គម្រោងសាងសង់ផ្លូវបេតុងអាមេមួយខ្សែ ស្ថិតក្នុងឃុំខ្នងភ្នំ ស្រុកស្វាយលើ ខេត្តសៀមរាប ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅថ្ងៃទី២៣ ខែមិថុនា ឆ្នាំ២០២៣នេះ ដោយមានការចូលរួមពីមន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណៈកម្មការលទ្ធកម្មឃុំផងដែរ។
បើតាមលោក ឈឿម តាំង ប្រធានគណៈកម្មការលទ្ធកម្មឃុំខ្នងភ្នំ បានឲ្យដឹងថា សម្រាប់គម្រោងផ្លូវបេតុងអាមេ ១ខ្សែស្ថិតក្នុងភូមិតាហាន ដែលគណៈកម្មការលទ្ធឃុំ បានដាក់ឲ្យដេញថ្លៃសាងសង់នាពេលនេះ មានប្រវែង ៣១០ម៉ែត្រ ទទឹង៣ម៉ែត្រ កម្រាស់បេតុង ០,១៥ម៉ែត្រ និិងស្លាកសញ្ញាគម្រោងចំនួន១ ក្នុងតម្លៃប៉ានស្មាន ១៣៨.៦១៧.១៣៤រៀល។ ជាមួយគ្នានោះ គម្រោងនេះមានក្រុមហ៊ុនម៉ៅការដាក់សំណើដេញថ្លៃចំនួន ៤ក្រុមហ៊ុន ហើយក្រោយពីបានពិនិត្យ និងវាយតម្លៃលើសំណុំឯកសារដំណើរដេញថ្លៃរបស់អ្នកទទួលការមក ជាលទ្ធផលបានទៅលើក្រុមហ៊ុន ម៉ូវ សៀកផៃ ក្នុងទឹកប្រាក់ចំនួន ១៣៧.០០០.០០០រៀល។
មានប្រសាសន៍ក្នុងឱកាសនោះដែរ លោក ឡុង ហំ អភិបាលរងស្រុកស្វាយលើ បានណែនាំដល់ម្ចាស់ក្រុមហ៊ុនម៉ៅការដែលទទួលបានសិទ្ធសាងសង់ ធ្វើយ៉ាងណាត្រូវមានការទទួលខុសត្រូវចំពោះក្រុមការងារ ដោយអនុវត្តទៅតាមលក្ខខណ្ឌដែឡបានសន្យា ធ្វើយ៉ាងណាឲ្យការងារជួសជុលនេះសម្រេចបានទៅតាមការគ្រោងទុក និងមានគុណភាពល្អ។ ក្នុងនោះដែរគ្រប់ក្រុមហ៊ុនត្រូវមានការសហការគ្នាឲ្យបានជិតស្និតក្នុងការអនុវត្តការងារនេះ ហើយអាជ្ញាធរមូលដ្ឋានត្រូវតាមដានជាប្រចាំទៅលើការងារជួសជុលផ្លូវក្នុងមូលដ្ឋានខ្លួន ហើយប្រសិនបើក្រុមហ៊ុនណាមិនអនុវត្តតាមគោលការ អាជ្ញាធរឃុំត្រូវមានវិធានការចាំបាច់ណាមួយក្នុងការដោះស្រាយ និងអាចរាយការណ៍មកកាន់អាជ្ញាធរស្រុកដោះស្រាយបន្តក្នុងករណីចាំបាច់។
ក្រោយបញ្ចប់គម្រោងនៃការដេញថ្លៃនេះ ចំពោះក្រុមដែលទទួលបានការម៉ៅការគម្រោងជួសជុលផ្លូវខាងលើ បានធ្វើការប្ដេជ្ញាចិត្ត ដោយសន្យាថា នឹងអនុវត្តការងារជួសជុលផ្លូវទាំង២ខ្សែនេះឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ហ៊ុន ឆៃលាង
កែសម្រួល៖ លោក អ៊ុន ណារាជ្យ
