត្រីភាពនឹងគ្នា ។
លោកមានប្រសាសន៍ទៀតថា ខេត្តស៊ីឈួន ជាខេត្តមានសក្តានុពលលើវិស័យទេសចរណ៍ដូចនឹងខេត្តសៀមរាបដែរ ដោយសារមានតំបន់ចំនួន៥ ត្រូវបានចុះបញ្ជូលជាសម្បត្តិបេតិកភណ្ឌពិភពលោក ដូចប្រាសាទអង្គរវត្ត ហើយខេត្តស៊ីឈួន ជាខេត្តធំលំដាប់លេខ៣ នៃប្រទេសចិន ក្នុងវិស័យកសិកម្មប្រកបទៅដោយបច្ចេកវិទ្យាទំនើប និង មានគុណភាពខ្ពស់ ដូច្នេះនៅក្នុងឱកាសដ៏ល្អនេះ សូមសំណូមពរពីឯកឧត្ដមអភិបាលខេត្តសៀមរាប ឲ្យបងប្អូនជាពាណិជ្ជករចិនបានចូលមកសិក្សាស្រាវជ្រាវ ស្វែងយល់ នៅខេត្តសៀមរាប ដើម្បីចូលមកបណ្តាក់ទុនវិនិយោគ ដើម្បីចាប់ដៃគ្នាជំរុញឲ្យដំណើរការក្នុងវិស័យកសិកម្ម , ទេសចរណ៍ , ពាណិជ្ជកម្ម និង អប់រំ រវាងខេត្តទាំងពីរឲ្យមានការអភិវឌ្ឍរីកចម្រើនពិសេសលើការបណ្តុះបណ្តាលនូវធនធានមនុស្ស ។
ជាការឆ្លើយតប ឯកឧត្តម ទៀ សីហា បានសម្ដែងនូវគាំទ្រទៅនឹងគំនិតផ្ដួចផ្ដើមនេះ ហើយអាជ្ញាធរខេត្ត និង អង្គភាពពាក់ព័ន្ធទាំងអស់ក្នុងខេត្ត ត្រៀមសហការគ្រប់ពេលវេលា ដើម្បីធ្វើឲ្យខេត្តយើងទាំងពីរ សៀមរាប-ស៊ីឈួន កាន់តែមានការអភិវឌ្ឍថ្មីៗបន្ថែមទៀត ខណៈដែលខេត្តសៀមរាប ក្រៅពីវិស័យទេសចរណ៍ ដែលជាវិស័យមានសក្ដានុពលដ៏ធំមួយរបស់កម្ពុជា ដោយសារមានប្រាង្គប្រាសាទបុរាណប្រវត្តិសាស្ត្ររាប់ពាន់ប្រាសាទ រួមជាមួយនឹងរមណីយដ្ឋានធម្មជាតិជាច្រើនកន្លែងទៀតនោះ វិស័យកសិកម្ម ក៏ជាវិស័យនាំមុខផងដែរសម្រាប់ខេត្តសៀមរាប ដែលប្រជាពលរដ្ឋចំនួន៨០ភាគរយជាប្រជាកសិករ ។
ឯកឧត្តម ទៀ សីហា មានប្រសាសន៍ទៀតថា ស្របពេលដែលប្រមុខរាជរដ្ឋាភិបាលកម្ពុជា បានជំរុញឱ្យគ្រប់ស្ថាប័នរដ្ឋ និងឯកជន បន្តស្វះស្វែងរកមិត្តភក្តិ និងដៃគូពាណិជ្ជកម្ម ក៏ដូចជាវិនិយោគគិនជាតិ អន្តរជាតិ ឱ្យមករកស៊ីនៅកម្ពុជាកាន់តែច្រើន ដើម្បីបន្តកំណើនសេដ្ឋកិច្ចប្រទេស និងលើកកម្ពស់ជីវភាពប្រសើរឡើងរបស់ប្រជាពលរដ្ឋ ដូច្នេះសំណូមពរដល់ប្រតិភូខេត្តស៊ីឈួន នៃប្រទេសចិន ឱ្យពិនិត្យលទ្ធភាពក្នុងការបញ្ជូនអ្នកវិនិយោគរបស់ខ្លួន មកខេត្តសៀមរាបឱ្យបានកាន់តែច្រើន ខណៈដែលខេត្តសៀមរាបកំពុងមានសក្តានុពល ដើម្បីវិនិយោគទទួលបានផលចំណេញ។
គួរជម្រាបថា គំនិតផ្តួចផ្តើម «ខ្សែក្រវាត់មួយផ្លូវមួយ» គឺជាផែនការប្រកបដោយមហិច្ឆតារបស់លោក ស៊ី ជិនពីង ស្តីពីការបង្កើតបណ្តាញហេដ្ឋារចនាសម្ព័ន្ធដ៏ធំធេងមួយ ក្រោមទិសដៅតភ្ជាប់ទំនាក់ទំនងពាណិជ្ជកម្មរវាងអាស៊ី អឺរ៉ុប មជ្ឈិមបូព៌ា និងអាហ្រិ្វក តាមរយៈផ្លូវគោកនិងផ្លូវទឹក ខណៈចិនបានចាត់ទុកគម្រោងនេះប្រៀបដូចជាការបង្កើតវិថីសូត្រថ្មីរបស់ខ្លួន ហើយមានប្រទេសចំនួន១២៦ និងអង្គការអន្តរជាតិចំនួន២៩ហើយ បានចុះកិច្ចព្រមព្រៀងសហប្រតិបត្តិការជាមួយចិន ដើម្បីរួមគ្នាកសាងគម្រោងនេះ ៕
អត្ថបទ និង រូបថត ៖ លោក ម៉ី សុខារឹទ្ធ
កែសម្រួលអត្ថបទ ៖ លោក លីវ សាន្ត
