គម្រោងសាងសង់ផ្លូវបេតុងអាមេពីរខ្សែ និងគម្រោងជុសជួលដីសក្រាលគ្រោះក្រហមពីរខ្សែ ក្នុងឃុំចំនួន២ គឺឃុំសង្វើយ និងឃុំឬស្សីលក ស្រុកជីក្រែង ខេត្តសៀមរាប ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅថ្ងៃទី២៧ ខែមិថុនា ឆ្នាំ២០២៣នេះ ដោយយមានការចូលរួមពីមន្ត្រីបច្ចេកទេសសាលាខេត្តសៀមរាប មន្ត្រីបច្ចេកទេសស្រុក គណៈកម្មការលទ្ធកម្មឃុំទាំង២ និងក្រុមហ៊ុនម៉ៅការផងដែរ។
បើតាមគណៈកម្មការលទ្ធកម្មឃុំសង្វើយ បានឲ្យដឹងថា សម្រាប់គម្រោងផ្លូវបេតុងអាមេពីរខ្សែ ដែលគណៈកម្មការលទ្ធឃុំ បានដាក់ឲ្យដេញថ្លៃសាងសង់នាពេលនេះ មានប្រវែង ២០៣ម៉ែត្រ ទទឹង៤ម៉ែត្រ កម្រាស់បេតុង ០,១៥ម៉ែត្រ ដាក់លូការពារផ្លូវមុខកាត់០,៨ម៉ែត្រចំនួន ៤កង់ និិងស្លាកសញ្ញាគម្រោងចំនួន១ ក្នុងតម្លៃប៉ានស្មាន ១០៣.៧៦២.៤៥៦រៀល។ ជាមួយគ្នានោះ គម្រោងនេះមានក្រុមហ៊ុនម៉ៅការដាក់សំណើដេញថ្លៃចំនួន ៥ក្រុមហ៊ុន ហើយក្រោយពីបានពិនិត្យ និងវាយតម្លៃលើសំណុំឯកសារដំណើរដេញថ្លៃរបស់អ្នកទទួលការមក ជាលទ្ធផលបានទៅលើក្រុមហ៊ុន វីរៈ ៩៩៩៩ ក្នុងទឹកប្រាក់ចំនួន ១០២.៨០០.០០០រៀល។
ចំណែកគណៈកម្មការលទ្ធកម្មឃុំឬស្សីលក បានឲដឹងថា គណៈកម្មការលទ្ធកម្មឃុំឬស្សីលក បានដាក់ឲ្យដេញថ្លៃ គម្រោងជុសជួលដីសក្រាលគ្រោះក្រហមពីរខ្សែ ទទឹង៥ម៉ែត្រ ប្រវែង៧គម កម្រាស់ក្រួស០.១៥ម៉ែត្រ ជើងទេផ្លូវ ១.៥ម៉ែត្រ សាងសង់លូមូកាត់ផ្លូវមុខកាត់១ម៉ែត្រ ប្រវែង៧ម៉ែត្រ ចំនួន៦កន្លែងកាដ់លូការលូការពារផ្លូវមុខកាត់០.៨មែ៉ត្រ ចំនួន៤កង់ និិងស្លាកសញ្ញាគម្រោងចំនួន១កន្លែង ក្នុងតម្លៃប៉ានស្មាន ១០៦.៩០១.៥៤៥រៀល។ ដោយមានក្រុមហ៊ុនម៉ៅការ ដាក់សំណើដេញថ្លៃចំនួន ៤ក្រុមហ៊ុន ក្រោយពីបានពិនិត្យ និងវាយតម្លៃលើសំណុំឯកសារដំណើរដេញថ្លៃរបស់អ្នកទទួលការ ក្នុងនោះលទ្ធផលបានទៅលើ ក្រុមហ៊ុន ទុយ សោភ័ណ ខនស្ត្រាក់សិន ក្នុងទឹកប្រាក់ចំនួន ១០៥.២០០.០០០រៀល។
ក្នុងឱកាសនោះផងដែរ លោក ម៉ូវ ជា អភិបាលរងស្រុកជីក្រែង បានបញ្ជាក់ថា ក្នុងនាមអាជ្ញាធរស្រុក ក៏ដូចជាអាជ្ញាធរឃុំ សុំណែនាំដល់ម្ចាស់ក្រុមហ៊ុនម៉ៅការដែលទទួលបានសិទ្ធសាងសង់ ធ្វើយ៉ាងណាត្រូវមានការទទួលខុសត្រូវចំពោះក្រុមការងារ ដោយអនុវត្តទៅតាមលក្ខខណ្ឌដែឡបានសន្យា ធ្វើយ៉ាងណាឲ្យការងារជួសជុលនេះសម្រេចបានទៅតាមការគ្រោងទុក និងមានគុណភាពល្អ។ ក្នុងនោះដែរគ្រប់ក្រុមហ៊ុនត្រូវមានការសហការគ្នាឲ្យបានជិតស្និតក្នុងការអនុវត្តការងារនេះ ហើយអាជ្ញាធរមូលដ្ឋានត្រូវតាមដានជាប្រចាំទៅលើការងារជួសជុលផ្លូវក្នុងមូលដ្ឋានខ្លួន ហើយប្រសិនបើក្រុមហ៊ុនណាមិនអនុវត្តតាមគោលការ អាជ្ញាធរឃុំត្រូវមានវិធានការចាំបាច់ណាមួយក្នុងការដោះស្រាយ និងអាចរាយការណ៍មកកាន់អាជ្ញាធរស្រុកដោះស្រាយបន្តក្នុងករណីចាំបាច់។
ក្រោយបញ្ចប់គម្រោងនៃការដេញថ្លៃនេះ ចំពោះក្រុមទាំងពីរ ដែលទទួលបានសាងសង់ផ្លូវបេតុងអាមេ២ខ្សែ និងគម្រោងជុសជួលដីសក្រាលគ្រោះក្រហម២ខ្សែ បានធ្វើការប្ដេជ្ញាចិត្ត ដោយសន្យាថា នឹងធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ ធ្វើឲ្យបានទាន់តាន់ពេលវេលា និងគោរពទៅតាមលក្ខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ហ៊ុន ឆៃលាង
កែសម្រួល៖ អ៊ុន ណារាជ្យ
