មជ្ឈមណ្ឌលបណ្តុះបណ្តាលតម្បាញសូត្រ របស់ធនាគារមេយប៊ែង ស្ថិតក្នុងស្រុកបន្ទាយស្រី ខេត្តសៀមរាប ត្រូវបានសម្ពោធដាក់ឱ្យដំណើរការ នារសៀលថ្ងៃទី២៧ ខែមិថុនា ឆ្នាំ២០២៣ បន្ទាប់ពីបញ្ចប់ការកសាងកាលពីឆ្នាំ២០២០កន្លងទៅ ក្នុងអំឡុងពេលនៃការរាត្បាត់ជាសកលនូវជំងឺកូវីដ-១៩ ។
បើតាមលោក រ័ត្ន សោភណ្ឌ ប្រធានធនាគារមេឃប៊ែង នៅកម្ពុជា បានឲ្យដឹងថា ចាប់តាំងពីការសាងសង់មជ្ឈមណ្ឌលនេះបានបញ្ចប់កាលពីឆ្នាំ២០២០ មជ្ឈមណ្ឌលបានធ្វើការបណ្តុះបណ្តាលដល់អ្នកតម្បាញជាស្ត្រីចំនួន ១៧៨នាក់។ បន្ថែមពីការងារតម្បាញសូត្រ មជ្ឈមណ្ឌលបានផ្តល់ឱកាសដល់ស្ត្រីតម្បាញទាំងអស់អាចលក់ក្រណាត់សូត្រដែលត្បាញដោយដៃខ្លួនផ្ទាល់ផងដែរ ដើម្បីឱ្យពួកគាត់អាចរកប្រាក់ចំណូលបន្ថែមតាមរយៈការលក់ផលិតផលសូត្រទាំងនោះជូនភ្ញៀវទេសចរ។
លោកបន្តថា ប្រទេសកម្ពុជាគឺជាផ្នែកសំខាន់មួយនៃកម្មវិធីសូត្រនិងតម្បាញរបស់ធនាគារមេយប៊ែងដែលបានបង្កើតជាលើកដំបូងនាឆ្នាំ២០១៦នៅខេត្តតាកែវក្នុងគោលបំណងលើកកម្ពស់វិស័យសិល្បៈតម្បាញសូត្រនៅប្រទេសកម្ពុជាប្រកបដោយចិរភាពដើម្បីស្តារឡើងវិញនូវសេដ្ឋកិច្ចសម្រាប់ស្ត្រីនៅទូទាំងតំបន់អាស៊ានក្នុងនោះមានប្រទេសចំនួនបីទៀតក្នុងសហគមន៍អាស៊ានក៏ទទួលបានការរីកចម្រើនគួរឱ្យកត់សម្គាល់ដែររួមមានប្រទេសឥណ្ឌូណេស៊ី ឡាវ និងម៉ាឡេស៊ី។ ជារួមការងារនៅក្នុងមជ្ឈមណ្ឌលនេះមិនត្រឹមតែការពារកេរ្តិ៍ដំណែលសិល្បៈសូត្រពីបុរាណនោះទេ តែក៏បាផ្តល់ជំនួយបច្ចេកទេសដល់កសិករនៃការដាំដុះដើមមន ការចិញ្ចឹមដង្កូវនាងនិងផ្តល់ការគាំទ្រការផលិតបែបអំបោះឆៅសម្រាប់ផលិតសំលៀកបំពាក់ទៀតផង។ មកដល់ពេលនេះកម្មវិធីសូត្រ និងតម្បាញរបស់ធនាគារមេយប៊ែងនៅប្រទេសកម្ពុជាមានស្ត្រីតម្បាញចំនួន ៥៣៤នាក់ បានបញ្ចប់នូវកម្មវិធីបណ្តុះបណ្តាលជំនាញសូត្រ និងតម្បាញហើយពួកគាត់អាចរកប្រាក់ចំណូលបានរហូតដល់ ៣៥០ដុល្លារក្នុងមួយខែ។ ក្រៅពីតម្បាញសូត្រ មជ្ឈមណ្ឌលក៏មានបណ្តុះបណ្តាលនូវជំនាញដាំដើមមនទៅដល់កសិករក្នុងសហគមន៍ជាង ៩៨០នាក់ដែលដាំដើមមនបានចំនួនជិត ១៥ម៉ឺនដើម ដែលអាចឱ្យពួកគាត់រកប្រាក់ចំណូលបន្ថែមជាមធ្យម ៣៥ដុល្លារទៀក្នុង១ខែ។
មានប្រសាសន៍ក្នុងឱកាសអញ្ជើញជាអធិបតីក្នុងពិធីសម្ពោធនេះដែរ អគ្គលេខាធិការអាស៊ាន ឯកឧត្តមបណ្ឌិត កៅ គឹមហួន បានលើកឡើងថា ការជ្រើសរើសយកស្រុកបន្ទាយស្រី ជាទីតាំងបង្កើតមជ្ឈមណ្ឌលបណ្តុះបណ្តាលជំនាញដូនតាមួយនេះ វាពិតជាសក្តិសមខ្លាំងណាស់ ព្រោះស្រុកនេះ មានសក្តនុពលខ្លាំលើផ្នែកទេសចរណ៍ មានភាពងាយស្រួលក្នុងការផ្សព្វផ្សាយនូវផលិតផលសិល្បៈនានា ពិសេសផ្នែកតម្បាញសូត្រនេះ។ ហើយឯកឧត្តមរំពឹងថា មជ្ឈមណ្ឌលនេះ នឹងក្លាយជាទីតាំងបណ្តុះបណ្តាលជំនាញដូនតាដែលប្រកបដោយប្រសិទ្ធភាពខ្ពស់៕
អត្ថបទ និងរូបភាព៖ លោក ជា ស្រស់, លោក យូ វង្ស
កែសម្រួល៖ អ៊ុន ណារាជ្យ
