នាព្រឹកថ្ងៃទី២៨ ខែមិថុនា ឆ្នាំ២០២៣ នាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្ម សហការជាមួយអង្គការកម្មសិទ្ធិបញ្ញាពិភពលោក (WIPO) បានរៀបចំសិក្ខាសាលា ស្តីពីការលើកកម្ពស់ចំណេះដឹងនៃការប្រើប្រាស់កម្មសិទ្ធិបញ្ញាសម្រាប់សហគ្រិនស្រ្តី៖ ការកសាងម៉ាកយីហោ ការអភិវឌ្ឍន៍ផលិតផល និងការធ្វើពាណិជ្ជកម្ម ខេត្តសៀមរាប ក្រោមអធិបតីភាព ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធាន នាយកដ្ឋានកម្មសិទ្ធិបញ្ញា និង លោក ដួង ជីដុង (Mr. Duong Chi Dung) ប្រធានផ្នែក នៃប្រទេសដែលមានការអភិវឌ្ឍន៍តិចតួច របស់អង្គការកម្មសិទ្ធិបញ្ញាពិភពលោក រួមនឹងវត្តមានលោកប្រធានមន្ទីរពាណិជ្ជកម្មខេត្ត និងអ្នកពាក់ព័ន្ធជាច្រើនរូប។
លោក ភឿង គឹមលី ប្រធានមន្ទីរពាណិជ្ជកម្មខេត្តសៀមរាប បច្ចុបន្នក្នុងខេត្តសៀមរាប មានក្រុមហ៊ុន សហគ្រាសជាច្រើនដែលកំពុងដំណើរការផលិត និងបង្កើតផលិតផលរបស់ខ្លួន ដើម្បីដាក់លក់នៅលើទីផ្សារ ហើយអត្តសញ្ញាណនៃប្រភពដើមផលិតកម្មបិតលើផលិតផលដែលដាក់លក់នៅលើទីផ្សារ មិនត្រឹមតែផ្ដល់ទំនុកចិត្តដល់អ្នកប្រើប្រាស់ និងពង្រីកទីផ្សារប៉ុណ្ណោះទេ ប៉ុន្តែវាក៏ជាកម្លាំងស្រូបទាញទេសចរណ៍ជាតិ និងបរទេស ឱ្យមកធ្វើទស្សនកិច្ច ដែលជាឱកាសសម្រាប់សហគមន៍កសិកម្ម ឬយុវជនជូនដល់ភ្ញៀវដែលមកកំសាន្តនៅក្នុងតំបន់របស់សហគមន៍ អាចបង្កើតប្រភពចំណូលបន្ថែមទៀតផង និងផ្សព្វផ្សាយពីវប្បធម៌ប្រពៃណីរបស់កម្ពុជាបន្ថែមទៀត។
មានប្រសាសន៍ក្នុងឱកាសនោះ ឯកឧត្តម សួន វិជ្ជា បានបញ្ជាក់ថា បច្ចុប្បន្ន តួនាទីរបស់ស្ត្រីនៅក្នុងសង្គមកម្ពុជា ត្រូវបានរាជរដ្ឋាភិបាលចាត់ទុកថាជាឆ្អឹងខ្នង នៃសេដ្ឋកិច្ច សង្គមជាតិ ដោយស្ត្រីបានចូលរួមយ៉ាងសកម្ម ក្នុងវិស័យសំខាន់ៗដូចជា វិស័យកសិកម្ម ឧស្សាហកម្ម និង សេវាកម្ម ដែលទ្រទ្រង់ដល់កំណើនសេដ្ឋកិច្ច ឱ្យសម្រេចបានជាមធ្យម ក្នុងរង្វង់ ៧ភាគរយ មុនការផ្ទុះឡើងនូវវិបត្តិកូវីដ-១៩ ហើយស្ត្រីក៏ជាផ្នែកមួយដ៏សំខាន់ដែលចូលរួមស្តារឡើងវិញនូវកំណើនសេដ្ឋកិច្ច ឱ្យសម្រេចបាន៥,២ នៅក្នុងឆ្នាំ២០២២។ តាមរយៈកិច្ចខិតខំប្រឹងប្រែងរបស់រាជរដ្ឋាភិបាលនៅក្នុងការលើកកម្ពស់ស្ត្រីឱ្យចូលរួមនៅក្នុងវិស័យសេដ្ឋកិច្ច យើងសង្កេតឃើញ ស្ត្រីប្រមាណ ៦១ភាគរយ បានអភិវឌ្ឍខ្លួនទៅជាម្ចាស់សហគ្រាសធុនមីក្រូតូច និងមធ្យម។ ហើយសមាគមសហគ្រិនស្ត្រីកម្ពុជា និងសហព័ន្ធស្ត្រីអ្នកជំនួញកម្ពុជា កំពុងដើរតួនាទីជាតំណាងឱ្យស្រ្តីក្នុងវិស័យពាណិជ្ជកម្ម ទាំងក្នុងប្រទេស និងក្រៅប្រទេស។ ចំណែកឯនៅតាមបណ្តាសហគមន៍នានា ស្រ្តីកំពុងបង្កើនផលិតភាពសេដ្ឋកិច្ច តាមរយៈការបង្កើតផលិតផលសិប្បកម្ម និងផលិតផលកែច្នៃពីកសិកម្ម ដែលនេះបង្ហាញឱ្យឃើញនូវភាពចាំបាច់បន្ថែមទៀត ដើម្បីគាំទ្រដល់ការរីកចម្រើនធុរកិច្ចដែលដឹកនាំដោយស្ត្រីឱ្យមាននិរន្តភាព និងភាពប្រកួតប្រជែងទាំងទីផ្សារក្នុងស្រុក និងទីផ្សារអន្តរជាតិ។
ឯកឧត្តម សួន វិជ្ជា បានបញ្ជាក់ទៀតថា រាជរដ្ឋាភិបាល ក៏បាននឹងកំពុងជំរុញ និងលើកទឹកចិត្តស្ត្រីនៅកម្ពុជា ឱ្យចូលរួមប្រើប្រាស់សក្តានុពលរបស់ខ្លួននៅក្នុងការចូលរួមអភិវឌ្ឍន៍ជាតិ តាមរយៈការប្រើប្រាស់កម្មសិទ្ធិបញ្ញានៅក្នុងការបង្កើតផលិតផលថ្មីៗរបស់កម្ពុជា ដើម្បីជំរុញការផ្គត់ផ្គង់ក្នុងស្រុក និងនាំចេញ។ ក្នុងនោះដែរ ការប្រកួតប្រជែងនៅលើទីផ្សាក៏មានលក្ខណៈខ្លាំងក្លាផងដែរ ដែលតម្រូវឱ្យសហគ្រិនគ្រប់រូបមិនត្រឹមតែ មានភាពច្នៃប្រតិដ្ឋក្នុងការអភិវឌ្ឍន៍ផលិតផលទំនិញ និងសេវាប៉ុណ្ណោះទេ ប៉ុន្តែត្រូវមានចំណេះដឹងផ្នែកអភិវឌ្ឍន៍កេរ្តិ៍ឈ្មោះម៉ាកផលិតផលឱ្យមានការទទួលស្គាល់ពីអ្នកប្រើប្រាស់ និងមានភាពល្បីល្បាញដើម្បីទាញយកចំណែកទីផ្សារឱ្យបានកាន់តែធំ។ ដូចដែលយើងបានដឹងរួមមកហើយ ម៉ាកសម្គាល់ផលិតផលជាសញ្ញាមួយដែលភ្ជាប់ទំនាក់ទងរវាងផលិតផលជាមួយអ្នកប្រើប្រាស់ឱ្យសម្គាល់បាននូវ គុណភាព ស្តង់ដារ ប្រភពផលិតផល និងព័ត៌មានផ្សេងៗដែលជួយដល់ការសម្រេចចិត្តនៅពេលជ្រើសរើសផលិតផលមកប្រើប្រាស់។ ជាពិសេស យើងកំពុងស្ថិននៅក្នុងសម័យកាលនៃការធ្វើពាណិជ្ជកម្មតាមប្រព័ន្ធអេឡិចត្រូនិចដូច្នេះ ការបំពាក់ម៉ាកផលិតផលឱ្យបានត្រឹមត្រូវ និងការរៀបចំយុទ្ធសាស្ត្រកសាងកេរ្តិ៍ឈ្មោះម៉ាក ជាផ្នែកមួយមិនអាចខ្វះបាននៅក្នុងការឈានចូលទៅកាន់ទីផ្សារ។ ក្នុងនោះនាយកដ្ឋានកម្មសិទ្ធិ ក៏បានកំពុងអនុវត្តច្បាប់ ម៉ាក ពាណិជ្ជនាម និងអំពើ នៃការប្រកួតប្រជែងមិនស្មោះត្រង់ដែលជាឧបករណ៍ដ៏សំខាន់មួយនៅក្នុងកិច្ចការពារដល់ម្ចាស់ម៉ាកស្របច្បាប់ និងធានានូវការប្រកួតប្រជែងស្មោះត្រង់ក្នុងអាជីវកម្ម ដើម្បីជំរុញលើកទឹកចិត្តឱ្យមាននូវនវានុវត្តន៍ភាព ការស្រាវជ្រាវ និងការអភិវឌ្ឍផលិតផលសម្បូរបែប ព្រមទាំងផ្តល់នូវទំនុកចិត្តដល់ ធុរជនទាំងអស់នៅក្នុងប្រទេសកម្ពុជា។
ឯកឧត្តម បានសង្កត់ធ្ងន់ថា ក្នុងគោលដៅពង្រឹងប្រសិទ្ធភាពនៃការផ្តល់សេវាចុះបញ្ជីម៉ាក នាយកដ្ឋានកម្មសិទ្ធិបញ្ញា ក៏បានរៀបចំប្រព័ន្ធស្វ័យប្រវត្តិកម្មពេញលេញសម្រាប់កិច្ចការចុះបញ្ជីម៉ាក និងការបង់កម្រៃសេវាសាធារណៈ តាមប្រព័ន្ធអនឡាញ ព្រមទាំងបានរៀបចំប្រព័ន្ធ Cloud សម្រាប់គ្រប់គ្រងទិន្នន័យ និងឯកសារនៃការចុះបញ្ជីម៉ាក ហើយកំពុងរៀបចំប្រព័ន្ធជូនដំណឹងជាស្វ័យប្រវត្តិអំពីដំណើរការនិងស្ថានភាពនៃការចុះបញ្ជីម៉ាកទៅអ្នកដាក់ពាក្យស្នើសុំ និងភ្នាក់ងារ ដែលរួមចំណែកកាត់បន្ថយពេលវេលា និងបែបបទដែលមានភាពលំបាកស្មុគស្មាញជាបន្តបន្ទាប់។ ជាក់ស្ដែង នាយកដ្ឋានកម្មសិទ្ធិបញ្ញា បានចុះបញ្ជីម៉ាកសរុបចំនួនប្រមាណ១២ម៉ឺនម៉ាក នៅក្នុងឆ្នាំ២០២២ តាមប្រព័ន្ធជាតិ ៣.៥៤៨ម៉ាក និងចុះបញ្ជីម៉ាកតាមប្រព័ន្ធអន្តរជាតិ ២.៦៣៥ម៉ាក។ ជាងនេះទៅទៀត ក្រោមជំនួយបច្ចេកទេសរបស់ដៃគូអភិវឌ្ឍ នាយកដ្ឋានបានគាំទ្រដល់សមាគមក្នុងការចុះបញ្ជីម៉ាកសម្គាល់ភូមិសាស្ត្រទំនិញបន្ថែមចំនួន៤ ដូចជា “ទឹកឃ្មុំព្រៃមណ្ឌលគិរី” “អំបិលកំពតកែប” “បង្កងតាកែវ” និង“ទឹកត្រីកំពតកែប និងបានចុះបញ្ជីម៉ាកសមូហភាពបន្ថែមចំនួន៤ គឺ“អំបុកកំពង់ធំ” “អង្ករព្រះវិហារ” “នំបញ្ចុកសៀមរាប” “ដូងខ្ទិះបាត់ដំបង” ដែលសមិទ្ធផលទាំងអស់ខាងលើនេះ បានរួមចំណែកយ៉ាងសំខាន់ដល់ការលើកកម្ពស់កេរ្តិ៍ឈ្មោះផលិតផលខ្មែរ ថែរក្សាវប្បធម៌ និងលើកកម្ពស់ជីវភាពរស់នៅរបស់ប្រជាពលរដ្ឋ ស្របតាមទិសដៅរបស់ក្រសួងពាណិជ្ជកម្ម និងយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រផងដែរ៕
អត្ថបទ និងរូបភាព៖ លោក អ៊ុន ណារាជ្យ
