នៅរសៀលថ្ងៃទី២៧ ខែមិថុនា ឆ្នាំ២០២៣ម្សិលមិញនេះ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គខបជ) បានរៀបចំកិច្ចជុំប្រចាំឆមាសទី១ ឆ្នាំ២០២៣របស់ខ្លួន ដើម្បីធ្វើការពិនិត្យ និងពិភាក្សាលើបញ្ហាប្រឈមមួយចំនួនពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្ស។ កិច្ចប្រជុំនេះដឹកនាំដោយលោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត រួមនឹងវត្តមានតំណាងមន្ទីរអង្គភាពពាក់ព័ន្ធ រដ្ឋបាលក្រុងស្រុក និងអង្គការដៃគូជាតិ-អន្តរជាតិជាច្រើនរូប។
មានប្រសាសន៍ក្នុងឱកាសនោះ លោកស្រី យូ សូភា បានបញ្ជាក់ថា កិច្ចប្រជុំនាពេលនេះដែរ គឺដើម្បីធ្វើការពិនិត្យ និងពិភាក្សានូវរបៀបវារៈចំនួន២ គឺ៖១.ពិនិត្យលើសេចក្តីរបាយការណ៍លទ្ធផលការងារប្រយុទ្ធប្រឆាំងអំពើជួញដូរមនុស្សប្រចាំឆមាសទី១ ឆ្នាំ២០២៣, ២.ពិនិត្យ និងពិភាក្សាលើបញ្ហាប្រឈម ពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្ស ដោយបានផ្តោតសំខាន់ទៅលើបញ្ហាដែលពិភាក្សានៅក្នុងកិច្ចប្រជុំកាលពីខែឧសភា ដោយស្ថាប័នពាក់ព័ន្ធធ្វើបច្ចុប្បន្នភាព ដូចជាករណីជនជាតិចិនស្នើសុំរៀបអាពាពិពាហ៍ជាមួយស្រ្តីខ្មែរ (នៅឃុំខ្នងភ្នំ ស្រុកស្វាយលើ) ដោយករណីនេះជនជាតិចិនបានស្នើសុំបែបបទពីស្ថានទូតរួចហើយ និងបាននឹងកំពុងរៀបចំឯកសារដើម្បីស្នើសុំទៅក្រសួងមហាផ្ទៃបន្ត និងការតាមដានត្រួតពិនិត្យលើស្រ្តីរងគ្រោះដោយករណីរៀបការផ្ទុយពីឆន្ទៈ ដែលបានធ្វើសមាហរណកម្មត្រឡប់ទៅមូលដ្ឋានវិញ ចំនួន២នាក់ នៅស្រុកវ៉ារិន ដោយទទួលបានការគាំទ្រទៅលើរៀនជំនាញវិជ្ជាជីវៈ មានការគាំទ្រដោយអង្គការមូលនិធិ A២១។
លោកស្រី យូ សូភា បានបញ្ជាក់ទៀតថា កន្លងមកមន្ទីរកិច្ចការនារីខេត្ត ស្នងការនគរបាលខេត្ត និងអង្គការ APLE បានធ្វើបច្ចុប្បន្នភាពអំពីករណីដែលសង្ស័យទទួលរងការរំលោភបំពានតាមប្រព័ន្ធអនឡាញ បានធ្វើការចុះប្រឹក្សាយោបល់ផ្នែកផ្លូវចិត្ត និងផ្នែកច្បាប់ជូនកុមារីជាអនីតិជនដែលមានទំនាក់ទំនងជាមួយជនបរទេស ហើយមានការរំលោភបំពានតាមអនឡាញ។ ចំពោះលេខាធិការដ្ឋាន គ.ខ.ប.ជ រដ្ឋបាលស្រុកពួក ស្នងការនគរបាលខេត្ត និងអង្គការ A២១ យើងបានធ្វើបច្ចុប្បន្នភាពលើករណីអតីតពលករនៅភូមិព្រៃជ្រូក ឃុំកែវពណ៌ ស្រុកពួក ដោយបានធ្វើការចុះប្រឹក្សាយោបល់ និងធ្វើសម្ភាសន៍ដើម្បីកំណត់អត្តសញ្ញាណ ព្រមទាំងបាននាំយកថវិកា និងសម្ភារប្រើប្រាស់ គ្រឿងឧបភោគបរិភោគមួយចំនួន របស់លេខាធិការដ្ឋាន គ.ខ.ប.ជ រដ្ឋបាលស្រុកពួក និងអង្គការមូលនិធិអេ២១ ជូនពួកគាត់ផងដែរ។
សូមជម្រាបជូនដែរថា នៅក្នុងអង្គប្រជុំនាពេលនោះដែរ ក្រុមការងារក៏បានលើកឡើងអំពីបញ្ហាប្រឈមថ្មីៗមួយចំនួនទៀត យកមកពិភាក្សារួមមាន៖ ករណីក្រុមហ៊ុនឯកជនមួយបានស្នើឱ្យអាជ្ញាធរឃុំ ធ្វើការបញ្ជាក់លម្អិតអំពីទំនាក់ទំនងរវាងប្រជាពលរដ្ឋ ៣នាក់ និងអ្នកដែលបានយកទៅចិញ្ចឹម ថាជាមេគ្រួសាររបស់ពលរដ្ឋទាំង៣ ដើម្បីនាំយកចេញទៅធ្វើការនៅប្រទេសជប៉ុន។ ករណីខាងលើនេះជំនាញសមត្ថកិច្ចនឹងធ្វើការស្រាវជ្រាវបន្ត ព្រោះវាអាចជាករណីពាក់ព័ន្ធនឹងការជួញដូរកម្លាំងពលកម្ម។ ការជំរុញ និងពង្រឹងទៅលើការចុះអធិការកិច្ច នៅតាមមណ្ឌលថែទាំជំនួស នៅក្នុងខេត្តសៀមរាប និងបានពិភាក្សាទៅលើករណីកុមារអាយុ ២ខែកន្លះ ពុំមានទឹកដោះគោប៉ៅដោយសារក្រោយពីសម្រាលរួចម្តាយបានទុកចោលនៅជាមួយឪពុកក្រីក្រ ករណីអាជ្ញាធរបានដោះស្រាយជូនមួយចំនួនដែរ ប៉ុន្តែមិនគ្រប់គ្រាន់ ទើបស្នើឱ្យមានការជួយគាំទ្របន្ថែមពីដៃគូ។ នៅក្នុងកិច្ចប្រជុំ ក៏បានផ្សព្វផ្សាយជូនអំពីវគ្គបណ្តុះបណ្តាលជំនាញវិជ្ជាជីវៈ ដោយឥតគិតថ្លៃជូនដល់ពលករដែលបានវិលត្រឡប់មកពីធ្វើការនៅក្រៅប្រទេសវិញ ដែលគាំទ្រដោយអង្កការ IOM នៅវិទ្យាស្ថានជាតិពហុបច្ចេកទេសអង្គរខេត្តសៀមរាប ទៀតផង៕
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
