គម្រោងសាងសង់ផ្លូវបេតុងអាមេ និងជួសជុលផ្លូវដីសក្រាលគ្រួសធម្មជាតិចំនួន២ខ្សែ ក្នុងឃុំត្រីញ័រ និងឃុំសសរស្ដម្ភ ស្រុកពួក ខេត្តសៀមរាប ដែលជាការចំណាយរបស់គម្រោងមូលនិធិឃុំឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅព្រឹកថ្ងៃទី២៦ ខែមិថុនា ឆ្នាំ២០២៣នេះ ដោយមានការចូលរួមពីមន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណៈកម្មការលទ្ធកម្មឃុំទាំងពីរ រួមនឹងតំណាងក្រុមហ៊ុនដេញថ្លៃផងដែរ។
បើតាមគណៈកម្មការលទ្ធកម្មឃុំសសរស្ដម្ភ បានឲ្យដឹងថា គម្រោងដែលបានបើកការដេញថ្លៃនាពេលនេះ គឺគម្រោងសាងសង់ផ្លូវបេតុងអាមេ មួយខ្សែប្រវែង ១៦៣ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ លូការពារផ្លូវពីរកន្លែង ក្នុងតម្លៃប៉ាន់ស្មាន ១១៤.៣៥២.២០៩រៀល ដោយមានក្រុមហ៊ុនចូលរួមដេញថ្លៃចំនួនបួន។ ជាលទ្ធផលបានទៅលើក្រុមហ៊ុន ស៊ិម វឌ្ឍនា ក្នុងតម្លៃ ១១២.៦៣៣.០០០រៀល។
ដោយឡែកគណៈកម្មការលទ្ធកម្មឃុំត្រីញ័រ បានឲ្យដឹងដែលថា គម្រោងដែលបានបើកការដេញថ្លៃនាពេលនេះគឺជួសជុលផ្លូវដីសក្រាលគ្រួសធម្មជាតិ មួយខ្សែប្រវែង៨០០០ម៉ែត្រ ទទឹង៥ម៉ែត្រ កម្ពស់០.១៥ម៉ែត្រ លូការពារផ្លូវ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១០៤.៧៤០.៣២០រៀល ដោយមានក្រុមហ៊ុនចូលរួមដេញថ្លៃចំនួនបួន។ជាលទ្ធផលបានទៅលើក្រុមហ៊ុន អ៊ី សៀងហៃ ក្នុងតម្លៃ ១០៣.០២០.០០០រៀល។
ជាមួយគ្នានោះ ក្រុមហ៊ុន ដែលទទួលបានការម៉ៅការគម្រោងផ្លូវទាំងពីរខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ អ៊ុន ណារាជ្យ
