នៅរសៀលថ្ងៃទី២១ ខែមេសា ឆ្នាំ២០១៩ ថ្នាក់ដឹកនាំនៃក្រសួងអប់រំយុវជន និងកីឡា បានប្រកាសបើកការប្រឡងជ្រើសរើសសិស្សពូកែទូទាំងប្រទេសប្រចាំឆ្នាំលើកទី២៦ ឆ្នាំ២០១៩ហើយ ដែលមានវិញ្ញាសារដូចជា ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និង ទី១២ នៅវិទ្យាល័យ ១០មករា ១៩៧៩ ក្នុងក្រុងសៀមរាប ខេត្តសៀមរាប។
ការប្រឡងនេះ នឹងដំណើរការ រយៈចំនួន ៣ព្រឹក ចាប់ពីថ្ងៃទី២២ ដល់ ២៤ខែមេសា ឆ្នាំ២០១៩ នៅមណ្ឌលប្រឡងវិទ្យាល័យ ១០មករា ១៩៧៩ កណ្ដាលក្រុងសៀមរាប។
ក្នុងរបាយការណ៍របស់លោក អ៊ឹង ង៉ោហុក ប្រធាននាយកដ្ឋានកិច្ចការប្រឡង បានឱ្យដឹងថា៖ ការប្រឡងឆ្នាំនេះ មានបេក្ខជនចំនួន៤៨០នាក់ ក្នុងនោះស្រី២៤៧នាក់ (ថ្នាក់ទី៩ សរុបចំនួន២៤០នាក់ ស្រី១៣៩នាក់ ថ្នាក់ទី១២ សរុបចំនួន២៤០នាក់ ស្រី១០៧នាក់) ពួកគេត្រូវបានប្រឡងជ្រើសរើសជាសិស្សពូកែថ្នាក់ទី៩ និងទី១២ តាមបណ្តាសាលា និងគ្រឺះស្ថានសិក្សាទាំង២៥ រាជធានី-ខេត្ត ចំនួន១,៧៧១កន្លែង នៅទូទាំងប្រទេស និងត្រូវបានក្រសួងអប់រំយុវជននិងកីឡាអនុញ្ញាត ឲ្យបញ្ជូនក្នុងម្នាក់មួយមុខវិជ្ជា និងមួយកម្រិតថ្នាក់។ ផ្នែកបច្ចេកទេសវិញ ត្រូវបានចែកជា២០បន្ទប់ មួយបន្ទប់មានបេក្ខជន ២៤នាក់ ក្នុងនោះវិញ្ញាសារ អក្សរសិល្ប៍ខ្មែរ៨នាក់ ផ្នែកគណិតវិទ្យា៨នាក់ និងរូបវិទ្យា៨នាក់ ដោយអង្គុយឆ្លាស់ និងចម្រុះគ្នាទៅតាមកម្រិតថ្នាក់និងតាមអក្ខរក្រម ចម្រុះរាជធានី-ខេត្ត។
បណ្ឌិតសភាចារ្យ រដ្ឋលេខាធិការក្រសួងអប់រំ ឯកឧត្តម ណាត ប៊ុនរឿន បានរំលឹកប្រសាសន៍ដ៏មានតម្លៃ របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលធ្លាប់មានប្រសាសន៍កន្លងមកថា ៖ ទោះបីប្រទេសជាតិសម្បូរទៅដោយធនធានធម្មជាតិច្រើនយ៉ាងណាក្តី តែបើប្រទេសជាតិនៅមានកង្វះធនធានមនុស្ស នោះធនធានធម្មជាតិ និងកំណប់នៅក្នុងដីទាំងប៉ុន្មាន វាគ្មានប្រយោជន៍អ្វីនោះទេ ព្រោះថាកំណប់ ដែលជីកយកបានពីក្នុងខួរក្បាលមនុស្ស ប្រសើរជាងកំណប់ដែលជីកយកបានពីក្នុងដី។
ទន្ទឹមនឹងប្រសាសន៍ដ៏ថ្លៃថ្លារបស់សម្តេចតេជោ នាយករដ្ឋមន្ត្រី ក្រសួងអប់រំ និងរាជរដ្ឋាភិបាល តែងតែយកចិត្តទុកដាក់ ពិសេសចំពោះយុវជនដែលមានទេពកោសល្យខ្ពស់ ពូកែ ដែលជាសសរទ្រូងដ៏រឹងមាំនៃប្រទេសជាតិ និងជាអ្នកស្នងសម្រាប់អនាគត ដោយបានបង្កើតឲ្យមានថ្នាក់សិស្សពូកែ ទៅតាមសមត្ថភាពជាក់ស្តែង នៃគ្រឹះស្ថានមធ្យមសិក្សានេះឡើង ។ ជារៀងរាល់ឆ្នាំ ក្រសួងអប់រំ បានរៀបចំការប្រឡងជ្រើសរើសសិស្សពូកែប្រកបដោយជោគជ័យ ហើយជាគោលការណ៍ គឺត្រូវជ្រើសរើសយកជ័យលាភីសិស្សពូកែថ្នាក់ទី៩ និង ថ្នាក់ទី១២ ចំនួន១០នាក់ ក្នុងមួយមុខវិជ្ជា និង មួយកម្រិតថ្នាក់ ។ ហើយការប្រឡងសិស្សពូកែនេះ គឺជាចំណែកមួយនៃយន្តការ ជំរុញឲ្យមានប្រសិទ្ធភាពនៃការផលិតធនធានមនុស្សប្រកបដោយគុណភាព ។
បើតាមរបាយការណ៍ របស់ក្រសួងអប់រំបានបញ្ចាក់ថា ជាការកត់សម្គាល់ ឆ្នាំ២០១៩នេះ មានគ្រឹះស្ថានមធ្យមសិក្សាថ្មីចំនួន២០បន្ថែមទៀត បានបញ្ជូនបេក្ខជនឲ្យចូលរួមប្រឡង ហើយចំនួនបេក្ខជនតាមរាជធានី-ខេត្ត ត្រូវបានកំណត់តាមមុខវិជ្ជា និងយកតាមសមាមាត្រនៃចំនួនសិស្សដែលកំពុងសិក្សាជាក់ស្តែង លើកលែងតែខេត្តតូច ក្រសួងបានអនុញ្ញាតិឲ្យបញ្ជូនបេក្ខជន ចំនួនម្នាក់ក្នុងមួយមុខវិជ្ជា និង ក្នុងមួយកម្រឹតថ្នាក់។
គួររំលឹកថា នេះជាលើកទី៦ហើយ ដែលខេត្តសៀមរាបបានធ្វើជាម្ចាស់ផ្ទះ រៀបចំការការប្រឡងជ្រើសរើសសិស្សពូកែប្រចាំឆ្នាំទូទាំងប្រទេសនេះ។
អត្ថបទ និង រូបថត : លោក យូ វង្ស និង លោក ងិន គឺមឡេង
កែសម្រួលអត្ថបទ : លោក សេង ផល្លី
