“សមុទ្រសៀមរាប” ដែរជាឈ្មោះដែលអ្នទេសចណ៍តែងហៅតគ្នា ដែលជាទីតាំងទេសចណ៍ធម្មជាតិមួយផ្នែក នៃរមណីដ្ឋានបារាយណ៍ទឹកថ្លា ក៏ដូចជាវត្តបារាយមហានទីរតនារាម ហៅវត្តស្វាយរមៀត ហើយមួយរយៈចុងក្រោយគេសង្កេតឃើញថា មានប្រជាពលរដ្ឋក្នុងខេត្តសៀមរាប សៀមរាប រួមនឹងភ្ញៀវជាតិ និងអន្តរជាតិមកលេងកំសាន្ត ស្រូបយកខ្យល់បរិសុទ្ធ គយគនទិដ្ឋភាពនៃថ្ងៃរៀបលិចដ៏ស្រស់ត្រកាលគួរឲ្យទាក់ទាញ។
បើតាមកញ្ញា ស៊ុន វីណា ប្រធានគ្រប់គ្រងភ្នាក់ងារទេសចរណ៍ នៃអាជ្ញាធរជាតិអប្សរាប្រចាំតំបន់រមណីយដ្ឋានបារាយទឹកថ្លា បានឲ្យដឹងនៅរសៀលថ្ងៃទី២៦ ខែមិថុនា ឆ្នាំ២០២៣នេះថា នៅក្នុងខែមិថុនា ឆ្នាំ២០២៣ សម្រាប់តំបន់រម្មណីយដ្ឋានបារាយទឹកថ្លា យើងឃើញថា នៅទីនេះមានភ្ញៀវជាតិ និងអន្តរជាតិជាច្រើនបានសម្រុកមកលេងកំសាន្តលំហែកាយ បន្ធូរអារម្មណ៍ ជាពិសេសនៅមាត់បារាយទឹកថ្លាប៉ែកខាងកើត ឆៀងខាងត្បូងជាប់វត្តស្វាយរមៀតនេះតែម្តង។ ជាមួយគ្នានោះ ដោយសារកំណើននៃអ្នកមកកំសាន្តធ្វើឲ្យមានការកកស្ទះក្នុងពេលធ្វើដំណើរទាំងឡានទាំងម៉ូតូចុះឡើងៗ ទើបអាជ្ញាធរជាតិអប្សរា សម្រេចធ្វើការបោះបង្កោលបិទផ្លូវត្រង់ចំណុចមាត់បារាយទឹកថ្លា ជាប់ខាងលិចវត្តស្វាយរមៀត មិនអនុញ្ញាតិឲ្យឡានតូចធំចុះទៅក្នុងបារាយទឹកថ្លាទៀត ប៉ុន្តែអនុញ្ញាតឲ្យបងប្អូនអាចធ្វើដំណើរដោយម៉ូតូ និងថ្មើជើងបាន។ ជាមួយគ្នានោះ អាជ្ញាធរជាតិអប្សរា ក៏សូមសំណូមពរដល់អ្នទេសរណ៍ សូមចូលរួមថែរក្សាអនាម័យ បរិស្ថានឲ្យបានស្អាតល្អរៀងៗខ្លួន មុននឹងចាកចេញទៅវិញ ជាពិសេសគឺហាមយកស្រាមកទទួលទាន និងចាក់បាស់លឺខ្លាំងៗនៅទីកន្លែងដែលអាជ្ញាធរហាមឃាត់ផងដែរ។
ចំណែកអ្នកទេសចរណ៍ដែលបានមកលេងទីតាំងនេះ បានលើកឡើងស្រដៀងៗគ្នាថា នៅពេលដែលពួកគាត់មកដល់ទីនេះ ពួកគាត់បានមើលឃើញពីផ្ទៃទឹកដ៏ធំល្វឹងល្វើយដូចសមុទ្រនៃទឹកបារាយណ៍ ដែលអ្នកទេសចរណ៍តែងហៅថា “សមុទ្រសៀមរាប” ជាមួយនឹងការអាចស្រូបយកខ្យល់បរិសុទ្ធ មានផាសុខភាព មានអារម្មណ៍ល្អជាទេសភាពនាថ្ងៃរៀបលិច។ ជាមួយគ្នានោះពួកគាត់ក៏បានសំណូមពរដល់បងប្អូនដែលមកកំសាន្តទីនេះ ចូលរួមធ្វើអនាម័យបរិស្ថាន យើងយកអ្វីមកហូប ពេលហូបរួចត្រូវជួយគ្នាប្រមូលយកទៅវិញផង។
ជាមួយគ្នានោះ ព្រះសច្ចានុបាល ភទ្ទកោ នឿម វុទ្ធី ព្រះគ្រូចៅអធិការវត្តស្វាយរមៀត មានសង្ឃដីកាថា ប្រសិនបើអ្នកទេសចណ៍មកលេងនៅមាត់បារាយណ៍ មិនមានកន្លែងចតឡាន ឬម៉ូតូ ក៏អាចមកចតនៅក្នុងបរិវេណវត្តស្វាយរមៀតបាន ដោយមិនមានការគិតប្រាក់ឡើយ ប៉ុន្តែសូមឲ្យតែមានសណ្តាប់របៀបរៀបរយ និងអនាម័យ បរិស្ថានល្អបានហើយ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
