លោក ចឹង កុងស៊ុន អនុប្រធានគម្រោងកែលម្អស្ទឹងសៀមរាប ដំណាក់កាលទី២ បានឲ្យដឹងនៅព្រឹកថ្ងៃទី២៦ ខែមិថុនា ឆ្នាំ២០២៣នេះថា គម្រោងកែល្អនៅលើដងស្ទឹងសៀមរាប ចាប់ពីស្ពានផ្លូវក្រវាត់ក្រុង ឬស្ពានគង់ម៉ុច ទៅដល់ចុងភូមិអារញ្ញ សង្កាត់សៀមរាប ក្រុងសៀមរាប ដែលមានប្រវែងជិត៥ពាន់ម៉ែត្រ ដែលមានគម្រោងធំៗដូចជា ការកែលម្អមាត់ស្ទឹង , ការសង់ស្ពានថ្មថ្មីចំនួន៣ទីតាំង , ការស្ថាបនាផ្លូវបេតុងនៅម្ខាងស្ទឹង , ការស្ថាបនាប្រព័ន្ធធារាសាស្ត្រ និងការស្ថាបនាទំនប់បង្ហៀរទឹក គិតមកទល់ពេលនេះ សម្រេចបានប្រមាណ៤០ភាគរយហើយ។
លោកបន្តថា គម្រោងកែលម្អស្ទឹងនេះ ក្រៅពីការលើកកម្ពស់សោភ័ណភាពស្ទឹងប្រវត្តិសាស្ត្រសៀមរាប ស្ទឹងនេះក៏ក្លាយជាប្រព័ន្ធធារាសាស្ត្រមួយដ៏សំខាន់ក្នុងការបញ្ចៀសក្រុងសៀមរាបពីការលិចលង់ដោយសារទឹកជំនន់ ខណៈគម្រោងស្តារស្ទឹងសៀមរាបដំណាក់កាលទី២នេះ បានចាប់ផ្តើមកាលពីថ្ងៃទី១៦ ខែឧសភា ឆ្នាំ២០២២ ក្រោមជំនួយរបស់កូរ៉េ ដែលគ្រោងនឹងបញ្ចប់ នៅពាក់កណ្តាលឆ្នាំ២០២៤ ។
ពាក់ព័ន្ធនឹងបញ្ហានេះ ប្រជាពលរដ្ឋដែលរស់នៅតាមមាត់ស្ទឹងដែលកំពុងអនុវត្តគម្រោងនេះ បានថ្លែងនូវការសាទរ ដោយរំពឹងថា បន្ទាប់ពីបញ្ចប់គម្រោង ភូមិដ្ឋានគាត់នឹងលែងមានទឹកលិចលង់ ហើយពួកគាត់ក៏មានផ្លូវបេតុង និងស្ពានថ្មី សម្រាប់សម្រួលនៅក្នុងការធ្វើដំណើរផងដែរ។
អ្នកស្រី សូរិយា រស់នៅប្របមាត់ស្ទឹងក្នុងភូមិស្ពានជ្រាវ សង្កាត់សៀមរាប បានរៀបរាប់ថា កាលពីមុនឲ្យតែដល់ខែភ្លៀងម្តងៗ ពួកគាត់ពិបាកក្នុងការធ្វើដំណើរខ្លាំងមែនទែន ដោយសារតែផ្លូវត្រូវទឹកលិច ។ ចំណែកអ្នកស្រី សុវណ្ណនី ជាអ្នកភូមិស្ពានជ្រាវដែរនោះ ក៏បានអះអាងដែរថា គាត់មានការសប្បាយចិត្តនៅពេលដែលមានការអនុវត្តគម្រោងកែលម្អស្ទឹង ធ្វើស្ពានថ្មថ្មី និងធ្វើផ្លូវបេតុង ហើយអ្នកស្រីរំពឹងថា ភូមិដ្ឋានរបស់អ្នកស្រីនឹងលែងលិចទឹក ក្នុងនោះមាត់ស្ទឹងក៏មានសោភ័ណភាពល្អដែរ នៅពេលការអនុវត្តគម្រោងចប់ ៕
អត្ថបទ និងរូបភាព៖ លោក ជា ស្រស់
កែសម្រួល៖ លីវ សាន្ត
